କେନ୍ଦୁଝର ଜିଲ୍ଲାରୁ କାମ ଅନ୍ୱେଷଣରେ କେନ୍ଦ୍ରାପଡ଼ା ଆସି ପଟ୍ଟାମୁଣ୍ଡାଇରେ ରହୁଥିବା ଜନୈକ ୫୨ ବର୍ଷ ବୟସ୍କ ଜଙ୍ଗରାଇ ମୁଣ୍ଡାଙ୍କ ସୋମବାର ରାତି ୧୦ଟା ବେଳେ ପଟ୍ଟାମୁଣ୍ଡାଇ ମେଡ଼ିକାଲରେ ମୃତ୍ୟୁ ଘଟିଥିଲା । ଅର୍ଥାଭାବ ଯୋଗୁଁ ମେଡ଼ିକାଲରୁ ଶବକୁ ଘରକୁ ନେବାରେ ସକ୍ଷମ ହୋଇନପାରି ତାଙ୍କ ପତ୍ନୀ ଶବ ନିକଟରେ ଆର୍ଥିକ ସହାୟତା ପାଇଁ ଆକୁଳ ନିବେଦନ କରୁଥିବାର ବିକଳ ଚିତ୍ର ଦେଖିବାକୁ ମିଳିଥିଲା । ପତିର ଶବ ନିକଟରେ ସତ୍କାର ପାଇଁ ସହାୟତା ଦେବାକୁ ପତ୍ନୀର ଆକୁଳ ନିବେଦନ ଭଳି ଅଭାବନୀୟ ଦୃଶ୍ୟକୁ ମେଡ଼ିକାଲ କର୍ତ୍ତୃପକ୍ଷ ନୀରବ ଦର୍ଶକ ଭଳି ଦେଖି ଚାଲିଥିଲେ । ଖବର ପାଇ ଆଖ ପାଖ ଅଂଚଳର ଲୋକେ ମେଡ଼ିକାଲରେ ପହଂଚି ସହାୟତା ପ୍ରଦାନ କରୁଥିବା ଦେଖିବାକୁ ମିଳିଥିଲା ।
କେନ୍ଦୁଝର ଜିଲ୍ଲା ଦୁଦୁନାଳି ଗ୍ରାମର ଜଙ୍ଗରାଇ ମୁଣ୍ଡା ଓ ତାଙ୍କ ପତ୍ନୀ ପଟାମୁଣ୍ଡାଇ ଚାହାପଡ଼ା ଗ୍ରାମରେ ଦିନ ମଜୁରିଆ ଭାବେ କାମ କରୁଥିଲେ । ଜଙ୍ଗରାଇ ୨ ମାସ ଧରି ଜ୍ୱରରେ ପୀଡ଼ିତ ଥିଲେ । ଆର୍ଥିକ ସମସ୍ୟା କାରଣରୁ ତାଙ୍କୁ ଚିକିତ୍ସା ସେବା ମିଳିପାରିନଥିଲା । ସଙ୍କଟାପନ୍ନ ଅବସ୍ଥାରେ ତାଙ୍କୁ ମେଡ଼ିକାଲ ଅଣାଯାଇଥିଲା । ଡ଼ାକ୍ତର ତାଙ୍କୁ ମୃତ୍ୟୁ ଘୋଷଣା କରିଥିଲେ । ଜାଙ୍ଗରାଇଙ୍କ ପତ୍ନୀ ସ୍ୱେଚ୍ଛାସେବୀଙ୍କ ସହାୟତାରେ ୨୪ ଘଣ୍ଟା ପରେ ଶବକୁ ସତ୍କାର ପାଇଁ ନେଇଛନ୍ତି ।
14/11/2018