କୋରାପୁଟ ଜିଲାରେ ଜନନୀ ଯନ୍ତ୍ରଣା କମିବାର ନାଁ ନେଉନାହିଁ ।ନବୀନ ଙ୍କ ସରକାର ମହିଳା ବିକାଶ ପାଇଁ ଓ ସ୍ୱାସ୍ଥ୍ୟ ସେବା ପାଇଁ ପ୍ରତିଶ୍ରୁତି ବଦ୍ଧ  ବୋଲି ନେତା ମାନେ ଗଳାଫଟାଇ ଭାଷଣ ଦେଉଥିବା ବେଳେ ଅସଲ ଚିତ୍ର ଓଲଟା ଥିବା ସାମ୍ନା କୁ ଆସିଛି ।ଜିଲାର ଦଶମନ୍ତପୁର,ଲକ୍ଷ୍ମୀପୁର,ଓ ବନ୍ଧୁଗାଁ ଅଂଚଳର ଗର୍ଭବତୀ ମହିଳା ମାନଙ୍କ ଦୁର୍ଦଶା ର ଚିତ୍ର ଗୋଟିଏ ପରେ ଗୋଟିଏ ସାମ୍ନାକୁ ଆସୁଥିଲେ ସୁଦ୍ଧା ପ୍ରଶାସନ ର ନିଦ ଭଂଗୁନାହିଁ । ନିକଟରେ ପୁଣି ଏକ ସମାନ ଦୃଶ୍ୟ ଦେଖିବାକୁ ମିଳିଛି । ଲକ୍ଷ୍ମୀପୁର ବ୍ଲକ ପିପଳପଦର ପଞ୍ଚାୟତ ଅନ୍ତର୍ଗତ ବାଘମାରି ଗାଁର ଜଣେ ଗର୍ଭବତୀଙ୍କୁ ଭାରରେ ବୁହା ହୋଇ ନଦୀପାର କରି ଡାକ୍ତରଖାନା ନିଆଯାଇଛି । ସୂଚନାମୁତାବକ, ଲକ୍ଷ୍ମୀପୁର ବ୍ଲକ ସଦର ମହକୁମା ଠାରୁ ୧୨ କିଲୋମିଟର ଦୂରରେ ବାଘମାରି ଗାଁ । ଗାଁ ମୁଣ୍ଡରେ ଏକ ପାହାଡିଆ ନଦୀ ରହିଛି । ତେବେ ନଦୀରେ ପୋଲ ଖଣ୍ଡେ ଏଯାଏଁ ହୋଇପାରିନାହିଁ । ତେଣୁ ଆମ୍ବୁଲାନ୍ସ କିମ୍ବା ଅନ୍ୟ କୌଣସି ଗାଡି ଗାଁ ନିକଟକୁ ଯାଇପାରେ ନାହିଁ ।ଜରୁରୀ ସ୍ୱାସ୍ଥ୍ୟ ସମସ୍ୟା ସୃଷ୍ଟିହେଲେ ଲୋକେ ରୋଗୀକୁ ବିପଦ ଜଣକ ନଦୀ ପାର କରାଇବାକୁ ବାଧ୍ୟ ହୋଇଥାନ୍ତି । ଏପରି ରବିବାର ଜଣେ ଗର୍ଭବତୀ ମହିଳାଙ୍କୁ ଲକ୍ଷ୍ମୀପୁର ଡାକ୍ତରଖାନାକୁ  ୫ କିଲୋମିଟର ବାଟ ଭାରରେ ବୋହି ନେବା ପରେ  ହିଁ ଆମ୍ବୁଲାନ୍ସର ସୁବିଧା ମିଳିଥିବା ଗ୍ରାମବାସୀ ଅଭିଯୋଗ କରିଛନ୍ତି । ତେବେ ଗର୍ଭବତୀ ମହିଳାଙ୍କ ସ୍ବାସ୍ଥ୍ୟାବସ୍ଥା ଭଲଥିବା ସୂଚନା ମିଳିଛି ।