ରଥଯାତ୍ରା ପାଇଁ ପୁରୀ ଜିଲ୍ଲାର ପ୍ରବେଶ ପଥକୁ ରାଜ୍ୟ ସରକାର ସିଲ୍ କରିଦେବା ଯୋଗୁଁ ୨୩ତାରିଖ ଅର୍ଥାତ୍ ଶ୍ରୀ ଗୁଣ୍ଡିଚା ଦିନ ଭୁବନେଶ୍ବରରୁ ପିପିଲିକୁ ମୋ ବସ୍ ସେବା ଆରମ୍ଭ ହୋଇପାରିଲାନି। ତେଣୁ ଗୁରୁବାର ଏହି ରୁଟ୍ରେ ମୋ ବସ୍ ସେବା ଆରମ୍ଭ ହୋଇଛି । ରୁଟ୍ ନଂ ୩୩ରେ ମୋ ବସ୍ ଭୁବନେଶ୍ବର ରେଳ ଷ୍ଟେସନରୁ ବାହାରି ପିପିଲି ହୋଇ ଦାଣ୍ଡମୁକୁନ୍ଦପୁର ପର୍ଯ୍ୟନ୍ତ ଯାଇଛି । ପ୍ରତି ୪୦ ମିନିଟରେ ଏହି ରୁଟ୍ରେ ଗୋଟିଏ ବସ୍ ଚଳାଚଳ କରିବ। ସକାଳ ୭ରୁ ସଂଧ୍ୟା ୭ ପର୍ଯ୍ୟନ୍ତ ବସ୍ ଚଳାଚଳ କରିବ। ଗୁରୁବାର ପ୍ରଥମ ବସ୍ ଭୁବନେଶ୍ବର ରେଳ ଷ୍ଟେସନରୁ ସକାଳ ୭ଟା ୧୫ ମିନିଟ୍ରେ ବାହାରି ଥିଲା ବେଳେ ପିପିଲରୁ ପ୍ରଥମ ବସ୍ ସକାଳ ୮ଟା ୩୦ରେ ବାହାରିଛି । କ୍ରୁଟ୍ ପକ୍ଷରୁ କୁହାଯାଇଛି ଯେ, ଏହି ରୁଟ୍ରେ ଏବେ ୪ଟି ବସ୍ ପ୍ରତ୍ୟେକ ଦିନ ୩୩ଟି ବସ୍ଷ୍ଟପ୍ ମଧ୍ୟରେ ଯାତ୍ରା କରିବ। ପ୍ରଥମ ବସ୍ ଭୁବନେଶ୍ବର ରେଳ ଷ୍ଟେସନରୁ ସକାଳ ୭ଟାରେ ବାହାରିବ। ଶେଷ ବସ୍ ସଂଧ୍ୟା ୫ଟା ୫୦ରେ ପିପିଲି ଅଭିମୁଖେ ଯିବ। ସେହିପରି ପିପିଲିରୁ ପ୍ରତିଦିନ ସକାଳ ୭ଟା ୪୫ରେ ବସ୍ ବାହାରିବ ଏବଂ ଶେଷ ବସ୍ ସଂଧ୍ୟା ୭ଟାରେ ବାହାରିବ। ଏହି ରୁଟ୍ରେ ବସ୍ ଟିକେଟ ମୂଲ୍ୟ ୩୦ଟଙ୍କା ରହିବ। ଏବେ ଯାତ୍ରୀମାନେ ଟିକେଟ୍ ମୂଲ୍ୟ ଅନୁଯାୟୀ ଖୁଚୁରା ଦେବା ସହ କ୍ୟୁଆର୍ କୋଡ୍ ମାଧ୍ୟମରେ ଟିକେଟ୍ କରିବାକୁ କ୍ରୁଟ୍ ପକ୍ଷରୁ କୁହାଯାଇଛି। ଏବେ କରୋନା କଟକଣା ଥିବାରୁ ବିନା ମାସ୍କରେ କୌଣସି ଲୋକ ଯାତ୍ରା ନକରିବାକୁ କୁହାଯାଇଛି। ଏହାସହ ବସ୍ରେ କେହି ଛିଡ଼ା ହୋଇ ଯାତ୍ରା କରିପାରିବେନି ବୋଲି କ୍ରୁଟ୍ ପକ୍ଷରୁ ନିୟମ ହୋଇଛି।
25/06/2020