କୋଭିଡ୍ ଯୋଦ୍ଧାମାନଙ୍କ ତ୍ୟାଗ ଓ ଉତ୍ସର୍ଗୀକୃତ ସେବାକୁ ପ୍ରଶଂସା କରିବା ସହ ଉତ୍ସାହିତ କରିବା ପାଇଁ ଓଡ଼ିଶା ସରକାର ଶନିବାର ସନ୍ଧ୍ୟା ୫ଟା୩୦ରେ "ବନ୍ଦେ ଉତ୍କଳ ଜନନୀ' ଗାନ କରିବାକୁ ନିଷ୍ପତ୍ତି ନେଇଛନ୍ତି । ଏହି ମହତ୍ କାର୍ଯ୍ୟରେ ସାମିଲ ହେବାକୁ ପୂର୍ବତଟ ରେଳପଥର ମହାପ୍ରବନ୍ଧକଙ୍କ ସମେତ ରାଜ୍ୟର ସମସ୍ତ ବିମାନବନ୍ଦରର ନିର୍ଦ୍ଦେଶକମାନଙ୍କୁ ଅନୁରୋଧ କରାଯାଇଛି ।ଏ ନେଇ ରାଜ୍ୟ ବାଣିଜ୍ୟ ଓ ପରିବହନ ବିଭାଗ ପକ୍ଷରୁ ଚିଠି ମାଧ୍ୟମରେ ଅନୁରୋଧ କରାଯାଇଛି । ଚିଠି ପାଇବା ପରେ ପୂର୍ବତଟ ରେଳପଥ ପକ୍ଷରୁ ଏହି ରାଜ୍ୟ ସଂଗୀତ "ବନ୍ଦେ ଉତ୍କଳ ଜନନୀ'କୁ ସମସ୍ତ ଗୁରୁତ୍ୱପୂର୍ଣ୍ଣ ରେଳ ଷ୍ଟେସନ, ରେଳ କାର୍ଯ୍ୟାଳୟ, ରେଳ କଲୋନୀରେ ଗାନ କରିବାକୁ ନିଷ୍ପତ୍ତି ନିଆଯାଇଛି । ଯେଉଁଠାରେ ପବ୍ଲିକ୍ ଆଡ୍ରେସ୍ ପଦ୍ଧତି ଉପଲବ୍ଧ ସେଠାରେ ଗାନ କରିବାକୁ ନିଷ୍ପତ୍ତି ନିଆଯାଇଛି ବୋଲି ପୂର୍ବତଟ ରେଳପଥର ବରିଷ୍ଠ ଅଧିକାରୀ ସୂଚନା ଦେଇଛନ୍ତି । ସେହିପରି ବିଜୁ ପଟ୍ଟନାୟକ ଅନ୍ତର୍ଜାତୀୟ ବିମାନବନ୍ଦରରେ ବି ୫ଟା୩୦ରେ "ବନ୍ଦେ ଉତ୍କଳ ଜନନୀ' ଗୀତ ବାଜିବ । ପରିବହନ ବିଭାଗର ଚିଠି ପାଇବା ପରେ ଏଭଳି ପଦକ୍ଷେପ ନିଆଯାଇଛି ବୋଲି ବିମାନ ବନ୍ଦର ନିର୍ଦ୍ଦେଶକ ସୂଚନା ଦେଇଛନ୍ତି । ଅନୁରୁପ ଭାବେ ପଦକ୍ଷେପ ନେବାକୁ କଟକସ୍ଥିତ ଓଡ଼ିଶା ରାଜ୍ୟ ପରିବହନ ଆୟୋଗ, ଓଏସ୍ଆର୍ଟିସିର ମୁଖ୍ୟ ପରିଚାଳନା ନିର୍ଦ୍ଦେଶକ, ଝାରସୁଗୁଡ଼ାସ୍ଥିତ ବୀର ସୁରେନ୍ଦ୍ର ସାଏ ବିମାନବନ୍ଦରର ନିର୍ଦ୍ଦେଶକଙ୍କୁ ମଧ୍ୟ ଅନୁରୋଧ କରାଯାଇଛି । ପରିବହନ ବିଭାଗର ଯୁଗ୍ମ ସଚିବ ଦେବଦତ୍ତ ସୁରଞ୍ଜିତା ଜେନା ଆଜି ଲେଖିଥିବା ଚିଠିରେ ଏଭଳି ଅନୁରୋଧ କରିଛନ୍ତି ।କ୍ୟାପିଟାଲ ହାଇସ୍କୁଲ ପରିସର ରେ ୨୦୦ ରୁ ଉର୍ଧ୍ଵ ଶିକ୍ଷକ ସାମିଲ ହୋଇ ବନ୍ଦେ ଟକଲ ଜନନୀ ଗାଁ କରିବେ । ଓଡିଶା ବାସୀ ଯିଏ ଯେଉଁଠି ଅଛନ୍ତି ଏହି ଗାଁ କରିବାକୁ ମୁଖ୍ୟମନ୍ତ୍ରୀ ଆହ୍ୱାନ କରିବା ପରେ ବିଭିନ୍ନ ମହଲରେ ଏହା ସଫଳ କରିବାକୁ ପ୍ରୟାସ ଚାଲିଛି।
30/05/2020