ଓଡିଶା ଉପକୂଳରେ ଫନି ପହଞ୍ଚିବା ପୂର୍ବରୁ ଗୁରୁବାର ସନ୍ଧ୍ୟା ସୁଦ୍ଧା ୮ ଲକ୍ଷ ଲୋକଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର ପାଇଁ ପ୍ରକ୍ରିୟା ଆରମ୍ଭ ହୋଇଛି । ମହିଳା ,ଶିଶୁ ଓ ଦିବ୍ୟାଙ୍ଗଙ୍କୁ ପ୍ରଥମେ ସ୍ଥାନାନ୍ତର କରାଯିବ ଓ ଏହାପରେ ଅନ୍ୟମାନଙ୍କୁ ସୁରକ୍ଷିତ ସ୍ଥାନକୁ ଅଣାଯିବ। ଅତୀତରେ ଓଡ଼ିଶାରେ ଏତେ ସଂଖ୍ୟକ ଲୋକଙ୍କୁ ସ୍ଥାନାନ୍ତର କରାଯାଇ ନାହିଁ। ଏହା ହେବ ଓଡିଶାର ସବୁଠୁ ବଡ ସ୍ଥାନାନ୍ତରଣ। ଆଶ୍ରୟସ୍ଥଳୀରେ ରନ୍ଧାଖାଦ୍ୟ ଯୋଗାଇଦିଆଯିବ ।
ଆସନ୍ତା କାଲି ୩ ତାରିଖରେ ପୁରୀ ଉପକୂଳ ଛୁଇଁବାପରେ ଭୟଙ୍କର ରୂପ ଧାରଣ କରିବ ବାତ୍ୟା ଫନି । ବାତ୍ୟା ଓଡିଶା ଉପକୂଳ ଆଡକୁ ଯେତିକି ମାଡି ଆସୁଛି ଜନସାଧାରଣଙ୍କ ମନରେ ଭୟ ସେତିକି ବଢିବାରେ ଲାଗିଛି । ୩ ତାରିଖ ଅପରାହ୍ନରେ କୁଳ ଛୁଇଁବା ପୂର୍ବରୁ ପ୍ରଶାସନ ଅରେଞ୍ଜ ,ୟେଲୋ,ଓ ରେଡ ସତର୍କତା ଘୋଷଣା କରିଛନ୍ତି । ୧୨ ଜଣ ଆଇଏସ ଓ ୧୧ ଜଣ ଆଇପିଏସ ଅଧିକାରୀ ସମ୍ଭାବ୍ୟ ଜିଲାଗୁଡ଼ିକର ଦାୟିତ୍ୱରେ ଅଛନ୍ତି ।
ଆଜି ଗୁରୁବାର ଦିନ ୧୨ଟା ସୁଦ୍ଧା ପୁରୀ ଜିଲ୍ଲାରୁ ୧ ଲକ୍ଷ ଲୋକଙ୍କୁ ସ୍ଥାନାନ୍ତର କରାଯିବ। ଚିଲିକା ଭିତରେ ଥିବା ଓ ଏହାକୁ ଲାଗି ରହିଥିବା ସବୁ ଗାଁ ଲୋକଙ୍କୁ ପ୍ରଥମେ ସ୍ଥାନାନ୍ତର କରାଯିବ। ପୁରୀର ବିଭିନ୍ନ ହୋଟେଲର ତଳ ମହଲାରେ ଥିବା ପର୍ୟ୍ୟଟକଙ୍କୁ ମଧ୍ୟ ସ୍ଥାନାନ୍ତର ଆରମ୍ଭ ହୋଇଛି । ମୁହାଣ ନିକଟବର୍ତ୍ତୀ ଗାଁର ଲୋକଙ୍କୁ ସତର୍କ ରହିବାକୁ ପରାମର୍ଶ ଦିଆଯାଇଛି। ପ୍ରଶାସନ ସ୍ୱତନ୍ତ୍ର ବସ ଯୋଗେଁ ପଶ୍ଚିମବଙ୍ଗ ପର୍ୟ୍ୟଟକଙ୍କୁ ପଠାଇଛି । ପୁରୀରୁ ସ୍ୱତନ୍ତ୍ର ଟ୍ରେନ ର ମଧ୍ୟ ବ୍ୟବସ୍ଥା କରାଯାଇଛି ।
02/05/2019