ନିକଟରେ ଭାରତୀୟ ରିଜର୍ଭ ବ୍ୟାଙ୍କ ପକ୍ଷରୁ ଦେଶର ପ୍ରମୁଖ ସହର ଗୁଡିକରେ ଘର କିଣା ବାବଦୀୟ ତଥ୍ୟ ସଂଗ୍ରହ ଲାଗି ଏକ ସର୍ଭେ କରାଯାଇଥିଲା । ସେଥିରେ ଦେଶର ଅର୍ଥନୈତିକ ରାଜଧାନୀ କୁହାଯାଉଥିବା ମୁମ୍ବାଇ ରେ ଘର କିଣିବା ସବୁଠାରୁ ମହଙ୍ଗା ଜଣାଯାଇଥିବା ବେଳେ ଓଡ଼ିଶାର ରାଜଧାନୀ ଭୁବନେଶ୍ୱରରେ ଘର କିଣିବା ସବୁଠାରୁ ଶସ୍ତା ଥିବାର ତଥ୍ୟ ସାମ୍ନାକୁ ଆସିଥିଲା ।
ସୂଚନା ଯୋଗ୍ୟ ଯେ ଆର୍ବିଆଇ ପକ୍ଷରୁ ପ୍ରତି ୩ମାସରେ ଥରେ ରେସିଡେନ୍ସିଆଲ୍ ଆସେଟ୍ ପ୍ରାଇସ୍ ମନିଟରିଂ ସର୍ଭେ କରାଯାଇଥାଏ । ଏହି ସର୍ଭେ ଜୁଲାଇ ୨୦୧୦ରୁ ଆରମ୍ଭ ହୋଇଛି । କିଛି ବ୍ୟାଙ୍କ ଏବଂ ହାଉସିଂ ଫାଇନାନ୍ସିଆଲ୍ କମ୍ପାନୀମାନଙ୍କ ପକ୍ଷରୁ ୧୩ଟି ସହରକୁ ଦିଆଯାଇଥିବା ଗୃହଋଣ ଆଧାରରେ ଏହି ସର୍ଭେ କରାଯାଇଥିଲା । ଏହି କ୍ରମରେ ଗୁରୁବାର ଜାରି ହୋଇଥିବା ରିପୋର୍ଟରେ ଉଲ୍ଲେଖ କରାଯାଇଛି ଯେ, ଆୟ ତୁଳନାରେ ଘରର ମୂଲ୍ୟ ଗତ ୪ବର୍ଷ ମଧ୍ୟରେ ବେଶ୍ ଅଧିକ ବଢ଼ିଛି । ମାର୍ଚ୍ଚ ୨୦୧୫ରେ ଏହି ଅନୁପାତ ୫୬.୧ ଥିଲାବେଳେ ମାର୍ଚ୍ଚ ୨୦୧୯ରେ ଏହା ବୃଦ୍ଧି ପାଇ ୬୧.୫ରେ ପହଞ୍ଚିଛି । ଏହି ମାମଲାରେ ମୁମ୍ବାଇରେ ଘରଟିଏ ସବୁଠୁ ମହଙ୍ଗା ଥିଲାବେଳେ ଭୁବନେଶ୍ୱରରେ ରହିଛି ସବୁଠୁ ଶସ୍ତା । ସର୍ଭେରେ ଆହୁରି ମଧ୍ୟ ଉଲ୍ଲେଖ କରାଯାଇଛି ଯେ ଆୟ ତୁଳନାରେ ହାରାହାରି ଋଣ ପ୍ରଦାନ ମଧ୍ୟ ଏହି ସଂକେତ ଦେଉଛି ଯେ ଘର ଏବେ ଲୋକଙ୍କ ନିକଟରୁ ଦୂରରେ ରହିଛି । ଆୟ ତୁଳନାରେ ଋଣର ଅନୁପାତ ମାର୍ଚ୍ଚ ୨୦୧୫ରେ ୩ ଥିଲାବେଳେ ମାର୍ଚ୍ଚ ୨୦୧୯ରେ ୩.୪ ରହିଛି । ସର୍ଭେରେ କୁହାଯାଇଛି ଯେ ମୂଲ୍ୟ ଏବଂ ହାରାହାରି ଋଣ ଅନୁପାତ ବଢ଼ିଛି । ପୂର୍ବରୁ ମୂଲ୍ୟ ତୁଳନାରେ ୬୭.୭ ପ୍ରତିଶତ ଋଣ ଦିଆଯାଉଥିଲା । ଏବେ ଏହି ଅନୁପାତ ବୃଦ୍ଧି ପାଇ ୬୯.୬ ପ୍ରତିଶତରେ ପହଞ୍ଚିଛି । ଏଥିରୁ ସୂଚନା ମିଳୁଛି ଯେ ବ୍ୟାଙ୍କ ଏବେ ଅଧିକ ରିସ୍କ ନେବାକୁ ଲାଗିଛନ୍ତି । ସର୍ଭେରେ ଯେଉଁ ଅନ୍ୟ ଏକ ତଥ୍ୟ ପଦାକୁ ଆସିଛି ତାହା ହେଉଛି ଆୟ ତୁଳନାରେ ଇଏମ୍ଆଇ । ତେବେ ଗତ ଦୁଇବର୍ଷ ଧରି ଏହି ଅନୁପାତ ଏକପ୍ରକାର ସ୍ଥିର ରହିଛି । ଅନ୍ୟ ସହର ତୁଳନାରେ ମୁମ୍ବାଇ, ପୁଣେ ଏବଂ ଅହମ୍ମଦାବାଦରେ ଆୟ ତୁଳନାରେ ଋଣର ଅନୁପାତ ଅଧିକ ରହିଛି । ଆର୍ବିଆଇ ପକ୍ଷରୁ ଏହି ସର୍ଭେରେ ଯେଉଁ ୧୩ଟି ସହରକୁ ସାମିଲ କରାଯାଇଛି ସେହି ସହରଗୁଡ଼ିକ ହେଉଛି- ମୁମ୍ବାଇ, ଚେନ୍ନାଇ, ଦିଲ୍ଲୀ, ବେଙ୍ଗାଲୁରୁ, ହାଇଦ୍ରାବାଦ, କୋଲକାତା, ପୁଣେ, ଜୟପୁର, ଚଣ୍ଡୀଗଡ଼ , ଅହମ୍ମଦାବାଦ, ଲକ୍ଷ୍ନୌ, ଭୋପାଳ ଏବଂ ଭୁବନେଶ୍ୱର ।
13/07/2019