ପ୍ରାକୃତିକ ବିପର୍ଯ୍ୟୟରେ ୩ ବର୍ଷରେ ଯାଇଛି ୬ ହଜାରରୁ ଅଧିକ ଜୀବନ,ସର୍ପାଘାତ ରେ ମରିଛନ୍ତି ସର୍ବାଧିକ
ଗତ ୨୦୧୬-୧୭ ରୁ ୨୦୧୯-୨୦ ଜୁନ ୨୫ ସୁଦ୍ଧା ତିନି ବର୍ଷ ମଧ୍ୟରେ ପ୍ରାକୃତିକ ବିପର୍ଯ୍ୟୟରେ ୬୨୨୮ ଜଣ ମୃତ୍ୟୁ ବରଣ କରିଛନ୍ତି । ତେବେ ସର୍ବାଧିକ ଲୋକଙ୍କ ମୃତ୍ୟୁ ସର୍ପାଘାତ ରେ ହୋଇଛି । ସାପ କାମୁଡ଼ାରେ ସୂଚିତ ସମୟ ମଧ୍ୟରେ ୨୨୧୭ ଜଣକ ଜୀବନ ଯାଇଛି । ପାଣିରେ ବୁଡି ୧୨୫୯ ଜଣ ଜୀବନ ହରାଇଥିବା ବେଳେ ବଜ୍ରପାତ ,ଅଂଶୁଘାତ ଆଦିରେ ବି ପ୍ରତିବର୍ଷ ମୃତ୍ୟୁ ସଂଖ୍ୟା ବଢୁଛି । ବଜ୍ରପାତ,ଅଗ୍ନିକାଣ୍ଡ,ସର୍ପାଘାତ,ବାତ୍ୟା,ଡଂଗାବୁଡି,ଆଦି ପ୍ରାକୃତିକ ବିପର୍ଯ୍ୟୟ ଗୁଡିକରେ ୨୦୧୬-୧୭ ବର୍ଷରେ ୧୬୩୫ ଜଣ ମୃତ୍ୟୁ ବରଣକରିଥିବା ବେଳେ ୨୦୧୭-୧୮ ବର୍ଷରେ ୨୨୩୦ ଜଣକ ଜୀବନ ଯାଇଥିଲା ।ସେହିପରି ୨୦୧୮-୧୯ ରେ ୨୧୭୨ ଓ ୨୦୧୯ ଜୁନ ୨୫ ତାରିଖ ସୁଦ୍ଧା ୧୯୧ ଜଣକ ଜୀବନ ଯାଇଛି ।ବିଧାୟକ ଅଙ୍ଗଦ କହଁର ଙ୍କ ପ୍ରଶ୍ନର ଉତ୍ତର ଦେଇ ରାଜସ୍ବ ମନ୍ତ୍ରୀ ସୁଦାମ ମାରାଣ୍ଡି ଏହି ସୂଚନା ଦେଇଛନ୍ତି । ଅଂଶୁଘାତ ଜନିତ ମୃତ୍ୟୁ କ୍ଷେତ୍ରରେ ସରକାର ୫୦ ହଜାର ଟଙ୍କାର ଆର୍ଥିକ ଅନୁକମ୍ପା ରାଶି ଯୋଗାଇ ଦେଉଥିବା ବେଳେ ଅନ୍ୟ ସମସ୍ତ ପ୍ରାକୃତିକ ବିପର୍ଯ୍ୟୟ ଜନିତ ମୃତ୍ୟୁ ଘଟଣାରେ ୪ ଲକ୍ଷ ଟଙ୍କାର ଅନୁକମ୍ପା ମୂଳକ ସହାୟତା ରାଶି ପ୍ରଦାନ କରାଯାଉଛି ।
28/06/2019