ରାଜ୍ୟରେ କେତେ ହସ୍ତଶିଳ୍ପ କାରିଗର ଅଛନ୍ତି,ସେମାନଙ୍କ ସାମାଜିକ ସ୍ଥିତି ଓ ଅର୍ଥନୈତିକ ଅବସ୍ଥା ସମ୍ପର୍କରେ ତଥ୍ୟ ସଂଗ୍ରହ ପାଇଁ ରାଜ୍ୟ ସରକାର  ହସ୍ତଶିଳ୍ପ କାରିଗର ଗଣନା ଖୁବ ଶୀଘ୍ର ଆରମ୍ଭ କରିବାକୁ ଯାଉଛନ୍ତି । ଏହି କାର୍ଯ୍ୟକ୍ରମକୁ ହସ୍ତତନ୍ତ, ବୟନ ଓ ହସ୍ତଶିଳ୍ପ ବିଭାଗ ପକ୍ଷରୁ ହାତକୁ ନିଆଯାଇଥିବା ସୂଚନା ମିଳିଛି । ୧୯ ବର୍ଷ ପରେ ସରକାର ଏହି କାର୍ଯ୍ୟକ୍ରମକୁ ହାତକୁ ନେଇଛନ୍ତି । ଶେଷଥର ପାଇଁ ୨୦୦୧-୦୨ ମସିହାରେ ଏହି କାରିଗରଙ୍କ ଗଣନା କରାଯାଇଥିଲା । ସେତେବେଳେ କାରିଗରଙ୍କ ସଂଖ୍ୟା ୧ ଲକ୍ଷ ୨୯ ହଜାର ୯୫୮ ଥିଲା ବୋଲି ସରକାରଙ୍କ ପକ୍ଷରୁ ସୋମବାର ଆୟୋଜିତ ଏକ ସାମ୍ବାଦିକ ସମ୍ମିଳନୀରେ କୁହାଯାଇଛି ।ଏହି ଗଣନା କାର୍ଯ୍ୟ ୩ଟି ପର୍ଯ୍ୟାୟରେ ହେବ । ପ୍ରଥମ ପର୍ଯ୍ୟାୟରେ ୫ଟି ଜିଲ୍ଲାକୁ ପ୍ରାଧାନ୍ୟ ଦିଆଯାଇଛି । ସେଗୁଡ଼ିକ ହେଲା କେନ୍ଦୁଝର, ବାଲେଶ୍ୱର, ଭଦ୍ରକ, ସୁବଣ୍ଣପୁର ଓ ସମ୍ବଲପୁର । ଅନ୍ୟ ଦୁଇଟି ପର୍ଯ୍ୟାୟରେ ସମୁଦାୟ ରାଜ୍ୟର ତଥ୍ୟ ଗ୍ରହଣ କରାଯିବ । ଏହି ସର୍ବେକ୍ଷଣ ସ୍ୱତନ୍ତ୍ର ମୋବାଇଲ୍‍ ଆପ୍‍ ଦ୍ୱାରା କରାଯିବ । ଏବଂ ଏଥିପାଇଁ ସ୍ୱତନ୍ତ୍ର ନୀରିକ୍ଷକଙ୍କୁ ନିଯୁକ୍ତ କରାଯିବ ବୋଲି ସୂଚନା  ଦିଆଯାଇଛି । ଗଣନାକାରୀଙ୍କୁ ଆବଶ୍ୟକ  ତଥ୍ୟ ଦେବା ପାଇଁ ଅନୁରୋଧ କରାଯିବା ସହ ଅଭିଯୋଗ ଥିଲେ ନିକଟସ୍ଥ ଜିଲ୍ଲା ଶିଳ୍ପକେନ୍ଦ୍ର ଓ ଆଞ୍ଚଳିକ ଶିଳ୍ପ କେନ୍ଦ୍ର ସହ ଯୋଗାଯୋଗ କରିବାକୁ କୁହାଯାଇଛି ।