ଏଣିକି ରାଜଧାନୀରେ ମହିଳାଙ୍କୁ ସୁରକ୍ଷା ଦେବେ ମହିଳା। ଦିନକୁ ଦିନ ବଢୁଥିବା ନାରୀ ନିର୍ଯାତନା, ଅତ୍ୟାଚାର, ବଳାତ୍କାରକୁ ରୋକିବା ପାଇଁ କମିଶନରେଟ ପୋଲିସ ପକ୍ଷରୁ ମହିଳା ସ୍ପେଶାଲ ପୋଲିସ ଅଫିସର(ଏସ୍‌ପିଓ) ଗଠନ କରାଯାଇଛି। ଗୁରୁବାର  ଏହି ଏସ୍‌ପିଓମାନେ ଦାୟିତ୍ୱ ନେଇଛନ୍ତି । ଏଥିପାଇଁ ପ୍ରାୟ ୩୦୦ଜଣ ମହିଳା ଓ ଯୁବତୀ କମିଶନରେଟ୍‌ ବିଲ୍ଡିଂରେ ବିଧିବଦ୍ଧ ଭାବେ ନିଯୁକ୍ତି ପାଇଛନ୍ତି । ଏହି ଏସପିଓମାନେ ନିଜ ନିଜ ଘରୋଇ ପ୍ରତିଷ୍ଠାନ ଓ ଶିକ୍ଷାନୁଷ୍ଠାନରେ ଘଟୁଥିବା ଅସଦାଚରଣ ଓ ନିର୍ଯାତନା ଘଟଣାରେ ରୋକ ଲଗାଇବା ନେଇ କାର୍ଯ୍ୟ କରିବା ସହ ପୋଲିସକୁ ସହାୟତା କରିବେ। ପୋଲିସ କମିଶନର ଡ. ସୁଧାଂଶୁ ଷଡ଼ଙ୍ଗୀଙ୍କ ଅଧ୍ୟକ୍ଷତାରେ ଗୁରୁବାର ପୂର୍ବାହ୍ନ ସାଢ଼େ ୧୧ଟାରେ କମିଶନରେଟ୍‌ ବିଲ୍ଡିଂରେ ଏ ନେଇ ଏକ ସ୍ବତନ୍ତ୍ର କାର୍ଯ୍ୟକ୍ରମ ଆୟୋଜନ ହୋଇଛି । ଏହି ଅବସରରେ ଦାୟିତ୍ୱ ଗ୍ରହଣ କରିବାକୁ ଥିବା ଏସ୍‌ପିଓଙ୍କୁ ଟି-ସାର୍ଟ ପ୍ରଦାନ କରାଯାଇଛି । ସୂଚନାଯୋଗ୍ୟ, ବିଭିନ୍ନ କଲେଜର ଛାତ୍ରୀ ଓ ବ୍ୟବସାୟିକ ପ୍ରତିଷ୍ଠାନ ମହିଳାଙ୍କ ଉପରେ ବଢ଼ୁଥିବା ନିର୍ଯାତନା ଉପରେ ରୋକ ଲଗାଇବା ନେଇ ପୂୂର୍ବରୁ କମିଶନରେଟ୍‌ ପୋଲିସ ଏହି ନିଷ୍ପତ୍ତିି ନେଇଥିଲା। ଗତ ଡିସେମ୍ବର ୧୬ରେ ଏ ନେଇ ୪୮ଟି ସଂସ୍ଥାକୁ ଚିଠି ଲେଖିଥିଲେ। ଏସ୍‌ପିଓ ପଦବୀ ପାଇଁ କର୍ମଚାରୀଙ୍କୁ ଚିହ୍ନଟ କରି ଏକ ତାଲିକା ଦେବାକୁ ସଂସ୍ଥାଗୁଡ଼ିକୁ କୁହାଯାଇଥିଲା। ବୁଧବାର ଅପରାହ୍ନ ସୁଦ୍ଧା ପ୍ରାୟ ୩୫ଟି ସଂସ୍ଥାର ୨୫୦ରୁ ଊର୍ଦ୍ଧ୍ୱ ମହିଳା କର୍ମଚାରୀ ଓ ଛାତ୍ରୀଙ୍କ ତାଲିକା ପୋଲିସର ହସ୍ତଗତ ହୋଇଥିଲା ।