ସମୟ ବଦଳିଛି । ଏହା ସହିତ ତାଳ ଦେଇ ବଦଳିଛି ଅପରାଧ । ସିନ୍ଧି ଖୋଳି ବା ତାଲା ଭାଙ୍ଗି ଚୋରି କରିବା ଅପେକ୍ଷା ଯଦି ଗୋଟିଏ ଫୋନ କଲରେ ଲକ୍ଷାଧିକ ଟଙ୍କା ହାତେଇ ହେଉଛି ତେବେ ସେ ରାସ୍ତାକୁ କାହିଁକି ଗ୍ରହଣ କରାନଯିବବୋଲି ଏବେ ଅପରାଧୀ ମାନେ ବିଚାର କରୁଛନ୍ତି ।ସଂଖ୍ୟାଧିକ ଅପରାଧୀ ସାଇବର ଅପରାଧ କଳା କୌଶଳ ଶିଖି ଏବେ ସେ ରାସ୍ତାରେ ପାଦ ଥାପିଛନ୍ତି । ଏଟିଏମ ଫ୍ରଡ ଠାରୁ କ୍ରେଡିଟ କାର୍ଡ ଠକେଇ ଯାଏଁ ଅନେକ ଘଟଣା ଏଡିଶା ପୋଲିସ ର ଚିନ୍ତା ବଢ଼ାଇ ଦେଇଛି । ରାଜ୍ୟରେ ଏଭଳି ଅପରାଧ ବଢୁଛି।ଏହାକୁ ମୁକାବିଲା ପାଇଁ  ଆଉ ୩ଟି ସାଇବର ଥାନା ଭୁବନେଶ୍ୱର, ବାଲେଶ୍ୱର ଏବଂ ଜୟପୁରରେ  ପ୍ରତିଷ୍ଠା କରାଯିବ ବୋଲି ନିଷ୍ପତ୍ତି ନିଆଯାଇଛି । ନୂଆ ସାଇବର ଥାନା ସମ୍ପର୍କରେ ଡିଜିପି ରାଜେନ୍ଦ୍ର ପ୍ରସାଦ ଶର୍ମା ସୂଚନା ଦେଇଛନ୍ତି । ସେ କହିଛନ୍ତି ଯେ, ରାଜ୍ୟରେ ସାଇବର ମାମଲା ଉଦ୍‌ବେଗଜନକ ଭାବେ ବୃଦ୍ଧି ପାଉଛି। ୨୦୧୩ରେ ୧୨୦ଟି ମାମଲା ଥିବା ବେଳେ ୨୦୧୮ରେତାହା ବୃଦ୍ଧି ପାଇ ୮୬୮ରେ ପହଂଚିଛି । ମାମଲା ଯେଉଁ ଅନୁପାତରେ ବଢ଼ୁଛି, ସେ ଅନୁପାତରେ ଥାନା ନାହିଁ। ସାଇବର ଥାନା ବଢ଼ିବା ସହ ତଦନ୍ତ ଅଧିକାରୀଙ୍କ ସଂଖ୍ୟା ବୃଦ୍ଧି କରାଯିବ। ୩ ଦିନିଆ ସାଇବର ତଦନ୍ତ ଅଧିକାରୀ ତାଲିମ  କାର୍ଯ୍ୟକ୍ରମରେ ଡିଜିପି ଶର୍ମା ଏହି ସୂଚନା ଦେଇଛନ୍ତି।ଏବେ କଟକ ,ଭୁବନେଶ୍ୱର,ପୁରୀ,ବ୍ରହ୍ମପୁର,ରାଉରକେଲା ଭଳି ସହର ଗୁଡିକରେ ଯେତିକି ମାମଲା ବଢୁଛି ପୋଲିସ ସେହି ଅନୁପାତରେ ମାମଲା ପଂଜିକୃତ କରି ତଦନ୍ତକୁ ଆଗକୁ ନେଇପାରୁନି । ପୋଲିସ ଥାନା ରେ ମାମଲା ପଂଜିକୃତ କରାନଯାଇ ଫେରାଇ ଦିଆଯାଉଥିବା ଅଭିଯୋଗ ହେଉଛି ।ରାଜ୍ୟ ପୋଲିସ ରେ ଏଭଳି ମାମଲା ର ତଦନ୍ତ ପାଇଁ ଦକ୍ଷ ମାନବ ସମ୍ବଳ ର ଆବଶ୍ୟକ ରହିଛି ।