ମାଲକାନାଗିରି, ଜାନୁଆରୀ ୧୩ : ଚିତ୍ରକୋଣ୍ଡାରୁ କାଲିମେଳା, ବାଲିମେଳାରୁ ପଡ଼ିଆ ଯୁଆଡ଼େ ଚାହିଁଲେ ବି ଦେଖାଯାଉନି ବିକାଶ । ରାଜ୍ୟସରକାର କାଗଜପତ୍ରରେ ମାଲକାନାଗିରି ଜିଲ୍ଲାର ସୁନେଲି ବିକାଶର ଚିତ୍ର ଉତଥାପନ କରୁଥିବାବେଳେ ଏହି ପଛୁଆ ଜିଲ୍ଲାର ନୋଡ଼ାଲ ଅଫିସର ଦାୟିତ୍ୱ ନେଇଥିବା ସଚିବ ଙ୍କ ଚିଠି ତାର ଅସଲ ମୁଖା ଖୋଲିଦେଇଛି ।
ୟୁଏନ ବେହେରା, ଆର୍.ବାଲକୃଷ୍ଣନ ଙ୍କ ପରେ ଏବେ ବିଶାଳ ଗଗନ ମାଲକାନାଗିରି ଜିଲ୍ଲାର ନୋଡ଼ାଲ ଅଫିସର ଦାୟିତ୍ୱରେ ଅଛନ୍ତି । ନୋଡ଼ାଲ ଅଫିସର ମାଲକାନଗିରିରେ ବିକାଶ ମନ୍ଥର ବୋଲି ସ୍ୱୀକାର କରି ଏକ ରିପୋର୍ଟ ପ୍ରଦାନ କରିଥିବା ଜଣାଯାଇଛି । ମାଲକାନାଗିିରି ଜିଲ୍ଲାରେ ସିଡ଼ିଏମଓ, ୨ଏଡ଼ିଏମଓ ଙ୍କ ସମେତ ୫୬ ଟି ଡାକ୍ତରୀ ପଦ ଖାଲି ପଡ଼ିଛି । କୃଷି ଉପନିର୍ଦ୍ଦେଶକ, ଜିଲ୍ଲା କୃଷି ଅଧିକାରୀ, ଜିଲ୍ଲା ଶ୍ରମ ଅଧିକାରୀ, ସୂଚନା ଓ ଲୋକସମ୍ପର୍କ ଅଧିକାରୀ, ସଂସ୍କୃତି ଅଧିକାରୀ, ପର୍ଯ୍ୟଟନ ଅଧିକାରୀ, ଜିଲ୍ଲା ଅଧିକାରୀ ପଦ ଖାଲି ପଡ଼ିଛି । ୫୦ରୁ ଊଦ୍ଧ୍ୱର୍ ଅଧିକାରୀ ପଦବୀ ପୂରଣ କରାଯାଇନାହିଁ । ୨ ତହସିଲଦାର, ୭ଟି ମଙ୍ଗଳ ସଂପ୍ରସାରଣ ଅଧିକାରୀ, ବହୁ ସହକାରୀ ନିର୍ବାହୀ ଯନ୍ତ୍ରୀ ପଦବୀ ଖାଲି ପଡ଼ିଛି । ଗୋବିନ୍ଦ ପାଲୀ, ମହୁପଦର, ଚିତ୍ରକୋଣ୍ଡା, ଜାନବାଇ ରାସ୍ତା କାମ ଶିଥିଳ ହୋଇଛି । କାଲିମେଳା, ଭେଜାଙ୍ଗିୱାଡ଼ା, ବାଲିମେଳା ରାସ୍ତା କାମ ଆଦୌ ଆରମ୍ଭ ହୋଇପାରୁନଥିବା ସଚିବ ଦର୍ଶାଇଛନ୍ତି ।
ଜିଲ୍ଲାର ୮୦ ଭାଗ ଅଂଚଳରେ ମୋବାଇଲି ସଂଯୋଗ ହୋଇନି । ୧୧୧ ପଂଚାୟତରୁ ୧୦୦ ପଂଚାୟତରେ ବ୍ୟାଙ୍କ ସେବା ନାହିଁ । କେନ୍ଦ୍ର ସରକାର ଏପରି ପଛରେ ଥିବା ମାଲକାନାଗିରି ଜିଲ୍ଲାକୁ ପଛୁଆ ତାଲିକାରେ ରଖିଥିବାବେଳେ ରାଜ୍ୟ ସେଥିରେ ଅସନ୍ତୋଷ ପ୍ରକାଶ କରିଛି । ନ ପଚାରି କେନ୍ଦ୍ର କାହିଁକି ବାଛିଲା ଓ ଆଧାର କଣ ବୋଲି ପ୍ରଶ୍ନ ଉଠାଇଥିଲା । ଏବେ ସଚିବଙ୍କ ରିପୋର୍ଟ ରାଜ୍ୟ ସରକାର ଖୋଜୁଥିବା ଆଧାରକୁ ଜଣାଇ ଦେଇଛନ୍ତି ।
13/01/2018