ଗୁଜୁରାଟ ର ସୁରଟକୁ ମିନି ଓଡିଶା କୁହାଯାଏ । ଏଠାରେ ଗଢି ଉଠିଥିବା ଶତାଧିକ କପଡାଶିଳ୍ପ ପ୍ରବାସୀ ଓଡ଼ିଆଙ୍କୁ ଜୀବିକା ଦେଇଥାଏ। ଲକ୍ଷ ଲକ୍ଷ ଓଡ଼ିଆ ବିଗତ ୪ ଦଶନ୍ଧି ରୁ ଅଧିକ ସମୟ ଧରି ସୁରଟ ରେ ଦାନା ପାଣି ର ଯୋଗାଡ଼ ରେ ଲାଗିଛନ୍ତି।  କିନ୍ତୁ ସୁରଟ ଉପରେ ଏବେ ଆର୍ଥିକ ମାନ୍ଦାବସ୍ଥାର ପ୍ରଭାବ ଦେଖିବାକୁ ମିଳିଲାଣି।ଦେଶର  ଏକ ତୃତୀୟାଂଶ କପା ଉତ୍ପାଦନ ବନ୍ଦ ହେବ ପରେ ସୁରଟ ର କପଡା ଶିଳ୍ପ ଉପରେ ତାର ପ୍ରଭାବ ପଡିଛି । ଯେଉଁ ସବୁ କପା ଶିଳ୍ପ ଚାଲୁରହିଛି ବହୁ କ୍ଷତିର ସାମ୍ନା କରିବାକୁ ପଡୁଛି। ଉତ୍ତର ଭାରତ ଟେକ୍ସଟାଇଲ ମିଲସ ଆସୋସିଏସନର କହିବା ମୁତାବକ କେନ୍ଦ୍ରର ଜିଏସଟି ଓ ଅନ୍ୟ କିଛି କାରଣ ଯୋଗୁଁ ଏପ୍ରିଲ-ଜୁନ ସୁଦ୍ଧା ଉତ୍ପାଦନ ହାର ୫୦ ପ୍ରତିଶତ କମିଯାଇଛି । ସ୍ଥିତି ଏମିତି ହୋଇଛି ଯେ ତୁଳା କିଣିବାକୁ କିଛି ମିଲ ମାଲିକଙ୍କ ପାଖରେ ଅର୍ଥ ମଧ୍ୟ ନାହିଁ । ଏଠାରେ ସୂଚନା ଥାଉ କି ଭାରତୀୟ ଟେକ୍ସଟାଇଲ ଶିଳ୍ପରେ ପ୍ରତ୍ୟକ୍ଷ ଓ ପରୋକ୍ଷ ଭାବରେ ପ୍ରାୟ ୧୦ କୋଟି ଲୋକଙ୍କୁ ରୋଜଗାର ମିଳୁଛି। କିନ୍ତୁ ସ୍ଥିତି ଯଦି ଏଭଳି ଲାଗିରହେ ତେବେ ବହୁ ସଂଖ୍ୟାରେ ଲୋକ ନିଜ ଚାକିରି ହରାଇବେ।  ସେହିପରି ଶ୍ରୀଲଙ୍କା, ବାଂଲାଦେଶ ଓ ଇଣ୍ଡୋନେସିଆ ଭଳି ଦେଶରୁ କମ ମୂଲ୍ୟରେ କପଡା ଆସୁଥିବାରୁ ଦେଶର ପ୍ରସ୍ତୁତ ହେଉଥିବା କପଡାର ଚାହିଦା କମିବାରେ ଲାଗିଛି।ଆର୍ଥିକ ମାନ୍ଦାବସ୍ଥା ସୁରଟରେ ଥିବା ଓଡ଼ିଆଙ୍କ ଓଠରୁ ହସ ଲିଭାଇ ଦେବନି ତ ! ତାହା ହିଁ ଏବେ ବଡ ପ୍ରଶ୍ନ |