ମହକାଶଚାରୀମାନେ କାହିଁକି କମଳା ଓ ଧଳା ରଙ୍ଗର ସ୍ପେସ୍ ସୁଟ୍ ପିନ୍ଧନ୍ତି? ପେଙ୍ଗୁଇନ୍ର ପାଦ କାହିଁକି ବରଫରେ ଥଣ୍ଡା ହୋଇ ଜମିଯାଏନି? ଲିନିଂ ଟାୱାର୍ ଅଫ୍ ପିସା କାହିଁକି ଟିକିଏ ଟିକିଏ ହୋଇ ଢଳୁଛି? ଏଭଳି ୧୦୧ଟି ବୈଜ୍ଞାନିକ ପ୍ରଶ୍ନର ଉତ୍ତର ଦେଇପାରିଛନ୍ତି ୯ ବର୍ଷ ୭ ମାସ ୧୧ ଦିନର କୁନି ବାଳିକା ଆରାଧ୍ୟା ଚୌଧୁରୀ । ଫଳତଃ ତାଙ୍କ ନାମ ଇଣ୍ଡିଆ ବୁକ୍ ଅଫ୍ ରେକର୍ଡସ୍ରେ ସ୍ଥାନ ପାଇଛି ।ତାଙ୍କୁ ମିଳିଛି 'ମାକ୍ସିମମ୍ କ୍ୟୁଶ୍ଚିନ୍ସ୍ ଅନ୍ ଜେନେରାଲ୍ ଅବଜର୍ଭେସନ୍ ଆନ୍ସର୍ଡ୍ ବାଇ ଏ ଚାଇଲ୍ଡ' ଶୀର୍ଷକ ପ୍ରମାଣପତ୍ର। ସେ ୧୦୧ଟି ବୈଜ୍ଞାନିକ ପ୍ରଶ୍ନ (ସାଧାରଣ ପର୍ଯ୍ୟବେକ୍ଷଣ ଆଧାରିତ)ର ଉତ୍ତର ଦେବାରେ ସବୁଠାରୁ କମ୍ ବୟସର ପିଲା ହୋଇଛନ୍ତି । ଗତ ମାସ ୧୪ ତାରିଖରେ ଏ ନେଇ ପରୀକ୍ଷା କରାଯାଇଥିଲା ଓ ସେଥିରେ କୃତିତ୍ୱ ହାସଲ କରିଥିଲେ ଏହି କୁନି ଛାତ୍ରୀଜଣକ । ଏହି ରେକର୍ଡକୁ ଗତ ୨୨ ତାରିଖରେ ସମ୍ମତି ଦିଆଯାଇଥିବା ସୂଚାଇଛନ୍ତି ଇଣ୍ଡିଆ ବୁକ୍ ଅଫ୍ ରେକର୍ଡସ ମୁଖ୍ୟ ସମ୍ପାଦକ ଡ. ବିଶ୍ୱରୂପ ରାୟ ଚୌଧୁରୀ । ନିକଟରେ ଆରାଧ୍ୟ ନିଜ ପ୍ରମାଣପତ୍ର ପାଇଛନ୍ତି । ମୂଳତଃ ବ୍ରହ୍ମପୁର ନିବାସୀ ବ୍ୟାଙ୍କ୍ ଅଧିକାରୀ ବିନାୟକ ଚୌଧୁରୀ ଓ ସନ୍ତୋଷିନୀ ଚୌଧୁରୀଙ୍କ କନ୍ୟା ଆରାଧ୍ୟା ଫେବ୍ରୁଆରୀ ୩, ୨୦୧୧ରେ ଜନ୍ମିତ । ସମ୍ପ୍ରତି ସେ ଡେରାଡୁନ୍ରେ ୪ର୍ଥ ଶ୍ରେଣୀରେ ଅଧ୍ୟୟନରତ । ମାତ୍ର ୨୦ ଦିନରେ ସେ ଏଥିପାଇଁ ଅଭ୍ୟାସ କରି ଉକ୍ତ ସଂସ୍ଥାକୁ ଆବେଦନ କରିଥିଲେ । ଇଣ୍ଡିଆ ବୁକ୍ ଅଫ୍ ରେକର୍ଡସ ପାରାମିଟର୍ ଓ ପ୍ରୋଟୋକଲ୍ ଅନୁସାରେ କୃତିତ୍ୱ ହାସଲ କରିଛନ୍ତି ଆରାଧ୍ୟା ।
04/10/2020