କେନ୍ଦ୍ରାପଡ଼ା ଜିଲ୍ଲାର ଜଣେ ବିଧବା ଅସହାୟ ମହିଳା ନିଜ ଭିକ୍ଷାବୃତ୍ତିରୁ ସଂଚିଥିବା ୫୦ ହଜାର ଟଙ୍କାକୁ ମହାପ୍ରଭୁ ଶ୍ରୀଜଗନ୍ନାଥଙ୍କୁ ଦାନ କରି ଦେଇଥିବା ଭଳି ଏକ ଖବର ଏବେ ଚର୍ଚ୍ଚାକୁ ଆସିଛି । ଦାନ ପାଇଁ ଅର୍ଥ ନୁହେଁ ବରଂ ଇଚ୍ଛାଶକ୍ତି ଥିବା ଆବଶ୍ୟକ ବୋଲି ଭକ୍ତ ମହିଳା ପ୍ରମାଣ କରାଇ ଦେଇଛନ୍ତି ।
ମାସକୁ ୩୦୦ ଟଙ୍କାର ବିଧବା ଭତ୍ତା ଓ ୫ କେଜି ଚାଉଳ ସହାୟତାରୁ ଜୀବିକା ପ୍ରତିପୋଷଣ କରିପାରୁ ନଥିବା ଏହି ମହିଳା ଜଣକ ହେଉଛନ୍ତ ରାଜକନିକା ବ୍ଲକ ଜାଗୁଳାଇପଡ଼ାର ମୃତ ଶ୍ରୀଧର ଦାସଙ୍କ ପତ୍ନୀ ସରୋଜିନୀ ଦାସ । ଅଭାବ ପରିବାରର ଏହି ମହିଳା ଜଣଙ୍କ ପରମେଶ୍ୱର ଦାସ ନାମକ ଜଣେ ଯୁବକଙ୍କୁ ପୋଷ୍ୟ ସନ୍ତାନ ଭାବେ ଗ୍ରହଣ କରିଥିଲେ । କିନ୍ତୁ ପରମେଶ୍ୱର ମଧ୍ୟ ସାଥୀରେ ରହିଲେନି । ସ୍ୱାମୀଙ୍କ ମୃତ୍ୟୁ ପରେ ସମ୍ପତ୍ତିରୁ ଭାଗ ମିଳିନଥିଲା । ଛୋଟ ଏକ କୁଡ଼ିଆରେ ଅସହାୟ ସରୋଜିନୀ ଭିକ୍ଷା ବୃତ୍ତି କରି ଚଳୁଥିଲେ । ଘରଟି ଭାଙ୍ଗିରୁଜି ଯିବାରୁ ସେ ଏବେ ପଂଚାୟତ କାର୍ଯ୍ୟାଳୟରେ ଅସ୍ଥାୟୀ ଭାବେ ଆଶ୍ରୟ ନେଉଛନ୍ତି । ନିଜ ଭିକ୍ଷାବୃତ୍ତି ଓ ବିଧବା ଭତ୍ତାର ସଂଚିତ ଅର୍ଥ ୫୦ ହଜାର ଟଙ୍କା ହେବା ପରେ ସେ ପୁରୀ ଆସି ଜଗନ୍ନାଥଙ୍କ ଉଦ୍ଦେଶ୍ୟରେ ଶ୍ରୀମନ୍ଦିର କାର୍ଯ୍ୟାଳୟରେ ଜମା କରିଦେଇଛନ୍ତି । କହିଛନ୍ତି କାଳିଆରେ ମୋ ଘର ତ ଭାଙ୍ଗିଗଲା ହେଲେ ତୋ ଘର ଭାଙ୍ଗି ନଯାଉ । ମୋର ସଂଚିତ ଅର୍ଥ ତୋତେ ଦେଲି, ତୁ ଏବେ ମୋ କଥା ବୁଝ । ସରୋଜିନୀଙ୍କ ଏଭଳି ଦାନ କାର୍ତ୍ତିକ ପ୍ରଥମ ସପ୍ତାହରୁ ଚର୍ଚ୍ଚା ଯୋଗାଇଛି ।
26/10/2018