ଛତିଶଗଡ଼ ଅମ୍ବିକାପୁର ସରଗୁଜାର ଭିନ୍ନ ଭିନ୍ନ ଇଲାକାରେ ଖୋଲା ବିଚରଣ କରୁଥିବା ହାତୀମାନଙ୍କ ଦଳ ଏବେ ଗାଁ ଠାରୁ ଯଦି ୫୦୦ମିଟର ପାଖାପାଖି ଅଂଚଳକୁ ଚାଲିଆସନ୍ତି ତେବେ ଗାଁରେ ସାଇରନ ବାଜି ଉଠିବ । ଲୋକେ ନିଜ ଜୀବନ ଓ ସମ୍ପତ୍ତିର ସୁରକ୍ଷା ପାଇଁ ସଚେତିତ ହୋଇଯିବେ ।
ଆଫ୍ରିକାର ଏହି କୌଶଳକୁ ଏବେ ମଧ୍ୟପ୍ରଦେଶ ଓ ଛତିଶଗଡ଼ର ବନବିଭାଗ ଗ୍ରହଣ କରିନେଇଛି । ଯେଉଁଥିରେ ତିନୋଟି ଦଳର ଗୋଟିଏ ଗୋଟିଏ ହାତୀଙ୍କ ଦେହରେ ସାଟେଲାଇଟ କଲରକୁ ପ୍ରାକ୍ ସତର୍କ ସୂଚନା ଉପକରଣ ସହ ଯୋଡ଼ି ଦିଆଯାଇଛି । ଏବଂ ଏହାର ସଫଳ ପ୍ରୟୋଗ ବି ହୋଇସାରିଛି । କଲରରେ ଡ଼ିଭାଇସକୁ ଲିଙ୍କ୍ କରିବା ପାଇଁ ଆଫ୍ରିକାରୁ ଆସିଥିବା ବୈଜ୍ଞାନିକଙ୍କ ଉପସ୍ଥିତିରେ ଏହାର ସଫଳ ବ୍ୟବହାର କରାଯାଇଛି ।
ସରଗୁଜା ବନ ବିଭାଗର ଜଣେ ଅଧିକାରୀ କହିଛନ୍ତି ଯେ ହାତୀ-ମଣିଷ ସଂଘର୍ଷକୁ ରୋକିବା ପାଇଁ ବନବିଭାଗ ବ୍ୟାପକ ପ୍ରୟାସ ଜାରୀ ରଖିଛି । ଗତ କିଛି ଦିନ ତଳେ ଜନବସତି ଗୁଡ଼ିକୁ ପଶି ଆସୁଥିବା ତିନୋଟି ହାତୀ ଦଳର ମୁଖିଆ ହାତୀକୁ ଚିହ୍ନଟ କରି ତାରି ଦେହରେ ସାଟେଲାଇଟ କଲର ଆଇଡ଼ି ଲଗାଯାଇଛି । ଏହା ଦ୍ୱାରା ହାତୀଙ୍କ ଚଳପ୍ରଚଳ ବାବଦରେ ଜଣାପଡ଼ିଯାଇଛି । ସାଟେଲାଇଟ କଲର ଆଇଡ଼ିକୁ ପ୍ରାକ୍ ସତର୍କତା ଉପକରଣ ସହ ଯୋଡ଼ିବା କାମ ଆରମ୍ଭ ହୋଇଛି ।
13/12/2018