ବ୍ରହ୍ମପୁର ସରକାରୀ ଶିଳ୍ପ ତାଲିମ ପ୍ରତିଷ୍ଠାନ (ଆଇଟିଆଇ)ର ଛାତ୍ରଛାତ୍ରୀମାନେ ବିଭିନ୍ନ ପ୍ରକାର ବର୍ଜ୍ୟ ଦ୍ରବ୍ୟକୁ ବ୍ୟବହାର କରି ପ୍ରସ୍ତୁତ କରିଥିବା ଆକର୍ଷଣୀୟ କଳାକୃତ୍ତି ସମୂହକୁ ନେଇ ଏକ ପ୍ରଦର୍ଶନୀର ଆୟୋଜନ କରିଛନ୍ତି । ଗଞ୍ଜାମ ଜିଲ୍ଲାପାଳ ବିଜୟ ଅମୃତ କୁଲାଙ୍ଗେ ବିଦ୍ୟାର୍ଥିମାନଙ୍କ ସ୍ୱଚ୍ଛତା ହିଁ ସେବା ଥିମକୁ ନେଇ ବର୍ଜ୍ୟ ବସ୍ତୁରେ ପ୍ରସ୍ତୁତ ଆକର୍ଷଣୀୟ କଳା ଗୁଡ଼ିକର ପ୍ରଦର୍ଶନୀକୁ ଉଦଘାଟନ କରିଥିଲେ ।
ଭଙ୍ଗାଲୁହା, ବୈଦ୍ୟୁତିକ ବର୍ଜ. ଅଟୋ ମୋବାଇଲି ବର୍ଜ୍ୟ ଓ ପ୍ଲାଷ୍ଟିକକୁ ବ୍ୟବହାର କରି ୨୦୦ ପ୍ରକାରର ବିଭିନ୍ନ କଳାକୃତ୍ତି ତିଆରି କରି ପ୍ରଦର୍ଶିତ କରାଯାଇଛି । ଏହା ସବୁ ଜିଲ୍ଲାର ବିଭିନ୍ନ ସ୍କୁଲ ଗୁଡ଼ିକୁ ଦାନ କରି ଦିଆଯିବ । ବିଦ୍ୟାଳୟ ଗୁଡ଼ିକରେ ଛାତ୍ରଛାତ୍ରୀମାନଙ୍କ ପାଇଁ ଏହି ଦ୍ରବ୍ୟ ପ୍ରେରଣାଦାୟୀ ହୋଇପାରିବ ବୋଲି ଆଇଟିଆଇର ଅଧ୍ୟକ୍ଷ ରଜତ କୁମାର ପାଣିଗ୍ରାହୀ ସୂଚାଇଛନ୍ତି ।
ଅଦରକାରୀ ଦ୍ରବ୍ୟ ଗୁଡ଼ିକୁ ଲୋକେ ଫିଙ୍ଗି ଦିଅନ୍ତି । ଏହା ପରିବେଶ ପାଇଁ ବିପଦ ସୃଷ୍ଟି କରେ । ଏଥିରୁ ଯଦି ଶହ ଶହ ପ୍ରଜାତିର ଘର ସାଜସଜ୍ଜା ଓ ଆକର୍ଷଣୀୟ କଳାକୃତ୍ତି ତିଆରି ହୋଇପାରିଲା ତେବେ ଏହା ଜୀବିକା ପାଇଁ ଆଉ ଏକ ଉତ୍ସ ହୋଇପାରିବ ବୋଲି ପାଣିଗ୍ରାହୀ କହିଛନ୍ତି । ଗଞ୍ଜାମ ଜିଲ୍ଲା ଶିକ୍ଷା ଅଧିକାରୀ ସନାତନ ପଣ୍ଡା ଆଇଟିଆଇ ଛାତ୍ରଛାତ୍ରୀଙ୍କ ଏଭଳି ସୃଜନଶୀଳତା ଗଞ୍ଜାମ ଜିଲ୍ଲାର ସ୍କୁଲ ଛାତ୍ରଛାତ୍ରୀଙ୍କୁ ଶିକ୍ଷା ପ୍ରଦାନ କରିବ ବୋଲି ଦର୍ଶାଇଥିଲେ । ଟେବୁଲ ଲ୍ୟାମ୍ପ, କାନ୍ଥ ଘଣ୍ଟା, ଫୁଲଦାନୀ, ହାତୀ ଆଦି ଆକର୍ଷଣୀୟ ହୋଇଥିଲା ।
20/09/2018