ବାରମ୍ବାର କହିବା ସତ୍ୱେ ବି ଶୁଣୁନାହାନ୍ତି କଲେଜ କର୍ତ୍ତୃପକ୍ଷ। ଦୁଇଦୁଇ ଥର କଲେଜରେ ବାୟୋମେଟ୍ରିକ ଉପସ୍ଥାନ ବ୍ୟବସ୍ଥା ଗ୍ରହଣ କରିବାକୁ ଉଚ୍ଚ ମାଧ୍ୟମିକ ଶିକ୍ଷା ନିର୍ଦେଶାଳୟର ନିର୍ଦେଶକ ସୁନ୍ଦର ଲାଲ ସିଲ ନିର୍ଦେଶଦେବା ସତ୍ୱେ କଲେଜ କର୍ତ୍ତୃପକ୍ଷ ପାଳନ କରିନାହାନ୍ତି । ଏବେ ଚୂଡାନ୍ତ ନିଷ୍ପତ୍ତି ହୋଇଛି ଯଦି କଲେଜ ଅଧ୍ୟାପକ ଓ କର୍ମଚାରୀଙ୍କ ବାୟୋମେଟ୍ରିକ୍ ଉପସ୍ଥାନ ନଥିବ, ତେବେ ଆସନ୍ତା ଅଗଷ୍ଟ ମାସରୁ ଦରମା ବନ୍ଦ । ସୂଚନା ଅନୁଯାୟୀ, ରାଜ୍ୟରେ ସରକାରୀ, ଅନୁଦାନପ୍ରାପ୍ତ ବେସରକାରୀ, ସେଲ୍ଫ ଫାଇନାନ୍ସିଂ ଆଦି ବର୍ଗର ୧୬୩୧ଟି ଯୁକ୍ତ୨ କଲେଜ ରହିଛି। ସେଥିମଧ୍ୟରୁ ୮୫୩ଟି କଲେଜରେ ବାୟୋମେଟ୍ରିକ୍ ମେସିନ୍ ଲାଗିଛି। ଆହୁରି ୭୦୦ରୁ ଅଧିକ କଲେଜ ଏପର୍ଯ୍ୟନ୍ତ ଲଗାଇ ନାହାନ୍ତି। ସେଲ୍ଫ ଫାଇନାନ୍ସିଂ କଲେଜଗୁଡ଼ିକ ଏ କ୍ଷେତ୍ରରେ ଆଗୁଆ ପଦକ୍ଷେପ ନେଇଛନ୍ତି। ବାୟୋମେଟ୍ରିକ୍ ମେସିନ୍ ମାଧ୍ୟମରେ ଅଧ୍ୟାପକ ଓ କର୍ମଚାରୀଙ୍କ ଉପସ୍ଥାନ ନିଆଯାଉଛି। ତେବେ ସରକାରୀ ଓ ଅନୁଦାନପ୍ରାପ୍ତ କଲେଜଗୁଡ଼ିକ ପଦକ୍ଷେପ ନେଉଥିବାରୁ ଏଥର କଡ଼ା ଚେତାବନୀ ଦେଇଛନ୍ତି ନିର୍ଦେଶାଳୟ ନିର୍ଦେଶକ ଶ୍ରୀ ସିଲ୍ । ୨୦୧୯-୨୦ ଶିକ୍ଷାବର୍ଷ ପାଠପଢ଼ା ଆରମ୍ଭ ହେବା ପୂର୍ବରୁ ବାୟୋମେଟ୍ରିକ୍ ଲଗାଇବା ନେଇ ସୁନିଶ୍ଚିତ କରାଇବାକୁ କୁହାଯାଇଛି। ଆହୁରି କୁହାଯାଇଛି ଯେ ପ୍ରତି କର୍ମଚାରୀଙ୍କର ତିନି ମାସର ଦରମା ସହ ବାୟୋମେଟ୍ରିକ୍ ଉପସ୍ଥାନ ସଂଯୋଗ ରହିବ। ଯେଉଁ ଅଧ୍ୟାପକ ଓ କର୍ମଚାରୀଙ୍କ ବାୟୋମେଟ୍ରିକ୍ ଉପସ୍ଥାନ ନଥିବ, ସେମାନଙ୍କ ଦରମା ଆପେ ବନ୍ଦ ହୋଇଯିବ।
10/07/2019