ବିଗତ ତିନିବର୍ଷ ଧରି ରାଜ୍ୟର ସରକାରୀ ଆଇଟିଆଇ ଗୁଡିକରେ ନାଁ ଲେଖାଇବା କ୍ଷେତ୍ର ରେ  ଛାତ୍ରୀ ମାନଙ୍କସଂଖ୍ୟା ବଢୁଥିବା ପରିଲକ୍ଷିତ ହେଉଛି । ପୂର୍ବ ତୁଳନାରେ ଅଧିକ ସଂଖ୍ୟକ ଝିଅ ସରକାରୀ ଆଇଟିଆଇ ର ବିଭିନ୍ନ ଟ୍ରେଡ଼ ରେ ଅଧ୍ୟୟନ ପାଇଁ ଆଗ୍ରହ ପ୍ରକାଶ କରୁଥିବା ଜଣାପଡିଛି। ଦିନ ଥିଲା ଆଇଟିଆଇ ରେ ନାମ ଲେଖାଇବାକୁ ପିଲା ରାଜି ହେଉନଥିଲେ । ଅନେକ ବେସରକାରୀ ଆଇଟିଆଇ ବନ୍ଦ ହେବାସ୍ଥିତିକୁ ଆସି ଯାଇଥିଲା । କିନ୍ତୁ ଏବେ ଏଥିରେ ଯଥେଷ୍ଟ ସୁଧାର ଆସିଛି ।  ଏବେ ରାଜ୍ୟରେ ୪୯ଟି ସରକାରୀ ଓ ୪୯୨ଟି ଘରୋଇ ଆଇଟିଆଇ ରହିଛି। ରାଜ୍ୟ ସରକାରଙ୍କ ବିହିତ ପଦକ୍ଷେପ ଦ୍ବାରା ସରକାରୀ ଆଇଟିଆଇଗୁଡ଼ିକ ସ୍ଥିତିରେ ନାଁ ଲେଖା କ୍ଷେତ୍ର ରେ  କିଛିଟା ସୁଧାର ଆସିଛି। ୨୦୧୬-୧୭ରେ ସରକାରୀ ଆଇଟିଆଇର ୫୮.୭୧% ସିଟ୍‌ ପୂରଣ ହୋଇଥିବା ବେଳେ ୨୦୧୭-୧୮‌ରେ ଏହି ସଂଖ୍ୟା ୮୪.୧୭ରେ ପହଞ୍ଚିଥିଲା। ୨୦୧୮-୧୯ରେ ମୋଟ ୧୬ ହଜାର ୮୮୧ ସିଟ୍‌ ମଧ୍ୟରୁ ୧୫ ହଜାର ୫୭୦ ସିଟ୍‌ ପୂରଣ ହୋଇଥିଲା। ତେବେ ଖୁସିର ବିଷୟ ହେଉଛି ଯେ ଛାତ୍ରୀଙ୍କ ସଂଖ୍ୟା ଏହି ତିନି ବର୍ଷ‌ରେ ବୃଦ୍ଧି ପାଇଛି। ୨୦୧୬-୧୭ରେ ମାତ୍ର ୪.୨୫% ଛାତ୍ରୀ ନାମ ଲେଖାଇଥିବା ବେଳେ ପରବର୍ତୀ ବର୍ଷଗୁଡ଼ିକରେ ଯଥାକ୍ରମେ ୧୦.୮୩% ଓ ୧୬.୫୭%ରେ ରହିଥିଲା। ‘ସୁଦକ୍ଷା’ ଯୋଜନା ଆରମ୍ଭ କରାଯାଇଥିବାରୁ ୨୦୨୦-୨୧ ସୁଦ୍ଧା ଛାତ୍ରୀଙ୍କ ସଂଖ୍ୟାକୁ ୩୦ ପ୍ରତିଶତରେ ପହଞ୍ଚାଇବାକୁ ଲକ୍ଷ୍ୟ ରଖାଯାଇଛି। ୨୦୧୯-୨୦ ଶିକ୍ଷାବର୍ଷରେ ୪୯ଟି ସରକାରୀ ଆଇଟିଆଇର ୧୮ ହଜାର ୧୮୨ ସିଟ୍‌ ପାଇଁ ନାମଲେଖା ହେଉଛି। ପ୍ରଥମ ପର୍ଯ୍ୟାୟ ନାମଲେଖା ପରେ ୬ ହଜାର ୩୦୭ ସିଟ୍‌ ଖାଲି ପଡ଼ିଛି। ବର୍ତମାନ ଦ୍ବିତୀୟ ପର୍ଯ୍ୟାୟ ନାମଲେଖା ଚାଲୁରହିଛି। ଅଗଷ୍ଟ ୧୩ରୁ ୩୦ ମଧ୍ୟରେ ସ୍ପଟ୍‌ ନାମଲେଖା ଅନୁଷ୍ଠିତ ହେବ। ସ୍ପଟ ନାମଲେଖା ବେଳେ କିଛିଟା ସିଟ ପୁରାଣ ହେବ ବୋଲି ଆଶା ପୋଷଣ କରାଯାଇଛି ।