ବିବାହ ଉତ୍ସବ ସାଧାରଣତଃ ଭୋଜିଭାତ, ବନ୍ଧୁମିଳନ, ମଉଜମସ୍ତି ମଧ୍ୟରେ ଅତିବାହିତ କରିଥାନ୍ତି ଦମ୍ପତ୍ତି । ହେଲେ ଗତ ୧୪ ବର୍ଷ ଧରି ନିଆରା ଉପାୟରେ ବିବାହ ବାର୍ଷିକୀ ପାଳନ କରିଆସୁଛନ୍ତି ଭୀମଟାଙ୍ଗୀ ନିବାସୀ ଗୋପୀମୋହନ ଓ ତାଙ୍କ ଧର୍ମପତ୍ନୀ ଆଶାଲତା । ୨୦୦୫ ମସିହାରୁ କ୍ରମାଗତଭାବେ ଏହି ଦମ୍ପତ୍ତିଙ୍କ ବିବାହ ବାର୍ଷିକୀରେ ଭୋଜିଭାତ ସାଙ୍ଗକୁ ରକ୍ତଦାନ ଶିବିର ରେ ସାଙ୍ଗ, ସାଥୀମାନେ ସାମିଲ୍ ହୋଇ ରକ୍ତଦାନ କରିଥାନ୍ତି । ଏଥର ମଧ୍ୟ ଗତ ଗୁରୁବାର ନିଆରା କାର୍ଯ୍ୟକ୍ରମ ଦେଖିବାକୁ ମିଳିଛି ସ୍ମାର୍ଟନଗରୀ ରାଜଧାନୀ ଭୁବନେଶ୍ୱରର ଶିରିପୁରସ୍ଥିତ ଝାଡ଼େଶ୍ୱରୀ ମନ୍ଦିର ପରିସରରେ । ପ୍ରଥମେ ଘରର ମୁରବୀ ପିତା ମଦନ ମୋହନ ଆନୁଷ୍ଠାନିକ ରୂପେ ରକ୍ତଦାନ ଶିବିରକୁ ଉଦ୍ଘାଟନ କରିଥିଲେ । ନିଜର ୨୯ତମ ବିବାହ ବାର୍ଷିକୀରେ ଗୋପୀମୋହନ ନିଜେ ନିଜର ୧୮୯ତମ ରକ୍ତଦାନ କରିଥିଲେ । ସୂଚନାଯୋଗ୍ୟ ଅଦ୍ୟାବଧି ସେ ୧୭ଥର ପ୍ଲେଟଲେଟ୍ ଦାନ କରିସାରିଲେଣି । ସହରରେ ସେଞ୍ଚୁରିୟାନ ବ୍ଲଡ଼ ଡ଼ୋନର ଭାବେ ସେ ବେଶ୍ ଜଣାଶୁଣା । ଜାତୀୟତାର ମହାନ୍ ଚିନ୍ତାଧାରାରେ ସମସ୍ତଙ୍କୁ ସାମିଲ୍ କରାଇ ଥାଲାସେମିଆ, ଅସହାୟ ନିରାଶ୍ରୟ ରୋଗୀଙ୍କ ଉଦେଶ୍ୟରେ ରକ୍ତଦାନ କରିବା ହିଁ ମୂଳ ଲକ୍ଷ୍ୟ ବୋଲି ସେ କୁହନ୍ତି । କ୍ୟାପିଟାଲ ହସ୍ପିଟାଲ ପରିସରସ୍ଥିତ ରକ୍ତ ଭଣ୍ଡାର ର ଅଭିଜ୍ଞ ଟେକ୍ନିସିଆନ ଓ ନିର୍ଦେଶକ ଡା. ଦେବାଶିଷ ମିଶ୍ରଙ୍କ ତତ୍ତ୍ୱାବଧାନରେ ଶିବିରରୁ ୩୨ ୟୁନିଟ୍ ରକ୍ତ ସଂଗୃହୀତ କରାଯାଇଥିଲା । ଶିବିରକୁ ସାମାଜିକ କର୍ମୀ ସୁଶାନ୍ତ ସାହୁ, ବସନ୍ତ ସାମଲ, ପ୍ରତ୍ୟୁଷ କୁମାର ତାରଣିଆଁ, ନୀଳାୟମ ଷଡ଼ଙ୍ଗୀ ଓ ଅନ୍ୟମାନେ ପରି·ଳନାରେ ସହଯୋଗ କରିଥିଲେ ।
06/07/2019