ଜନ୍ମମାଟି କୁ ଫେରିବ ସୁନ୍ଦରୀ,ସାତକୋଶିଆ ବାଘବଂଶ ବୃଦ୍ଧି ଆଶା ମଉଳିଗଲା
ଓଡ଼ିଶାରେ ବାଘ ବଂଶ ବିସ୍ତାର ଲାଗି ଅଣାଯାଇଥିବା ବାଘୁଣୀ ‘ସୁନ୍ଦରୀ’ ଏବେ ନିଜ ଜନ୍ମ ମାଟିକୁ ଫେରିଯିବ । ଓଡ଼ିଶା ସରକାର ସୁନ୍ଦରୀକୁ ରଖିବାକୁ ଚାହୁଁ ନାହାନ୍ତି,ତେଣେ ମଧ୍ୟପ୍ରଦେଶ ସରକାର ଏହାକୁ ଫେରାଇ ନେବାକୁ ଅରାଜି ଥିଲେ । ଏହି ସ୍ଥିତିରେ ‘ସୁନ୍ଦରୀ’ ମାମଲା ଅଦାଲତରେ ପହଞ୍ଚିଥିଲା । ମଧ୍ୟପ୍ରଦେଶର ଜବଲପୁର ହାଇକୋର୍ଟରେ ଏ ସଂକ୍ରାନ୍ତରେ ଏକ ମାମଲା ବିଚାର ହୋଇ ରାୟପ୍ରକାଶ ପାଇଛି ।‘ସୁନ୍ଦରୀ’କୁ ତୁରନ୍ତ ଏନକ୍ଲୋଜରରୁ ମୁକ୍ତ କରି ଫେରାଇ ନେବା ଓ ତାହାକୁ କାହ୍ନା ବ୍ୟଘ୍ର ଅଭୟାରଣ୍ୟରେ ରଖିବା ପାଇଁ ମଧ୍ୟପ୍ରଦେଶ ସରକାରଙ୍କୁ ନିର୍ଦେଶ ଦେଇଛନ୍ତି ଜବଲପୁର ହାଇକୋର୍ଟ । ଅନ୍ୟପକ୍ଷରେ ସୋମବାର ଓଡ଼ିଶା ସରକାର ସୁନ୍ଦରୀ ସମ୍ପର୍କରେ ତୁରନ୍ତ ନିଷ୍ପତ୍ତି ନେବା ନିମନ୍ତେ ଏନଟିସିଏ (ଜାତୀୟ ବ୍ୟାଘ୍ର ସଂରକ୍ଷଣ ପ୍ରାଧିକରଣ)ର ହସ୍ତକ୍ଷେପ ଲୋଡ଼ିଛନ୍ତି । ଆନ୍ତଃରାଜ୍ୟ ବ୍ୟାଘ୍ର ଟ୍ରାନ୍ସଲୋକେସନ୍ କାର୍ଯ୍ୟକ୍ରମ ଅଧୀନରେ ୨୦୧୮ ଜୁନମାସରେ ମଧ୍ୟପ୍ରଦେଶର ବାନ୍ଧବଗଡ଼ ବ୍ୟାଘ୍ର ଅଭୟାରଣ୍ୟରୁ ସୁନ୍ଦରୀ ଓଡ଼ିଶା ଆସିଥିଲା । ଏହାକୁ ଅନୁଗୋଳ ଜିଲାର ସାତକୋଶିଆ ଅଭୟାରଣ୍ୟରେ ଛଡ଼ାଯାଇଥିଲା । ମାତ୍ର ୨୦୧୮ ସେପ୍ଟେମ୍ବର ମାସରେ ସୁନ୍ଦରୀ ଅଭୟାରଣ୍ୟର କୋର ଅଞ୍ଚଳରେ ଜଣେ ମହିଳା ଓ ଜଣେ ବ୍ୟକ୍ତିଙ୍କୁ ମାରିଥିବା ଅଭିଯୋଗ ହୋଇଥିଲା । ଏହାପରେ ଲୋକମାନେ ସ୍ଥାନୀୟ ବନବିଭାଗ କାର୍ଯ୍ୟାଳୟରେ ନିଆଁ ଲଗାଇ ଦେଇଥିଲେ । ଶେଷରେ ସୁନ୍ଦରୀକୁ ବନ ବିଭାଗ ଅଧିକାରୀମାନେ କାବୁ କରି ଏନକ୍ଲୋଜର ମଧ୍ୟରେ ଛାଡ଼ିଥିଲେ । ସେଦିନ ଠାରୁ ସୁନ୍ଦରୀ ର ଭାଗ୍ୟରେ ବନ୍ଦୀ ଜୀବନ ଯୋଡି ହୋଇଯାଇଥିଲା ।
24/11/2020