କେନ୍ଦୁଝର ଲୋକସଭା ନିର୍ବାଚନ ମଣ୍ଡଳୀରୁ ଦେଶର ସର୍ବକନିଷ୍ଠ ସଦସ୍ୟ ଭାବେ ନିର୍ବାଚିତ ହୋଇଛନ୍ତି ଚନ୍ଦ୍ରାଣି ମୁର୍ମୁ ।ବିଜେଡି ଟିକେଟ ରୁ ବିଜୟୀ ହୋଇଥିବା ଚନ୍ଦ୍ରାଣି ୨୫ ବର୍ଷ ବୟସରେ ଲୋକସଭାକୁ ଯିବାରେ ଦେଶର ସର୍ବକନିଷ୍ଠା ସଦସ୍ୟ ହୋଇଥିବା ଜଣାଯାଇଛି । ଚନ୍ଦ୍ରାଣି ଙ୍କ ସମେତ ଓଡିଶା ରୁ ଆଉ ୬ ଜଣ ମହିଳା ସାଂସଦ ନିର୍ବାଚିତ ହୋଇଛନ୍ତି।ବଲାଙ୍ଗୀର ରୁ ସଂଗୀତ ସିଂ ଦେଓ,ଆସିକା ରୁ ପ୍ରମିଳା ବିଷୋୟୀ,ଭଦ୍ରକ ରୁ ମଞ୍ଜୁଲତା ମଣ୍ଡଳ,ଯାଜପୁର ରୁ ଶର୍ମିଷ୍ଠା ସେଠି,ଜଗତସିଂହପୁର ରୁ ରାଜଶ୍ରୀ ମଲ୍ଲିକ,ଓ ଭୁବନେଶ୍ୱର ରୁ ଅପରାଜିତା ଷଢଙ୍ଗି,ଲୋକସଭାକୁ ନିର୍ବାଚିତ ହୋଇଛନ୍ତି ।  ଜୁନ୍‌ ୩ ପୂର୍ବରୁ ଗଠନ ହେବାକୁ ଥିବା ସପ୍ତଦଶ ଲୋକ ସଭାକୁ ଦେଶର ବିଭିନ୍ନ ଭାଗରୁ ଭିନ୍ନ ଭିନ୍ନ ରାଜନୈତିକ ଦଳର ଏପରି ୭୮ ମହିଳାଙ୍କୁ ମତଦାତା ନିର୍ବାଚିତ କରିଛନ୍ତି। ନିମ୍ନ ସଦନକୁ ଏତେ ସଂଖ୍ୟକ ମହିଳା ପୂର୍ବରୁ କେବେ ନିର୍ବାଚିତ ହୋଇ ନ ଥିଲେ।

ଲୋକ ସଭାରେ କିଛି ଦିନ ମଧ୍ୟରେ ଯେଉଁ ୫୪୨ ଏମ୍‌ପି ଶପଥଗ୍ରହଣ କରିବେ, ସେମାନଙ୍କ ମଧ୍ୟରୁ ୭୮ ହେଉଛନ୍ତି ମହିଳା। କେବଳ ଉତ୍ତରପ୍ରଦେଶ ଓ ପଶ୍ଚିମବଙ୍ଗରୁ ୧୧ ଜଣ ଲେଖାଏ ମହିଳା ଏମ୍‌ପି ଲୋକ ସଭାରେ ପ୍ରତିନିଧିତ୍ୱ କରିବାର ସୁଯୋଗ ପାଇଛନ୍ତି। ୭ ପର୍ଯ୍ୟାୟ ସାଧାରଣ ନିର୍ବାଚନରେ ମଇଦାନରେ ୭୨୪ ମହିଳା ପ୍ରାର୍ଥୀ ଥିଲେ। କଂଗ୍ରେସ ସର୍ବାଧିକ ୫୪ ମହିଳାଙ୍କୁ ଟିକେଟ ଦେଇଥିବାବେଳେ ଭାଜପା ୫୩ ଜଣଙ୍କୁ ପ୍ରାର୍ଥୀ କରିଥିଲା। ୧୭ତମ ଲୋକ ସଭାର ୧୪% ଏମ୍‌ପି ମହିଳା। ୧୯୫୨ ମସିହାରୁ ଅଦ୍ୟାବଧି ଏହା ଏକ ରେକର୍ଡ। ଷୋଡ଼ଶ ଲୋକ ସଭାରେ ୬୪ ଓ ପଞ୍ଚଦଶ ଲୋକ ସଭାରେ ୫୨ ମହିଳା ପ୍ରତିନିଧିତ୍ୱ କରୁଥିଲେ। ବର୍ତ୍ତମାନ ୪୧ ସିଟିଙ୍ଗ୍‌ ମହିଳା ଏମ୍‌ପିଙ୍କ ମଧ୍ୟରୁ ୨୭ ଜଣଙ୍କ ମଧ୍ୟରେ ଥିବା ସୋନିଆ ଗାନ୍ଧୀ, ହେମାମାଳିନୀ ଓ କିରନ୍‌ ଖେର ସେମାନଙ୍କ ଆସନରେ ଜିତିଛନ୍ତି। ଅନ୍ୟପକ୍ଷରେ ଭାଜପାର ପ୍ରଜ୍ଞା ସିଂ ଠାକୁର କଂଗ୍ରେସର ଦିଗ୍‌ବିଜୟ ସିଂଙ୍କଠାରୁ ଭୋପାଳ ଓ କେନ୍ଦ୍ରମନ୍ତ୍ରୀ ସ୍ମୃତି ଇରାନୀ କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀଙ୍କଠାରୁ ଅମେଠି ଆସନ ଛଡ଼ାଇନେବାରେ ସକ୍ଷମ ହୋଇଛନ୍ତି। ଏଥର ଲୋକ ସଭାକୁ ନିର୍ବାଚିତ ହୋଇଥିବା ଅନ୍ୟ ପ୍ରମୁଖ ମହିଳାଙ୍କ ମଧ୍ୟରେ ଅଛନ୍ତି ଡିଏମ୍‌କେର କାନିମୋଝି(ଟୁଟିକୋରିନ୍‌) ଓ ଭାଜପାର ରୀତା ବହୁଗୁଣା ଜୋଷୀ (ଆଲ୍ଲାହାବାଦ)। ସେହିପରି ଅଭିନେତ୍ରୀରୁ ରାଜନେତା ପାଲଟିଥିବା ଲକେଟ ଚାଟାର୍ଜୀ ହୁଗୁଳି ଆସନରୁ ବିଜୟୀ ହୋଇଛନ୍ତି।