ଏବେ ବିଦ୍ୟାଳୟ ଗୁଡିକରେ ଖରାଛୁଟି ଚାଲିଛି । ଖରାଛୁଟି ପରେ ପିଲାମାନେ ସ୍କୁଲକୁ ଆସିବା ବେଳକୁ ସ୍କୁଲ ଆଉ ନଥିବ । ବଦଳି ଯାଇଥିବ ସ୍କୁଲର ସ୍ଥାୟୀ ଠିକଣା । ୧୦ ରୁ କମ ପିଲା ନାମଲେଖାଇଥିବା ରାଜ୍ୟର ୯୬୬ ଟି ସ୍କୂଲ ଏବେ ବନ୍ଦ କରିବାକୁ ଘୋଷଣା କରିଛନ୍ତି ରାଜ୍ୟସରକାର । ପ୍ରତିବର୍ଷ ସରକାରୀ ସ୍କୂଲ ରେ ଏଭଳି ସ୍ଥିତି ଦେଖିବାକୁ ମିଳୁଛି । ବିଗତ ୧୦ ବର୍ଷ ମଧ୍ୟରେ ସରକାରୀ ଓ ଘରୋଇ ବିଦ୍ୟାଳୟ ମଧ୍ୟରେ ଯେଉଁଭଳି ପ୍ରତିଦ୍ବନ୍ଦିତା ଆରମ୍ଭ ହୋଇଛି ସେଥିରେ ପ୍ରତିବର୍ଷ ସରକାରୀ ବିଦ୍ୟାଳୟ ଗୁଡ଼ିକରେ ଛାତ୍ରଛାତ୍ରୀ ସଂଖ୍ୟା ଆଶ୍ଚର୍ଯ୍ୟଜନକ ଭାବେ ହ୍ରାସ ପାଇବାରେ ପରିଲିକ୍ଷିତ ହେଉଛି । ଏହାକୁ ଦୃଷ୍ଟିରେ ରଖି ସରକାର ଗତ ୨/୩ବର୍ଷ ହେଲା ୧୦ ରୁ କମ ଛାତ୍ରଛାତ୍ରୀ ଥିବା ବିଦ୍ୟାଳୟ ଗୁଡ଼ିକୁ ବନ୍ଦ କରିବାରେ ଲାଗିଛନ୍ତି। ଲକ୍ଷ ଲକ୍ଷ ଟଙ୍କା ବ୍ୟୟରେ ନିର୍ମିତ ବିଦ୍ୟାଳୟ ଗୁଡ଼ିକରେ ବର୍ତ୍ତମାନ ତାଲା ପଡ଼ିବ । ସରକାରୀ ବିଦ୍ୟାଳୟ ଗୁଡ଼ିକରେ ଛାତ୍ରଛାତ୍ରୀ ସଂଖ୍ୟା ହ୍ରାସ ପାଇବାରେ ଅନେକ କାରଣ ମଧ୍ୟରେ ଶିଶୁ ଶ୍ରେଣୀ ହେଉଛି ଏକ ପ୍ରମୁଖ କାରଣ । ସରକାରୀ ବିଦ୍ୟାଳୟରେ ଶିଶୁ ଶ୍ରେଣୀର ବ୍ୟବସ୍ଥା ନ ଥିବା ଯୋଗୁଁ ୩ ଓ ୪ ବର୍ଷ ବୟସର ଶିଶୁମାନଙ୍କୁ ଘରୋଇ ବିଦ୍ୟାଳୟରେ ନାମ ଲେଖାଇବା ପାଇଁ ଅଭିଭାବକମାନେ ଆଗ୍ରହ ପ୍ରକାଶ କରୁଥିବା ଦେଖାଯାଉଛି । ରାଜ୍ୟ ସରକାର ଶିକ୍ଷା ସଂସ୍କାର ନାମରେ ଯେଉଁ  ୯୬୬ଟି ବିଦ୍ୟାଳୟକୁ ୧୦ରୁ କମ ଛାତ୍ରଛାତ୍ରୀଥିବା କାରଣରୁ ବନ୍ଦ କରିଦେବା ପାଇଁ ନିର୍ଦେଶ ଦେଇଛନ୍ତି , ସେଥିମଧ୍ୟରୁ ସର୍ବାଧିକ ରାୟଗଡ଼ା ଜିଲାର ୧୩୯ଟି ବିଦ୍ୟାଳୟ ବନ୍ଦ ହେବାକୁ ଯାଉଥିବା ବେଳେ ସୁନ୍ଦରଗଡ଼ ଜିଲାରେ ୪୪ଟି ବନ୍ଦ ହେବ । ଚଳିତ ବର୍ଷ ମାର୍ଚ୍ଚ ୩୧ ସୁଦ୍ଧା ବିଦ୍ୟାଳୟ ଗୁଡ଼ିକର ଛାତ୍ରଛାତ୍ରୀ ସ୍ଥିତିକୁ ଲକ୍ଷ୍ୟ କରି ଏଭଳି ନିଷ୍ପତ୍ତି ନିଆଯାଇଥିବା ଜଣାପଡ଼ିଛି । ଗ୍ରୀଷ୍ମ ଅବକାଶ ପରେ ଏସବୁ ବିଦ୍ୟାଳୟ ଗୁଡ଼ିକ ଆଉ ଖୋଲାଯିବ ନାହିଁ ଏବଂ ସେଥିରେ ଅଧ୍ୟୟନ କରୁଥିବା ଛାତ୍ରଛାତ୍ରୀମାନଙ୍କୁ ନିକଟସ୍ଥ ବିଦ୍ୟାଳୟରେ ସାମିଲ କରାଯିବ ।