ଭୁବନେଶ୍ୱର, ମେ ୨୨ : ଓଡ଼ିଶାର ଜେଲ ଗୁଡ଼ିକରେ ମା’ ମାନଙ୍କ ସହିତ ୪୬ ଜଣ ନିଷ୍ପାପ ଶିଶୁ ଜେଲରେ ଦିନ କାଟୁଛନ୍ତି । କାହିଁକି ଏହି ଶିଶୁମାନଙ୍କୁ ଜେଲରେ ରଖାଯାଇଛି ତାହାକୁ ନେଇ ଜାତୀୟ ମାନବାଧିକାର ଆୟୋଗ ରାଜ୍ୟ ସରକାରଙ୍କ ଠାରୁ କୈଫିୟତ ତଲବ କରିଛନ୍ତି ।
ମା ମାନଙ୍କ ସହ ଶିଶୁମାନଙ୍କୁ ଜେଲରେ ରଖାଯିବା ଆଇନ ସମ୍ମତ ନଥିବା ବେଳେ ଏହାକୁ ଉଲ୍ଲଂଘନ କରି କିଭଳି ରଖାଯାଇଛି ତାକୁ ନେଇ ଗଣମାଧ୍ୟମ ଗୁଡ଼ିକରେ ପ୍ରକାଶ ପାଇବା ପରେ ଜାତୀୟ ମାନବାଧିକାର ଆୟୋଗ ନିଜ ଆଡ଼ୁ ମାମଲା ରୁଜୁ କରିଥିଲେ । ଜନ୍ମରୁ ୫ବର୍ଷ ବୟସ ପର୍ଯ୍ୟନ୍ତ ପିଲା ମା’ ମାନଙ୍କ ସହ ରହିପାରିବେ ବୋଲି ନିୟମ ଥିବାବେଳେ ୫ବର୍ଷ ବୟସରୁ ଊଦ୍ଧ୍ୱର୍ ବୟସର ପିଲା ବିଭିନ୍ନ ଜେଲରେ ମା ମାନଙ୍କ ସହ ରହିଛନ୍ତି । ଫଳରେ ସୁପ୍ରିମକୋର୍ଟ ନିର୍ଦ୍ଦେଶ ମୁତାବକ ସେମାନଙ୍କ ଖାଦ୍ୟ, ପୋଷାକ, ଶିକ୍ଷା, ଆମୋଦପ୍ରମୋଦ ଓ ସ୍ୱାସ୍ଥ୍ୟ ବିକାଶ ଉପେକ୍ଷିତ ହୋଇରହୁଛନ୍ତି ।
ଓଡ଼ିଶାର ବିଭିନ୍ନ ଜେଲରେ ଥିବା ୪୬ ଜଣ ଶିଶୁଙ୍କ ମଧ୍ୟରୁ ୨୫ ଜଣ କନ୍ୟା ସନ୍ତାନ ଥିବା ଜଣାଯାଇଛି । ସେମାନଙ୍କ ବୟସ ୨୦ ଦିନରୁ ୬ ବର୍ଷ ମଧ୍ୟରେ ରହିଛି । ଜେଲରେ ଥିବା ୪୬ ଜଣ ମହିଳା ବନ୍ଦୀଙ୍କ ମଧ୍ୟରୁ ୩୬ ଜଣ ବିଚରାଧିନ ବନ୍ଦୀ ଏବଂ ସେମାନଙ୍କ ମଧ୍ୟରୁ ୩୦ ଜଣ ଅନୁସୂଚିତ ଜନଜାତିର ।
22/05/2018