ଆଜି ପ୍ରଥମାଷ୍ଟମୀ । ଏହା ଓଡ଼ିଶାର ଏକ ଅନନ୍ୟ ପାରମ୍ପରିକ ପର୍ବ । ଅତୀତରେ, ମାର୍ଗଶିର ମାସକୁ ବର୍ଷର ଆଦ୍ୟ ମାସ ବା ପ୍ରଥମ ମାସ ବୋଲି ଗଣନା କରାଯାଇ, ଏହି ମାସରୁ ବର୍ଷାରମ୍ଭ ହେଉଥିଲା । ତେଣୁ ବର୍ଷର ପ୍ରଥମ ମାସର ପ୍ରଥମ ଅଷ୍ଟମୀକୁ ପ୍ରଥମାଷ୍ଟମୀ ବୋଲି ଧରାଯାଇଛି । ଏହି ଦିନ ବଂଶର ପ୍ରଥମ ଜାତ ସନ୍ତାନ ବା ଜ୍ୟେଷ୍ଠ ପିଲାଙ୍କର ନବବସ୍ତ୍ର ପରିଧାନ, ବନ୍ଦାପନା ଓ ମିଷ୍ଟାନ୍ନ ଭକ୍ଷଣାଦି ହୁଏ। ଜ୍ୟେଷ୍ଠ ସନ୍ତାନଙ୍କ ବନ୍ଦାପନା ପରେ ପଞ୍ଚପଲ୍ଲବ, ପଞ୍ଚ ଶସ୍ୟରେ କଳସପୂଜା ଓ ବରୁଣ ପୂଜା ହୋଇଥାଏ।

ଆଉ ଚାଲିବନି ମାଓ ହୁକୁମ । ଆମେ ତୁମ ଆଦେଶ ଆଉ ମାନିବୁନି । ଆମ ଗାଁରେ ପ୍ରବେଶ କରି ଆମକୁ ନାଲି ଆଖି ଦେଖାଇଲେ ସହିବୁନି। ଏମିତି ସାହସର ସହିତ ଏବେ କହିପାରୁଛନ୍ତି ମାଲକାନଗିରି ର ଆଦିବାସୀ । ନିଜ ସୁରକ୍ଷା ପାଇଁ ନିଜେ ହାତରେ ଧନୁ ତୀର ଧରି ମାଲକାନଗିରି ସ୍ୱାଭିମାନ ଅଞ୍ଚଳବାସୀ ଗାଁ ଲୋକେ ଏକାଠି ହୋଇ ଜଗିଛନ୍ତି ଲାଲ ଦୁର୍ଗ ଉପରେ ନଜର ରଖିଛନ୍ତି । ରାତି ପାହିବାଠାରୁ ରାତି ହେବା ପର୍ଯ୍ୟନ୍ତ, ସମସ୍ତେ ଦେଉଛନ୍ତି ପହରା ।

ମହାମାରୀ କରୋନା ପାଇଁ ଅନଲାଇନ ଶିକ୍ଷା ହିଁ ଏକମାତ୍ର ବିକଳ୍ପ ହୋଇଥିବା ବେଳେ ସରକାରୀ ଉଦାସିନତା ଓ ଦୂରଦୃଷ୍ଟିର ଅଭାବ ଯୋଗୁ ବଞ୍ଚିତ ହୋଇଛନ୍ତି ୬୮ ପ୍ରତିଶତ ଛାତ୍ରଛାତ୍ରୀ । ଗାଁ ରୁ ପଲ୍ଲୀ ଓ ସହରରୁ ରାଜଧାନୀ । ସବୁଠି ସମାନ ଅବସ୍ଥା । ଶିକ୍ଷାନୁଷ୍ଠାନ ବନ୍ଦ ହେବା କାରଣରୁ ପ୍ରଥମରୁ ଦ୍ୱାଦଶ ପର୍ଯ୍ୟନ୍ତ ଛାତ୍ରଛାତ୍ରୀଙ୍କ ପାଇଁ ୩୦ ପ୍ରତିଶତ ପାଠ୍ୟକ୍ରମ ହ୍ରାସ କରାଯାଇଛି । ଏହାସତ୍ତ୍ବେ ୬୮ ପ୍ରତିଶତ ଛାତ୍ରଛାତ୍ରୀଙ୍କ ପାଖରେ ପହଞ୍ଚି ପାରିନି ଅନଲାଇନ ଶିକ୍ଷା । କନ୍ଧମାଳ ଜିଲ୍ଲାରେ ସର୍ବନିମ୍ନ ୨୪.୯୮ ପ୍ରତିଶତ ଓ ଖୋର୍ଦ୍ଧା ଜିଲ୍ଲାରେ ସର୍ବାଧିକ ୫୧,୩୨ ପ୍ରତିଶତ ଛାତ୍ରଛାତ୍ରୀଙ୍କ ପାଖରେ ଅନଲାଇନ ଶିକ୍ଷା ପହଞ୍ଚି ପାରିଛି ।

କନ୍ଧମାଳ ବାଲ୍ୟ ବିବାହ ମୁକ୍ତ ବୋଲି ପ୍ରଶାସନ କହି ବୁଲୁଥିବା ବେଳେ ଅନେକ ନାବାଳିକା ବାହା ହୋଇ ଘରସଂସାର ର ବେଡି ପିନ୍ଧୁଥିବା ନଜରକୁ ଆସୁଛି । ଏବେ ପୁଣି ଜଣେ ୧୪ ବର୍ଷର ଝିଅ ଗର୍ଭବତୀ ଜଣାପଡିବା ପରେ ବାଲ୍ୟବିବାହ ର ସତ ସାମ୍ନାକୁ ଆସିଛି ।ସୁତ୍ରୁକୁମ୍ପା ଅଞ୍ଚଳ ର ଏହି ନାବାଳିକା ଜଣକ ଏବେ ୩ ମାସର ଗର୍ଭବତୀ ।

ଓଡିଶାରେ ଭଲିବଲକୁ ଗାଁରୁ ସହର ସବୁଠି ଲୋକପ୍ରିୟ କରାଯିବ । ଭାରତୀୟ ଭଲିବଲ ଫେଡେରେସନର ନବ ନିର୍ବାଚିତ ସଭାପତି ଡ. ଅଚ୍ୟୁତ ସାମନ୍ତ ଏହା ପ୍ରକାଶ କରିଛନ୍ତି । ଗ୍ରାମାଞ୍ଚଳରେ ଭଲିବଲରେ ବିକାଶ ଦିଗରେ ଉଦ୍ୟମ କରାଯିବ । ଓଡ଼ିଶାରେ ଅନେକ ପ୍ରତିଭାବାନ ଭଲିବଲ ଖେଳାଳି ଅଛନ୍ତି । ସେମାନଙ୍କୁ ଆଗକୁ ଆଣିବା ସହ କିପରି ଭାରତୀୟ ଭଲିବଲ ଦଳରେ ସାମିଲ ହୋଇପାରିବେ ସେଥିପାଇଁ ପ୍ରୟାସ କରାଯିବ ।

ଘର କାନ୍ଥରେ ଅଙ୍କାଯାଉଛି ଭଳିକି ଭଳି ଚିତ୍ର। କରୋନା ସମ୍ପର୍କିତ ସଚେତନତା ବାର୍ତା ବି ଲେଖାଯାଉଛି। କେଉଁଠି ମାସ୍କ ପିନ୍ଧିବା ନେଇ ବାର୍ତା ରହିଛି ତ ଆଉ କେଉଁଠି ହାତ ଧୋଇବା, ଘର ଓ ବାହାରକୁ ପରିସ୍କାର ପରିଚ୍ଛନ୍ନ ରଖିବା କଥା ବି ଉଲ୍ଲେଖ ହୋଇଛି। ଏଥିସହ ଓଡ଼ିଆଙ୍କ ବାର ମାସର ତେର ପର୍ବପର୍ବାଣୀ, ମହାପୁରୁଷଙ୍କ ବାଣୀ, ନିଜକୁ ସୁସ୍ଥ ରଖିବାର ଉପାୟ ବିଷୟରେ ବି ଚିତ୍ର ମାଧ୍ୟମରେ ଲୋକଙ୍କୁ ଅବଗତ କରାଯାଉଛି। ରାଜଧାନୀ ଉପକଣ୍ଠ ଗାଁରେ ଦେଖିବାକୁ ମିଳୁଛି ଏଭଳି ଚିତ୍ର। ସ୍ବୟଂ ସହାୟକ ଗୋଷ୍ଠୀ(ଏସ୍‌ଏସ୍‌ଜି)ର ମହିଳାମାନେ ଏହାର ଦାୟିତ୍ବ ନେଇଛନ୍ତି। ଦିନରାତି ଏକ କରି ଲୋକଙ୍କୁ ସ‌ଚେତନତାର ବାର୍ତା ବାଣ୍ଟି ଚାଲିଛନ୍ତି। ମଞ୍ଚେଶ୍ବର ଅଞ୍ଚଳର ବିଏମ୍‌ସି ୱାର୍ଡ ନମ୍ବର ୧୨ର ଆଦିମାତା କଲୋନି ଓ ୯ ନମ୍ବର ୱାର୍ଡର ରଙ୍ଗମାଟିଆ ଗାଁ ଶିଶୁ ଉଦ୍ୟାନ ଓ ମନ୍ଦିର ପାଚେରିରେ ଆକର୍ଷଣୀୟ ଚିତ୍ର ହୋଇଛି।

୩ ବର୍ଷରୁ କମ୍‌ ବୟସର ଶିଶୁମାନଙ୍କ ଯତ୍ନଓ ପୁଷ୍ଟିସାଧନ କୁ ଆଧାର କରି ସେମାନଙ୍କ ଶୈଶବର ବିକାଶ ପାଇଁ ମହିଳା ଓ ଶିଶୁବିକାଶ ଓ ମିସନ ଶକ୍ତି ପକ୍ଷରୁ ‘ବାତ୍ସଲ୍ୟ’ କାର୍ଯ୍ୟକ୍ରମ ଆରମ୍ଭ ହୋଇଛି। ଅଙ୍ଗନବାଡ଼ି କେନ୍ଦ୍ରରେ ଏହି ଶିଶୁମାନଙ୍କୁ ପରିପୂରକ ପୁଷ୍ଟିସାଧନ, ଟିକାକରଣ, ସ୍ବାସ୍ଥ୍ୟ ପରୀକ୍ଷା ଆଦି କାର୍ଯ୍ୟକ୍ରମକୁ ଗୁରୁତ୍ବ ଦିଆଯାଇଛି। ଭର୍ଚୁଆଲ ପ୍ଲାଟ୍‌ଫର୍ମ ଜରିଆରେ ଏହାର ଶୁଭାରମ୍ଭ କରିଛନ୍ତି ବିଭାଗୀୟ ମନ୍ତ୍ରୀ ଟୁକୁନି ସାହୁ। ମନ୍ତ୍ରୀ ଶ୍ରୀମତୀ ସାହୁ କହିଛନ୍ତି, ପ୍ରତ୍ୟେକ ଶିଶୁର ବିକଶିତ ଓ ପରିପୂର୍ଣ୍ଣ ଶୈଶବ ପାଇଁ ପିତାମାତାଙ୍କଠାରୁ ଆରମ୍ଭ କରି ପରିବାରର ପ୍ରତ୍ୟେକ ସଦସ୍ୟଙ୍କ ନିକଟରୁ ପର୍ଯ୍ୟାପ୍ତ ବାତ୍ସଲ୍ୟମମତା ପାଇବା ଆବଶ୍ୟକ।

କୋରାପୁଟ ଜିଲା ର ଦୁଗ୍ଧ ଉତ୍ପାଦନ କ୍ଷେତ୍ରରେ ବେଶ୍ ସୁନାମ ଅର୍ଜନ କରିଛନ୍ତି ନମିତା ପାଟ୍ଟଯୋଶୀ। କୋରାପୁଟ ଜାନିଗୁଡାଠାରେ ଥିବା ‘କାଞ୍ଚନ ଡାଏରି’ ର ମାଲିକାଣୀ ହେଉଛନ୍ତି ସେ । କାଞ୍ଚନ ଡାଏରି ମାଧ୍ୟମରେ ନିଜେ ସ୍ଵାବଲମ୍ବୀ ହେବା ସହ ଅନ୍ୟ ମହିଳାମାନଙ୍କୁ ବି ସେ ସ୍ଵାବଲମ୍ବୀ ହେବାର ବାଟ ଦେଖାଇଛନ୍ତି । ତାଙ୍କ ଡାଏରି ଫାର୍ମରେ ବର୍ତ୍ତମାନ ୧୪ ଜଣ ମହିଳା ଓ ୪ଜଣ ପୁରୁଷ,ଏମିତି ମୋଟ ୧୮ଜଣ ନିୟୋଜିତ ହୋଇଛନ୍ତି ।

ଏ ହେଉଛି ରାଜସ୍ଥାନ ଧୋଳପୁର ଜିଲାର ୩ ମହିଳାଙ୍କ କାହାଣୀ, ଯାହା ଆମକୁ ଘଟଣା ଭଳି ଲାଗେ । ଏମାନେ ଏମିତି କିଛି କରିଦେଖାଇଛନ୍ତି ଯାହା ଅନ୍ୟ ମହିଳାଙ୍କ ପାଇଁ ନିଶ୍ଚିତଭାବେ ପ୍ରେରଣା ଉତ୍ସ । ଛୋଟ ବେପାରକୁ କିଭଳି ବଡ କରାଯାଏ, ତାହା ଏହି ୩ ମହିଳା ପ୍ରମାଣିତ କରି ଦେଖାଇଛନ୍ତି । ପାଠ ବେଶି ପଢିନାହାନ୍ତି; ଅଥଚ ସମୟ ଓ ପରିଶ୍ରମର ମୂଲ୍ୟକୁ ବେଶ୍ ବୁଝିଛନ୍ତି। ମଫସଲରେ ଜନ୍ମିତ ଏହି ୩ ମହିଳା ମାତ୍ର ଅଢେଇ ବର୍ଷରେ ଦେଢ କୋଟି ଟଙ୍କାର କମ୍ପାନୀ ଛିଡା କରାଇ ଆଖପାଖର ୮୦୦ ମହିଳାଙ୍କୁ ଯୋଗାଇଛନ୍ତି ଦାନାପାଣି

ଗଂଜାମ ଜିଲ୍ଲା ଭଞ୍ଜନଗର ଠାରୁ ସୋରଡା ଯିବା ରାସ୍ତାରେ ଗାଙ୍ଗପୁର ଥାନା ଅନ୍ତର୍ଗତ ପଳାସପଲ୍ଲୀ ଗ୍ରାମବାସୀ। ପିଇବା ପାଣିକୁ ନେଇ ଭୋଗୁଥିଲେ କଷ୍ଟ । ଗ୍ରାମର ୩୫୦ ପରିବାର ପିଇବା ପାଣି ମୁନ୍ଦେ ପାଇଁ ଦୂର ଚୁଆ ଓ ଗାଡ଼ିଆ ଉପରେ ନିର୍ଭର କରୁଥିଲେ । ଗ୍ରାମାବାସୀଙ୍କ ଜଳ ଯାତନା ଦୂର କରିବାକୁ ଗାଁରେ ଏକ ପାନୀୟ ଜଳ ପ୍ରକଳ୍ପ ନିର୍ମାଣ ପାଇଁ ସରକାରୀ ସ୍ତରରେ ଦୁଇ ଦୁଇ ଥର ଉଦ୍ୟମ ହୋଇଥିଲା। ବାରମ୍ବାର ପରୀକ୍ଷା ନୀରିକ୍ଷା ପରେ ଭୂଗର୍ଭରେ ପାଣି ନଥିବା ଦର୍ଶାଇ ପ୍ରକଳ୍ପ ନିର୍ମାଣ ସର୍ଭେରେ ହିଁ ସୀମିତ ରହି ଯାଇଥିଲା।

ଓଡ଼ିଶାର ପ୍ରାକୃତିକ ପରିବେଶରେ ରହି ସୌନ୍ଦର୍ଯ୍ୟକୁ ଉପଭୋଗ କରିବାକୁ ଦେଶ ବିଦେଶର ପର୍ଯ୍ୟଟକମାନେ ଆଗ୍ରହୀ। ଏଣିକି ଇକୋ ଟୁରିଜିମ୍‌ କିମ୍ବା ପ୍ରାକୃତିକ ପର୍ଯ୍ୟଟନ ସ୍ଥଳୀରେ ଯେଉଁଠି କି ହୋଟେଲ ସୁବିଧା ନାହିଁ ସେଠାରେ ପର୍ଯ୍ୟଟକମାନଙ୍କୁ ଗାଁ ପରିବେଶରେ ରହିବା ପାଇଁ ସୁବିଧା ମିଳିବ। ଖାଲିସେତିକି ନୁହେଁ, ପର୍ଯ୍ୟଟନସ୍ଥଳୀ ଆଖପାଖ ଅଞ୍ଚଳରେ ଥିବା ସ୍ଥାନୀୟବାସିନ୍ଦାଙ୍କ ଅର୍ଥନୈତିକ ବିକାଶ ପାଇଁ ପର୍ଯ୍ୟଟକମାନଙ୍କୁ ହୋମ୍‌ ଷ୍ଟେ ସୁବିଧା ଯୋଗାଇବା ପାଇଁ ସରକାର ନିଷ୍ପତ୍ତି ନେଇଛନ୍ତି।

କରୋନା ମହାମାରୀ ଯୋଗୁଁ ରାଜ୍ୟରେ ଇଣ୍ଟରନେଟ୍‍ ସଂଯୋଗ ଧିମେଇ ଯାଇଛି । ଚଳିତବର୍ଷ ଜୁନ୍‍ ଶେଷ ସୁଦ୍ଧା ସମସ୍ତ ପଞ୍ଚାୟତକୁ ବ୍ରଡବ୍ୟାଣ୍ଡ ସଂଯୋଗ ପାଇଁ ଯେଉଁ ଲକ୍ଷ୍ୟ ଧାର୍ଯ୍ୟ ହୋଇଥିଲା ତାହାକୁ ଡିସେମ୍ବର ଶେଷକୁ ଘୁଞ୍ଚାଇ ଦିଆଯାଇଛି । ଓଡିଶାର ସମସ୍ତ ପଞ୍ଚାୟତକୁ ଭାରତ ନେଟ୍‍ ଯୋଜନାରେ ଇଣ୍ଟରନେଟ୍‍ ସଂଯୋଗ କରାଯାଉଛି । ଦୁଇ ପର୍ଯ୍ୟାୟରେ ଏହି ଯୋଜନା କାର୍ଯ୍ୟକାରୀ ହେଉଥିବାବେଳେ ଦ୍ୱିତୀୟ ପର୍ଯ୍ୟାୟ କାମରେ କରୋନା ମହାମାରୀ ବାଧକ ସାଜିଛି ।

କୃଷି ଓ କୃଷକ ସଶକ୍ତିକରଣ ବିଭାଗର ‘ଦକ୍ଷତା’ କାର୍ଯ୍ୟକ୍ରମରେ ସୁନ୍ଦରଗଡ଼ ଜିଲ୍ଲାର ୫ ଜଣ କ୍ଷେତ୍ର କର୍ମଚାରୀଙ୍କୁ ସମ୍ମାନିତ କରାଯାଇଛି। ଶୁକ୍ରବାର ଦିନ ଭିଡିଓ କନଫରେନ୍ସିଂ ଜରିଆରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବିଭିନ୍ନ ଜିଲ୍ଲାର ୨୨ ଜଣ ଏଭଳି ଦକ୍ଷ କର୍ମଚାରୀମାନଙ୍କୁ ପ୍ରଶଂସା କରିଛନ୍ତି। ସେପ୍ଟେମ୍ବର ଏବଂ ଅକ୍ଟୋବର ମାସ ପାଇଁ ଜିଲ୍ଲାର ୫ ଜଣ କୃଷି ଅଧିକାରୀ ଓ କର୍ମଚାରୀଙ୍କୁ ପ୍ରଶଂସାପତ୍ର ମିଳିଛି। ନିଜ ନିଜ କ୍ଷେତ୍ରରେ ପାରଦର୍ଶିତା ସହ ଚାଷୀମାନଙ୍କ ପାଖରେ ସରକାରୀ ଯୋଜନାର ସୁଫଳ ପହଞ୍ଚାଇବା କ୍ଷେତ୍ରରେ ଉଲ୍ଲେଖନୀୟ କାର୍ଯ୍ୟ କରୁଥିବା କର୍ମଚାରୀଙ୍କୁ ପ୍ରୋତ୍ସାହନ ଦେବା ଲାଗି ବିଭାଗ ପକ୍ଷରୁ ଏହି ପଦକ୍ଷେପ ନିଆଯାଇଛି।

୨୦ ବର୍ଷ ପାକିସ୍ତାନ ଜେଲରେ ବନ୍ଦୀ ଜୀବନ କାଟିବାପରେ ନିର୍ଦ୍ଦୋଷରେ ଖଲାସ ହୋଇ ନିଜ ଗାଁ କୁତ୍ରାକୁ ଫେରିଛନ୍ତି ବିରଜୁ କୁଲୁ । ଶୁକ୍ରବାର ସକାଳ ୧୦ଟା ୧୦ ମିନିଟରେ କୁତ୍ରା ବିଡିଓ ବିରଜୁ କୁଲୁଙ୍କୁ ବ୍ଲକ୍ ପରିସରରେ ସମ୍ବର୍ଦ୍ଧନା ଦେବା ସହ ତାଙ୍କୁ ଖୁବ ଶୀଘ୍ର ଆଧାର କାର୍ଡ ଓ ରାସନ କାର୍ଡ ଯୋଗାଇ ଦିଆଯିବ ବୋଲି ଘୋଷଣା କରିଛନ୍ତି। ସୂଚନାଯୋଗ୍ୟ, ଗତକାଲି ରାତିରେ ସେ କୁତ୍ରା ଠାରୁ ୧୩୨ କିଲୋମିଟର ଦୂର ଝାରଖଣ୍ଡ ରାଜ୍ୟ ଗୁମଲାରେ ପହଞ୍ଚି ରାତି କାଟିବା ପରେ ଆଜି ସକାଳୁ କୁତ୍ରା ଅଭିମୁଖେ ଵାହାରିଥିଲେ।

ଦୀର୍ଘ ୨୫ ବର୍ଷର ପ୍ରତୀକ୍ଷା ରେ ଅନ୍ତ ଘଟିବାକୁ ଯାଉଛି । ଦୀର୍ଘ ୨୦ ବର୍ଷ ପାକିସ୍ତାନ ଜେଲରେ ରହିବା ପରେ ବିରଜୁ ନିଜ ଜନ୍ମମାଟି ସୁନ୍ଦରଗଡ଼ ଜିଲ୍ଲା କୁତ୍ରା ବ୍ଲକ ଅନ୍ତର୍ଗତ କଟଙ୍ଗଜଙ୍ଗର ପଡାକୁ ଫେରୁଛନ୍ତି। ବନ୍ଦୀ ଜୀବନ କାଟିବା ପରେ ଭାରତକୁ ଫେରିଥିବା ସୁନ୍ଦରଗଡ଼ ଜିଲ୍ଲା କୁତ୍ରା ବ୍ଲକ୍ ଅନ୍ତର୍ଗତ କଟଙ୍ଗଜଙ୍ଗର ପଡାର ବିରଜୁ କୁଲୁଙ୍କୁ ଆଣିବାକୁ ଅମୃତସର ଯାଇଥିଲା ପ୍ରଶାସନ।

ମହାତ୍ମା ଗାନ୍ଧୀ ଜାତୀୟ ନିଶ୍ଚିତ କର୍ମ ନିଯୁକ୍ତି ଆଇନ ବା ନରେଗା କାର୍ଯ୍ୟ ଗୁଡିକରେ ଜିଲ୍ଲାର ଅଣକୁଶଳୀ ଶ୍ରମିକଙ୍କୁ ଏଣିକି ଦୈନିକ ୩୦୩ ଟଙ୍କା ୪୦ ପଇସା ମଜୁରି ମିଳିବ। ଆଗରୁ ଦୈନିକ ମଜୁରି ୨୦୭ ଟଙ୍କା ରହିଥିଲା। ଏବେ ଦୈନିକ ଅଧିକ ୯୬ ଟଙ୍କା ୪୦ ପଇସା ମଜୁରି ପ୍ରଦାନ କରାଯିବ। ଏହି ଅତିରିକ୍ତ ଅର୍ଥ ସୁନ୍ଦରଗଡ଼ ଜିଲ୍ଲା ଖଣିଜ ପ୍ରତିଷ୍ଠାନ (ଡିଏମଏଫ) ପାଣ୍ଠିରୁ ପ୍ରଦାନ କରାଯିବ। କୋଭିଡ୍ ମହାମାରୀ ପରିସ୍ଥିତିରେ ଜିଲ୍ଲାର ଶ୍ରମିକ ଏବଂ ସାଧାରଣ ବର୍ଗର ଲୋକଙ୍କ ଆର୍ଥିକ ସ୍ଥିତିରେ ସୁଧାର ଆଣିବା ପାଇଁ ନରେଗା ଯୋଜନାରେ ଅଧିକ କର୍ମ ନିଯୁକ୍ତି ଲାଗି ଜିଲ୍ଲା ପ୍ରଶାସନ ଉଦ୍ୟମ କରି ଆସୁଛି।

ଦିନେ ନୁହଁ କି ମାସେ ନୁହଁ ,ଦୀର୍ଘ ୨୦ ବର୍ଷ କାଳ ପାକିସ୍ତାନର ଲାହୋର ଜେଲର କାଳ କୋଠରି ରେ ନାରକୀୟ ଯାତନା ଭୋଗିବା ପରେ ମୁକ୍ତି ପାଇଁ ଗାଁକୁ ଫେରୁଛନ୍ତି ଓଡିଆ ପୁଅ । ସୁନ୍ଦରଗଡ କୁତ୍ରାବ୍ଲକର ଜଙ୍ଗଲଟୋଲି ଗାଁ କୁ ଏବେ ମାଟିର ପୁଅ ବିରଜୁ ପାଇଁ ଘାରିଛି ଚିନ୍ତା । ଏହି ଗାଁର ବିରଜୁ ଏବେ ଫେରୁଛନ୍ତି ଗାଁକୁ । ତାଙ୍କୁ ଟିକେ ଦେଖିବା ଓ ଘଟଣା ବିଷୟରେ ଜାଣିବା ପାଇଁ ଉସ୍ଚୁକତା ସୃଷ୍ଟି ହୋଇଛି । ୨୦ ବର୍ଷ ଧରି କିଭଳି ସେ କାଟିଛନ୍ତି ନିସଙ୍ଗ ଜୀବନ। କିଭଳି ସେ ମୁକୁଳିଲେ ତାକୁ ନେଇ ଲୋକେ ଶୁଣିବା ଦିନଠାରୁ ଉତ୍ତର ଖୋଜୁଛନ୍ତି ।ବିରଜୁ ଗାଁରେ ପହଁଚିଲେ ମିଳିଯିବ ସବୁ ପ୍ରଶ୍ନର ଉତ୍ତର ।

ମାଲକାନଗିରି ଜିଲ୍ଲାର ଲାଲଗଡ଼ କୁହାଯାଉଥିବା ଚିତ୍ରକୋଣ୍ଡା ବ୍ଲକ୍ ସ୍ବାଭିମାନ ଅଞ୍ଚଳ ଏବେ ବିଏସ୍ଏଫ୍ ହାତରେ। ଧୀରେ ଧୀରେ ସମ୍ପୂର୍ଣ୍ଣ ଲାଲଗଡ଼କୁ ନିଜ କବ୍‌ଜାକୁ ନେବାକୁ ବିଏସ୍‌ଏଫ୍‌ ନିଜକୁ ପ୍ରସ୍ତୁତ କରିସାରିଲାଣି। ପ୍ରଥମେ ଯନ୍ତାପାଇ, ପରେ ହନ୍ତାଳଗୁଡ଼ା, ତାପରେ ଦାର୍ଲାବେଡ଼ା ଓ ଏବେ ଗୋରାସେତୁକୁ ବିଏସ୍‌ଏଫ୍‌ ନିଜ କବ୍‌ଜାକୁ ନେଇଛି। ଯାହା ନକ୍ସଲଙ୍କ ପାଇଁ ଏବେ ଚିନ୍ତାର କାରଣ ପାଲଟିଛି। ଆଗକୁ ପଣସପୁଟ ଓ ଯନ୍ତ୍ରୀ ଭଳି ନକ୍ସଲ ପ୍ରବଣ ଅଞ୍ଚଳକୁ ବିଏସ୍‌ଏଫ୍‌ କବ୍‌ଜାକୁ ନେବା ପରେ ଏହି ଅଞ୍ଚଳ ସମ୍ପୂର୍ଣ୍ଣ ମାଓମୁକ୍ତ ହେବ।ଲାଲଗଡ଼ରେ ସବୁବେଳେ ନକ୍ସଲ କଳା ପତାକା ଉଡ଼ାଉଥିଲେ।

କୋରାପୁଟ ଜିଲ୍ଲାରେ ୩୩୩ଟି ପ୍ରାଥମିକ ବିଦ୍ୟାଳୟ ବନ୍ଦ ହେବ। ଏହି ବିଦ୍ୟାଳୟ ଗୁଡିକରେ ଉପସ୍ଥାନ ୨୦ କିମ୍ବା ଏହାଠାରୁ କମ୍ ହୋଇଥିବାରୁ ଏଗୁଡିକୁ ବନ୍ଦ କରିବା ପାଇଁ ନିଷ୍ପତ୍ତି ନିଆଯାଇଛି। ସେହିପରି ୨୦ରୁ ଅଧିକ ଛାତ୍ରଛାତ୍ରୀ ଥିଲେ ମଧ୍ୟ ୧ କିମି ଦୂରତା ଭିତରେ ଅନ୍ୟ ବିଦ୍ୟାଳୟ ଥିବାରୁ ଆଉ ୩୬ଟି ବିଦ୍ୟାଳୟ ବନ୍ଦ ହେବ । ଏମିତିରେ ଜିଲ୍ଲାରୁ ୩୬୯ଟି ବିଦ୍ୟାଳୟ ଇତିହାସ ପାଲଟିବାକୁ ଯାଉଛି। ଅପରପକ୍ଷରେ ୧୧୭ଟି ବିଦ୍ୟାଳୟରୁ ଷଷ୍ଠରୁ ଅଷ୍ଟମ ଶ୍ରେଣୀକୁ ବାଦ ଦିଆଯାଇ କେବଳ ପ୍ରଥମରୁ ପଞ୍ଚମ ପର୍ଯ୍ୟନ୍ତ ପାଠ ପଢା ହେବ। ଏଥିନେଇ ରାଜ୍ୟ ସରକାରଙ୍କ ପକ୍ଷରୁ ବିଧିବଦ୍ଧ ବିଜ୍ଞପ୍ତି ପ୍ରକାଶ ପାଇଛି। ବନ୍ଦ ହେବାକୁ ଥିବା ଏହି ସ୍କୁଲଗୁଡିକ ନିକଟସ୍ଥ ବିଦ୍ୟାଳୟରେ ମିଶ୍ରଣ କରାଯିବ।

ଆଜି ହେଉଛି ଓଡିଶା ଗୀତିନାଟ୍ୟ ର ମୁକୁଟ ବିହୀନ ସମ୍ରାଟ ଗଣକବି ବୈଷ୍ଣବ ପାଣିଙ୍କ ଜୟନ୍ତୀ। କଟକ ଜିଲ୍ଲା ମାହାଙ୍ଗା କୋଠପଦା ଗାଁରେ କୁମାରପୂର୍ଣ୍ଣିମା ତିଥିରେ ତାଙ୍କର ଜନ୍ମ ହୋଇଥିଲା। ଓଡିଶା ମଞ୍ଚ ଓ ସାହିତ୍ୟର ଏହି ଯଶସ୍ବୀ ସ୍ରଷ୍ଟା ନ୍କ ଜନ୍ମ ମାଟି ଆଜି ଅବହେଳିତ ଓ ଅଲୋଡା ହୋଇ ରହିଛି , ଅଧପନ୍ତରିଆ ହୋଇ ପଡିଛି କବିଙ୍କ ସ୍ମୃତି ସମ୍ବଳିତ ରଘୁନାଥ ଜିୟୁ ମଠ ଓ ରଙ୍ଗମଞ୍ଚ । ସ୍ମୃତି କହିଲେ ଭଙ୍ଗା ବାକ୍ସ ଭିତରେ ପିଢ଼ି ପରେ ପିଢ଼ି ସାଇତା ହୋଇ ରଖାଯାଇଥିବା ତାଙ୍କ ନିତ୍ୟ ବ୍ୟବହାର୍ଯ୍ୟ ସାମଗ୍ରୀ।