ଭାରତୀୟ ଲୋକସେବା ଆୟୋଗ ଦ୍ୱାରା ପରିଚାଳିତ ୨୦୧୯ ସିଭିଲ୍ ସର୍ଭିସ୍ ପରୀକ୍ଷା ଫଳ ଅଗଷ୍ଟ ୪ ତାରିଖରେ ପ୍ରକାଶିତ ହୋଇଛି । ଏଥିରେ ଦିଲ୍ଲୀର ଏକ ସଂସ୍ଥାରୁ ବିଦ୍ୟାର୍ଥୀମାନେ କମାଲ ଦେଖାଇଛନ୍ତି । ସଂସ୍ଥାର ୩୦ଜଣ ବିଦ୍ୟାର୍ଥୀ କୃତକାର୍ଯ୍ୟ ହୋଇଥିବା ଖବର ସାମ୍ନାକୁ ଆସିବା ପରେ ବିଭିନ୍ନ ମହଲରୁ ପ୍ରଶଂସାର ସୁଅ ଛୁଟିବାରେ ଲାଗିଛି । ଗୋଟିଏ ବର୍ଷରେ ଗୋଟିଏ କୋଚିଙ୍ଗ ସଂସ୍ଥାରୁ ଏତେ ସଂଖ୍ୟକ ବିଦ୍ୟାର୍ଥୀ ଦେଶର ସବୁଠୁ ବଡ଼ ଓ କଠିନ ପ୍ରତିଦ୍ୱନ୍ଦୀତାମୂଳକ ସିଭିଲ୍ ସର୍ଭିସ ପରୀକ୍ଷାରେ କୃତକାର୍ଯ୍ୟ ହେବାର ଇୟେ ହେଉଛି ଏକ ବିରଳ ଦୃଷ୍ଟାନ୍ତ । ସଫଳ କ୍ୟାରିୟର ଗଢୁଛି ଏହି ସଂସ୍ଥା : ଜାମିଆ ମିଲିଆ ଇସ୍ଲାମିଆର ରେସିଡ଼େନ୍ସିଆଲ ଏକାଡ଼େମୀ (ଆରସିଏ) ଉଚ୍ଚ କୋଟିର ତାଲିମ ଓ କୋଚିଂ ମାଧ୍ୟମରେ ଶହ ଶହ ଯୁବକଙ୍କ ଇପ୍ସିତ ଲକ୍ଷ୍ୟ ହାସଲରେ ସହାୟକ ହୋଇଛି । ୨୦୧୯ ବର୍ଷରେ ଆରସିଏର ମାର୍ଗଦର୍ଶନ ଓ ପାଠ୍ୟଦାନର ସହାୟତା ନେଇ ୩୦ଜଣ ଛାତ୍ରଛାତ୍ରୀ ଲୋକସେବା ଆୟୋଗର ସିଭିଲ୍ ସର୍ଭିସ ପରୀକ୍ଷାରେ ସଫଳତା ପାଇଛନ୍ତି । ଏହି ୩୦ଜଣ ବିଦ୍ୟାର୍ଥୀଙ୍କ ମଧ୍ୟରୁ ୨୫ଜଣ ଆରସିଏରେ ଆବାସିକ ସୁବିଧା ନେଇ ରହି ପରୀକ୍ଷା ପାଇଁ ପ୍ରସ୍ତୁତ ହେଉଥିବା ବେଳେ ଆଉ ୫ଜଣ ବିଦ୍ୟାର୍ଥୀ ଏକାଡ଼େମୀର ମକ୍ ସାକ୍ଷାତ୍କାର ଗୁଡ଼ିକରେ ଭାଗ ନେଇ ନିଜର ସାମର୍ଥ୍ୟ ଓ ଦକ୍ଷତା ବୃଦ୍ଧି କରିଥିଲେ ଓ ଦେଶର ସବୁଠୁ ବଡ଼ ପରୀକ୍ଷାରେ କୃତକାର୍ଯ୍ୟ ହୋଇପାରିଥିଲେ ।
ପବ୍ଲିକ କୋଚିଙ୍ଗରେ ପାଠ ପଢି ସଫଳତା ପାଇବା କ୍ଷେତ୍ରରେ ଏହି ଅନୁଷ୍ଠାନ ଏକ ବଡ଼ ଉପଲବ୍ଧି । ୩୦ଜଣଙ୍କ ମଧ୍ୟୁ ୬ଜଣ ଆଇଏଏସ୍, ୮ଜଣ ଆଇପିଏସ୍ ଏବଂ ଅନ୍ୟମାନେ ନିଜ ନିଜ ର୍ୟାଙ୍କ ଏବଂ ପସନ୍ଦ ଅନୁଯାୟୀ ଆଇଆରଏସ୍, ଅଡ଼ିଟ୍ ଆଣ୍ଡ ଆକାଉଣ୍ଟାଣ୍ଟ ସର୍ଭିସ୍, ଆଇଆରଟିଏସ୍ ଏବଂ ଗ୍ରୁପ୍-ଏର ଆନୁସଙ୍ଗିକ ସେବା କ୍ଷେତ୍ରରେ ଯୋଗ ଦେବାକୁ ପ୍ରସ୍ତୁତ ହେଉଛନ୍ତି । ଚଳିତ ଥର ୟୁପିଏସ୍ସି କ୍ଲିୟର କରିଥିବା ଏହି ଏକାଡ଼େମୀର ୩୦ ବିଦ୍ୟାର୍ଥୀଙ୍କ ମଧ୍ୟରେ ୬ଜଣ ଝିଅ ଥିବା ଜଣାଯାଇଛି । ଏକାଡ଼େମୀର ବିଭିନ୍ନ ଇଣ୍ଟରନାଲ ପରୀକ୍ଷାଗୁଡ଼ିକରେ ଖୁବ୍ ଭଲ ମାର୍କ ରଖି ଆସୁଥିବା ରୁଚି ବିନ୍ଦାଲ ୩୯ତମ ର୍ୟାଙ୍କ ପାଇଥିବା ଜଣାଯାଇଛି । ସିଭିଲ୍ ସର୍ଭିସ୍ ପରୀକ୍ଷା ପାଇଁ ଆଶାୟୀ ପ୍ରାର୍ଥୀମାନଙ୍କୁ ଜାମିଆ ମିଲିଆ ଇସ୍ଲାମିଆର ରେସିଡ଼େନ୍ସିଆଲ କୋଚିଙ୍ଗ ଏକାଡ଼େମୀ ମାଗଣାରେ ମାଗଣାରେ କୋଚିଙ୍ଗ ଉପଲବ୍ଧ କରାଇଥାଏ । ମହିଳା ଅନୁସୂଚିତ ଜାତି ଓ ଜନଜାତି ଓ ସଂଖ୍ୟାଲଘୁ ବିଦ୍ୟାର୍ଥୀମାନଙ୍କୁ ଏଭଳି ମାଗଣା କୋଚିଙ୍ଗ ପ୍ରଦାନ ବ୍ୟବସ୍ଥା ବିଗତ ଏକ ଦଶନ୍ଧି ବ୍ୟାପୀ ଚାଲିଛି । ୨୦୧୯ ୟୁପିଏସ୍ସି ବ୍ୟକ୍ତିଗତ ସାକ୍ଷାତକାରରେ ଆରସିଏର ୬୦ଜଣ ଛାତ୍ର ମନୋନୀତ ହୋଇଥିଲେ । ସେମାନଙ୍କ ମଧ୍ୟରୁ ୨୫ଜଣ ଆବାସିକ ଛାତ୍ର ଓ ୫ଜଣ ଅଣ ଆବାସିକ ମୋଟ ୩୦ଜଣ ଏଥିରେ ଚୂଡ଼ାନ୍ତ ମନୋନୀତ ହୋଇପାରିଛନ୍ତି । ରୁଚି ବିନ୍ଦାଲ ୩୯ ର୍ୟାଙ୍କରେ ଥିବାବେଳେ ଜାକିର ଶେଖ-୧୫୩, ନନ ଜୟ ଅଲ୍ଲୀ ଆକ୍ରାମ-୧୮୮, ଫରମାନ ଅହମ୍ମଦ-୨୫୮, ସୁଫିୟା ଅହମ୍ମଦ-୩୦୩, ନଦିୟାଚେଗ-୩୫୦, ଗରିମା ଦହିୟା-୪୫୯, ରାଜେନ୍ଦ୍ର ଚୌଧୁରୀ-୫୫୪, ଅରଚିନ୍ଦ ମୀନା-୬୪୬, ପ୍ରତିମା-୭୫୭, ଧୀମନ ଚକମା-୭୨୨ ର୍ୟାଙ୍କ ହାସଲ କରିଛନ୍ତି ।
ଜେଏମ୍ଏମ୍ର ଭାଇସ୍ ଚାନ୍ସେଲର ପ୍ରଫେସର ନଦମା ଅଖତାର କହନ୍ତି ଏହି ଅନୁଷ୍ଠାନ ବିଦ୍ୟାର୍ଥୀମାନଙ୍କ ଇପ୍ସିତ ଲକ୍ଷ୍ୟ ପ୍ରାପ୍ତି ଦିଗରେ ବର୍ଷ ବର୍ଷର ପ୍ରୟାସ ଜାରି ରଖି ସଫଳତା ପାଇଛି । ଚଳିତଥର ୩୯ ର୍ୟାଙ୍କ ପାଇଥିବା ରୁଚି ବିନ୍ଦାଲ କହନ୍ତି, ପିଲାଟି ଦିନରୁ ମୋ ବାପା ଯେଉଁ ସ୍ୱପ୍ନ ଦେଖିଥିଲେ ତାହା ମୋର ଅନୁଷ୍ଠାନ ପାଇଁ ସଫଳ ହେଲା । ରାଜସ୍ଥାନରେ ଜନ୍ମିତ ରୁଚିଙ୍କ ପିତା ଜଣେ ମାର୍ବଲ ବ୍ୟବସାୟୀ । ବିଗତ ୫ବର୍ଷ ଧରି ସେ ଦିଲ୍ଲୀରେ ରହୁଥିଲେ । ତାଙ୍କର ଗୋଟିଏ ସାନଭାଇ ଓ ସାନ ଭଉଣୀ ଅଛନ୍ତି । ମହିଳା ସଶକ୍ତିକରଣ ଓ ତୃତୀୟ ଲିଙ୍ଗକୁ ନ୍ୟାୟ ପ୍ରଦାନ ଦିଗରେ ସେ କାମ କରିବେ ବୋଲି ସେ କହନ୍ତି । ରୁଚି ଆଗରୁ ୫ଥର ଏହି ପରୀକ୍ଷା ଦେଇ ଅସଫଳ ହୋଇଛନ୍ତି, କିନ୍ତୁ ଭାଙ୍ଗି ପଡ଼ିନାହାଁନ୍ତି । ମାଲବ୍ୟ ନଗରରେ ରହି ଆରସିଏରେ କୋଚିଙ୍ଗ ନେଇ ସେ ଏବେ ଦେଶର ୩୯ ର୍ୟାଙ୍କ ପାଇବା ବହୁତ ଖୁସିର କଥା ବୋଲି କହିଛନ୍ତି । ଗତ ୨୦୧୮ ବର୍ଷରେ ଏହି ଏକାଡ଼େମୀର ଛାତ୍ର ଜୁନେଦ ଅହମ୍ମଦ ଦେଶରେ ତୃତୀୟ ର୍ୟାଙ୍କ ପାଇଥିଲେ ।
୧୦ ବର୍ଷରେ ୨୩୦ ଆଇଏଏସ୍ : ୨୦୧୦-୧୧ ବର୍ଷରୁ ୨୦୧୯ ୧୦ ବର୍ଷ ମଧ୍ୟରେ ଆରସିଏ ୨୩୦ ସିଭିଲ୍ ସର୍ଭିସ୍ଧାରୀଙ୍କୁ ସୃଷ୍ଟି କରିଛି । ଯେଉଁ ୨୩୦ ଜଣ ଛାତ୍ରଙ୍କୁ ଏହି ଅନୁଷ୍ଠାନ ୟୁପିଏସ୍ସିରେ ସଫଳତା ଆଣି ଦେଲା ଏବଂ ସେମାନେ ସମସ୍ତେ ଆଇଏଏସ୍, ଆଇଏଫ୍ଏସ୍, ଆଇପିଏସ୍ ଆଦି ପଦବୀ ସମ୍ଭାଳିଛନ୍ତି । ଅନ୍ୟ ୨୮୫ ଜଣ ମୋଧାବୀ ଛାତ୍ର ଏଠାରୁ କୋଚିଙ୍ଗ ନେଇ ଆରବିଆଇ (ଗ୍ରେଡ୍-୧) ଏପିଏଫ୍, ବ୍ୟାଙ୍କ ପିଓ, ପିସିଏସ୍ ଭଳି ବହୁତ ବଡ଼ ପଦବୀରେ ଅବସ୍ଥାପିତ ହୋଇଛନ୍ତି । ଚଳିତବର୍ଷ ୧୪ଜଣ ଛାତ୍ର ଜାମ୍ମୁ କାଶ୍ମୀର ପିସିଏସ୍ରେ, ୨୪ଜଣ ୟୁପିଏସ୍ସିରେ ନିଯୁକ୍ତି ପାଇପାରିଛନ୍ତି । ୨୦୧୦ରେ ସ୍ଥାପିତ ଏହି ସଂସ୍ଥା ୟୁପିଏସ୍ସି ଆଶାୟୀମାନଙ୍କ ପାଇଁ ଆବାସିକ ଶିକ୍ଷା ଦାନ, ୫୦୦ ଘଣ୍ଟାର କ୍ଲାସ, ଦଳଗତ ଆଲୋଚନା, ମକ୍ ସାକ୍ଷାତ୍କାର, ଟେଷ୍ଟ ସିରିଜ୍ର ଆୟୋଜନ ଜରିଆରେ ପ୍ରସ୍ତୁତି କରାଇଥାଏ । ଉତ୍ତର ପ୍ରଦେଶ ପବ୍ଲିକ ସର୍ଭିସ୍ କମିଶନ ପରୀକ୍ଷାରେ ଏବେ ଏହି ସଂସ୍ଥାର ୨୪ଜଣ ଛାତ୍ର ସଫଳତା ପାଇଥିବା ଆଉ ଏକ ସଦ୍ୟ ଉଦାହରଣ ।
07/08/2020