ଏବେ ଭାରତର ଜନସଂଖ୍ୟା ୧୩୭ କୋଟି ରହିଥିବା ବେଳେ ଚୀନର ଜନସଂଖ୍ୟା ୧୪୩ କୋଟି ରହିଛି। କିନ୍ତୁ ଆଉ ୮ ବର୍ଷ ପରେ ଏ ସ୍ଥିତି ବଦଳି ଯିବ। ଚୀନ କୁ ଜନସଂଖ୍ୟା କ୍ଷେତ୍ର ରେ ପଛରେ ପକାଇ ଭାରତ ଆଗକୁ ଟପିଯିବ । ଆମ ଦେଶରେ ଏବେ ଦ୍ରୁତ ଗତିରେ ଜନସଂଖ୍ୟା ବଢ଼ିବାରେ ଲାଗିଛି । ଏମିତି ସ୍ଥିତି ସୃଷ୍ଟି ହେବାକୁ ଯାଉଛି ଯେ ଭାରତ ଅତି ଶୀଘ୍ର ଜନସଂଖ୍ୟାରେ ଚୀନକୁ ଟପିବ । ଆଗାମୀ ୮ ବର୍ଷ ମଧ୍ୟରେ ବିଶ୍ୱର ସର୍ବାଧିକ ଜନସଂଖ୍ୟା ରାଷ୍ଟ୍ରଭାବେ ଭାରତକୁ ମିଳିବ ନୁଆଁ ପରିଚୟ । ୨୦୫୦ ସୁଦ୍ଧା ଭାରତରେ ଜନସଂଖ୍ୟା ଆହୁରି ୨୭. ୩ କୋଟି ବଢ଼ିବ ବୋଲି ଆକଳନ କରିଛି ଜାତିସଂଘ । ଏଥି ସହିତ ଭାରତ ଚଳିତ ଶତାବ୍ଦୀ ଶେଷ ବେଳକୁ ବିଶ୍ୱର ସର୍ବବୃହତ ଜନସଂଖ୍ୟା ଥିବା ଦେଶ ହୋଇପାରେ । ଜାତିସଂଘର ଆର୍ଥିକ ଏବଂ ସାମାଜିକ ବ୍ୟାପାର ବିଭାଗର ପପୁଲେଶନ ଡିଭିଜନ ଦ୍ୱାରା ପ୍ରକାଶିତ 'ଦ ୱାର୍ଲଡ ପପୁଲେଶନ ପ୍ରସପେକ୍ଟସ ୨୦୧୯ ହାଇଲାଇଟ୍ସ'ରେ ଭାରତ, ନାଇଜେରିଆ, ପାକିସ୍ତାନ, କଂଗୋ, ଇଥିଓପିଆ, ତାଞ୍ଜାନିଆ, ଇଣ୍ଡୋନେସିଆ, ଇଜିପ୍ଟ ଓ ଆମେରିକା ଆଦି ୯ଟି ଦେଶରେ ଜନସଂଖ୍ୟା ବୃଦ୍ଧି ପାଇବ ବୋଲି ଆକଳନ କରାଯାଇଛି ।
18/06/2019