ମଧ୍ୟପ୍ରଦେଶର ଦାମୋ ଅଂଚଳରେ ଘଟିଛି ଏକ ଅଶ୍ରୁଳ ଆଉ ରୋଚକ ଘଟଣା । ଗତ ନଭେମ୍ବର ମାସ ୨୦ ତାରିଖରେ ଦାମୋ ନିବାସୀ ମହେନ୍ଦ୍ର ଦିକ୍ଷିତଙ୍କ ୨୫ ବର୍ଷୀୟ ପୁଅ ଲକି ଦିକ୍ଷିତ ଘରୁ ବାଇକ ନେଇ ବାହାରକୁ ଯାଇଥିଲେ । କିନ୍ତୁ ସାଙ୍ଗରେ ନେଇନଥିଲେ ହେଲମେଟ୍ । ଆଉ ରାସ୍ତାରେ ଘଟିଥିଲା ଛାତିଥରା ସଡକ ଦୁର୍ଘଟଣା । ଯେଉଁଥିରେ ଚାଲିଯାଇଥିଲା ଲକିଙ୍କ ଜୀବନ । ଆଉ ଯେଉଁ କାରଣ ପାଇଁ ନିଜ ପୁଅର ଜୀବନ ଗଲା, ସେହି କାରଣରୁ ଯେମିତି ଆଉ କେହି ଜୀବନ ନ ହାରନ୍ତି, ସେନେଇ ସମାଜକୁ ସଚେତନତାର ଏକ ବଡ ବାର୍ତ୍ତା ଦେଇଛନ୍ତି ଲକିଙ୍କ ବାପା ମହେନ୍ଦ୍ର ଦିକ୍ଷିତ । ପୁଅର ଏକାଦଶାହ ଦିନ ଘରକୁ ଯେଉଁ ଅତିଥି ଆସିଥିଲେ, ସେମାନଙ୍କୁ ଉପହାର ସ୍ୱରୂପ ଗୋଟିଏ ଗୋଟିଏ ହେଲମେଟ୍ ବାଣ୍ଟିଛନ୍ତି ମହେନ୍ଦ୍ର । ମହେନ୍ଦ୍ର କହିଛନ୍ତି, ଟ୍ରାଫିକ ନିୟମ ଜନସାଧାରଣଙ୍କ ପାଇଁ ହୋଇଥିବାରୁ ସମସ୍ତେ ଟ୍ରାଫିକ ନିୟମକୁ ମାନି ଚଳିବା ଉଚିତ । ଯେଉଁ କାରଣ ପାଇଁ ତାଙ୍କ ପୁଅର ଜୀବନ ଗଲା, ସେଥିପାଇଁ ଆଉ କାହାର ଜୀବନ ନଯାଉ । ରାସ୍ତାରେ ଗଲାବେଳେ କେମିତି ସମସ୍ତେ ହେଲମେଟ୍ ପିନ୍ଧିବେ ସେନେଇ ସେ ଲୋକଙ୍କୁ ସଚେତନ କରାଉଥିବା କହିଛନ୍ତି ମହେନ୍ଦ୍ର । ତେବେ ଆମେ ମଧ୍ୟ ଆପଣଙ୍କୁ ଅନୁରୋଧ କରୁଛୁ, ରାସ୍ତାରେ ଗଲାବେଳେ ସବୁବେଳେ ଟ୍ରାଫିକ୍ ନିୟମକୁ ମାନି ଚଳନ୍ତୁ । ବାଇକରେ ହେଲମେଟ୍ ଓ କାରରେ ସିଟ୍ ବେଲ୍ଟ ପିନ୍ଧିବାକୁ ଜମା ବି ଭୁଲନ୍ତୁ ନାହିଁ । ନିଜେ ସଚେତନ ହେବା ସହ ଅନ୍ୟଙ୍କୁ ମଧ୍ୟ ସଚେତନ କରାନ୍ତୁ ।
04/12/2019