ସାମାଜିକ ପ୍ରସଙ୍ଗକୁ ଚିତ୍ରରେ ପରିସ୍ପୁଟ କରାଇ ଜନ ସଚେତନତା ଦିଗରେ ଅଙ୍ଗକାରବଦ୍ଧ ଥିବା ଚିତ୍ରଶିକ୍ଷା ଅନୁଷ୍ଠାନ ‘ଚିତ୍ରଶାଳା’ ପକ୍ଷରୁ ଆଲୋକର ପର୍ବ ଦୀପାବଳୀର ଅବ୍ୟବହିତ ପୂର୍ବରୁ ଏକ ନିଆରା ଚିତ୍ର ଅଙ୍କନ ଓ ପ୍ରଦର୍ଶନୀ କାର୍ଯ୍ୟକ୍ରମ ଆୟୋଜିତ ହୋଇଯାଇଛି । କୁନି ଚିତ୍ରଶିଳ୍ପୀମାନେ ଆଲୋକର ପର୍ବ ଦୀପାବଳୀକୁ ପ୍ରଦୂଷଣ ଏବଂ ବିପଦମୁକ୍ତ କରିବା ପାଇଁ ଚିତ୍ରରେ ସବୁଜ ଦୀପାବଳୀ ପାଳନର ବାର୍ତ୍ତା ଦେଇଛନ୍ତି ।
ଭୁବନେଶ୍ୱରସ୍ଥିତ ଇନ୍ଦ୍ରପସ୍ଥ କଲୋନୀ ଫେଜ୍-୨୦ରେ ଥିବା ଅନୁଷ୍ଠାନ ପରିସରରେ ବିଦ୍ୟାର୍ଥୀମାନେ ଇକୋ-ଫ୍ରେଣ୍ଡଲି୍ ଦୀପାବଳୀର ଉପାଦେୟତାକୁ ଚିତ୍ରରେ ଫୁଟାଇଛନ୍ତି । ଅନୁଷ୍ଠାନର ପ୍ରତିଷ୍ଠାତା ଅନସୂୟା ସାହୁ ବିଦ୍ୟାର୍ଥିଙ୍କ ‘ସେ ନୋ ଟୁ କ୍ରାକର୍ସ’କୁ ସମର୍ଥନ କରି କହନ୍ତି ଦେଶରେ ୫୦ ପ୍ରତିଶତ ବାୟୁ ପ୍ରଦୂଷଣ ଦୀପାବଳୀ ସମୟରେ ହୋଇଥାଏ । ବାଣୁ ନିର୍ଗତ ଧୂଆଁରେ ସଲଫର ଡ଼ାଇଅକ୍ସାଇଡ଼, କାର୍ବନ ଡ଼ାଇଅକ୍ସାଇଡ଼ ଓ କାର୍ବନ ମନୋଅକ୍ସାଇଡ଼୍ ପରି ମାରତ୍ମକ ଗ୍ୟାସ ଶ୍ୱାସ ପରି ମାରାତ୍ମକ ରୋଗ ସୃଷ୍ଟି କରେ । ଶବ୍ଦ ପ୍ରଦୂଷଣର ଜ୍ଜାଳା ମଧ୍ୟ ଭୋଗିବାକୁ ପଡ଼ିଥାଏ । ଦୀପାବଳୀ ସମୟରେ କମ୍ ଶବ୍ଦ ଓ କମ୍ ଧୂଆଁ ହେଲା ଭଳି ବାଣ ବ୍ୟବହାର କରିବାକୁ ନେଇ ବିଦ୍ୟାର୍ଥିମାନେ ଚିତ୍ତାକର୍ଷକ ଚିତ୍ର ପ୍ରସ୍ତୁତ କରି ପ୍ରଦର୍ଶିତ କରାଇଥିଲେ । ଏହି କାର୍ଯ୍ୟକ୍ରମରେ ଧଉଳି ଚାରୁକଳା ମହାବିଦ୍ୟାଳୟର ଅଧ୍ୟକ୍ଷ ପଂଚାନନ ସାମଲ, ସାମାଜିକ କର୍ମୀ ସୁଶାନ୍ତ ସାହୁ, ମାନସ ବେଉରା ପ୍ରମୁଖ ଯୋଗଦେଇ କୁନି ଶିଳ୍ପୀଙ୍କ ଉଦ୍ୟମକୁ ପ୍ରଶଂସା କରିଥିଲେ ।
02/11/2018