ଶବ ସତ୍କାର ଅନୁମତି ପରେ ସ୍ୱର୍ଗଦ୍ୱାରକୁ କରାଗଲା ବିଶୋଧନ

ସ୍ୱର୍ଗଦ୍ୱାରରେ ବାହାର ଜିଲ୍ଲା ଲୋକଙ୍କ ଶବସତ୍କାର ଉପରୁ କଟକଣା ହଟିଛି । ଏହାପରେ ଆଜି ଅଗ୍ନିଶମ ବିଭାଗ ପକ୍ଷରୁ ସ୍ୱର୍ଗଦ୍ୱାରକୁ ସାନିଟାଇଜ କରାଯାଇଛି । ସ୍ୱର୍ଗଦ୍ୱାର ପରିସର, ଚାରିପାଖ ଓ ଅଫିସକୁ ବିଶୋଧନୀକରଣ କରାଯାଇଛି । ଗତକାଲି ପୁରୀ ଜିଲ୍ଲା ପ୍ରଶାସନ ପକ୍ଷରୁ ବାହାର ଜିଲ୍ଲାର ଶବଦାହ ଉପରୁ କଟକଣା ହଟାଯାଇଥିଲା । କିନ୍ତୁ ବଳବତ୍ତର ରହିବ କୋଭିଡ୍ କଟକଣା । ଶେଷକୃତ୍ୟ ବେଳେ ସ୍ୱର୍ଗଦ୍ୱାରରେ କୋଭିଡ୍‌ ନିୟମକୁ କଡ଼ାକଡ଼ି ପାଳନ କରାଯିବ ।

ଓଡ଼ିଶା ବିଶ୍ୱବିଦ୍ୟାଳୟ ସଂ‌‌ଶୋଧନ ଆଇନକୁ ଚାଲେଞ୍ଜ ପାଇଁ ଅନୁମତିଦେଲେ ଉଚ୍ଚ ନ୍ୟାୟାଳୟ

ଓଡ଼ିଶା ବିଶ୍ୱବିଦ୍ୟାଳୟ ସଂଶୋଧନ ଅଧ୍ୟାଦେଶ ବିରୋଧରେ ଦାୟର ମାମଲାର ଶୁଣାଣି କରି ଏ ସଂପର୍କିତ ଆଇନକୁ ଚାଲେଞ୍ଜ କରିବା ପାଇଁ ଆବେଦନକାରୀଙ୍କୁ ହାଇକୋର୍ଟ ଅନୁମତି ଦେଇଛନ୍ତି। ମୁଖ୍ୟ ବିଚାରପତି ଜଷ୍ଟିସ ମହମ୍ମଦ ରଫିକ୍ ଓ ଡକ୍ଟର ଜଷ୍ଟିସ ବି.ଆର.ଷଡଙ୍ଗୀଙ୍କୁ ନେଇ ଗଠିତ ଖଣ୍ଡପୀଠ ବିଶିଷ୍ଟ ଶିକ୍ଷାବିତ ତଥା ଜେଏନ୍‌ୟୁର ପୂର୍ବତନ ପ୍ରଫେସର ଅଜିତ କୁମାର ମହାନ୍ତିଙ୍କ ଆବେଦନର ଶୁଣାଣି କରି ଏପରି ନିର୍ଦ୍ଦେଶ ଦେଇଛନ୍ତି।

ଓଡ଼ିଶାରେ ବେକାରୀ ହାର ବୃଦ୍ଧି ପାଇ ୨.୧ ପ୍ରତିଶତରେ ପହଞ୍ଚିଛି

ଓଡ଼ିଶାରେ ବେକାରୀ ହାର ଚଳିତ ବର୍ଷ ସେପ୍ଟେମ୍ବରରେ ଅଗଷ୍ଟ ତୁଳନାରେ ବୃଦ୍ଧି ପାଇ ୨.୧ ପ୍ରତିଶତରେ ପହଞ୍ଚିଛି। ଅଗଷ୍ଟ ୨୦୨୦ରେ ଏହା ରହିଥିଲା ୧.୪ ପ୍ରତିଶତ । ଅପରପକ୍ଷେ ଓଡ଼ିଶାରେ ୨୦୨୦ ଜୁଲାଇରେ ଏହା ରହିଥିଲା ୧.୯ପ୍ରତିଶତ । ଗତକାଲି ସେଣ୍ଟର୍‌ ଫର୍‌ ମନିଟରିଂ ଇଣ୍ଡିଆନ୍ ଇମୋନୋମି(ସିଏମ୍‌ଆଇଇ) ଦ୍ବାରା ଦେଶରେ ବେକାରୀର ତାଜା ସ୍ଥିତିକୁ ନେଇ ପ୍ରକାଶିତ ରିପୋର୍ଟରେ ଏହି ତଥ୍ୟ ଉଲ୍ଲେଖ ରହିଛି।ସିଏମ୍‌ଆଇଇର ରିପୋର୍ଟ ଅନୁସାରେ ୨୦୨୦ ମସିହା ସେପ୍ଟେମ୍ବର ମାସରେ ଓଡ଼ିଶାର ଗ୍ରାମାଞ୍ଚଳରେ ବେକାରୀ ୨.୦ ପ୍ରତିଶତ ରହିଥିବା ବେଳେ ସହରାଞ୍ଚଳରେ ଏହାର ପ୍ରତିଶତ ରହିଛି ୨.୪।

କରୋନା କାଳରେ ଓଡ଼ିଶାକୁ ୨୨,୨୬୭.୬୬ କୋଟି ଟଙ୍କାର ପ୍ୟାକେଜ ଦେଇଛି କେନ୍ଦ୍ର

କରୋନା ମହାମାରୀ ଆରମ୍ଭରୁ ଏ ପର୍ଯ୍ୟନ୍ତ ଓଡ଼ିଶାକୁ ୨୨,୨୬୭.୬୬ କୋଟି ଟଙ୍କାର ପ୍ୟାକେଜ ଦିଆଯାଇଛି । ଏଭଳି ସୂଚନା ଦେଇଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ପ୍ରଧାନମନ୍ତ୍ରୀ ଗରିବ କଲ୍ୟାଣ ଯୋଜନାରେ ରାଜ୍ୟର 3.17 କୋଟି ହିତାଧିକାରୀଙ୍କୁ ମାସିକ 5 କେଜି ଚାଉଳ ଏବଂ ପ୍ରତି ପରିବାରକୁ ମାସିକ 1 କେଜି ଡାଲି ଯୋଗାଇ ଦିଆଯିବା ହିସାବରେ 92.85 ଲକ୍ଷ ହିତାଧିକାରୀଙ୍କ ପରିବାରକୁ ଡାଲି ପ୍ରଦାନ କରାଯାଇଛି ।

ଏହି ୫ ଜିଲ୍ଲାରେ ବଢୁଛନ୍ତି ସଂକ୍ରମିତ

ରାଜ୍ୟରେ କରୋନା କାୟା ଧୀରେ ଧୀରେ କମୁଛି । ଏବେ ଦୈନିକ ୩ ହଜାରରୁ କମ୍ ନୂଆ ଆକ୍ରାନ୍ତ ଚିହ୍ନଟ ହେଉଛନ୍ତି । ଖୋର୍ଦ୍ଧା ଓ କଟକରେ ପଜିଟିଭ୍ କେସ୍ ଦିନକୁ ଦିନ ଖସୁଥିବା ବେଳେ ଚିନ୍ତା ବଢ଼ାଇଛି ଅନୁଗୋଳ ଓ ମୟୂରଭଞ୍ଜ ଜିଲ୍ଲା । ସେହିପରି ସୁନ୍ଦରଗଡ଼ରେ ବି ବଢୁଛି ନୂଆ ସଂକ୍ରମିତଙ୍କ ସଂଖ୍ୟା । ଏହି ପାଞ୍ଚ ଜିଲ୍ଲା ରାଜ୍ୟରୁ ଦୈନିକ ଅଧିକ ସଂକ୍ରମିତ ହେଉଥିବା ବେଳେ ଆକ୍ଟିଭ୍ କେସ୍ ବି ଅଧିକ ରହିଛି ।ଗତ ୨୪ ଘଣ୍ଟାରେ ଖୋର୍ଦ୍ଧାରୁ ସର୍ବାଧିକ ୩୬୮ ଜଣ ସଂକ୍ରମିତ ହୋଇଛନ୍ତି ।

ଓଡ଼ିଶା ଚାଷୀଙ୍କ ବାର୍ଷିକ ଆୟ ୯୨,୭୭୨ ଟଙ୍କା

ଓଡ଼ିଶାରେ ଚାଷୀ ପରିବାରର ହାରାହାରି ବାର୍ଷିକ ଆୟ ହେଉଛି ୯୨,୭୭୨ ଟଙ୍କା। ଜାତୀୟ ସ୍ତରର ହାରାହାରି ଆୟ ୧,୦୭,୧୭୨ ଟଙ୍କା ଠାରୁ ଏହା ପ୍ରାୟ ୧୪ ହଜାର ଟଙ୍କା କମ୍। ଛତିଶଗଡ଼, ଗୁଜରାଟ, ହରିୟାଣା, ହିମାଚଳପ୍ରଦେଶ, ମଧ୍ୟପ୍ରଦେଶ, ମହାରାଷ୍ଟ୍ର, ପଞ୍ଜାବ, ରାଜସ୍ଥାନ, ତାମିଲନାଡୁ, ତେଲେଙ୍ଗାନା, ଉତ୍ତରାଖଣ୍ଡ ଓ ପଶ୍ଚିମବଙ୍ଗର ଚାଷୀ ପରିବାରଗୁଡ଼ିକର ବାର୍ଷିକ ହାରାହାରି ଆୟ ଓଡ଼ିଶା ଠାରୁ ଯଥେଷ୍ଟ ଅଧିକ ରହିଛି। ପଞ୍ଜାବ ଚାଷୀ ପରିବାରର ବାର୍ଷିକ ହାରାହାରି ଆୟ ସର୍ବାଧିକ ୨,୭୭,୫୯୬ ଟଙ୍କା ରହିଛି।

କିଲୋ ୬୦ ଛୁଇଁଲା ପିଆଜ

ପୁଣି ପିଆଜ ଦର ବୃଦ୍ଧି ଘଟିଛି। ମଙ୍ଗଳବାର ରାଜଧାନୀର ଖୁଚୁରା ବଜାରରେ ପିଆଜ କିଲୋ ୬୦ ଟଙ୍କା ଛୁଇଁଛି। ଆମଦାନୀରେ କୌଣସି ପ୍ରଭାବ ପ୍ରଭାବ ପଡ଼ିନଥିଲେ ହେଁ ମହାରାଷ୍ଟ୍ର ଓ କର୍ଣ୍ଣାଟକରେ ଦର ବୃଦ୍ଧି ଓଡ଼ିଶା ବଜାରକୁ ପ୍ରଭାବିତ କରିଥିବା କୁହାଯାଉଛି। ଦରବୃଦ୍ଧିକୁ ନିୟନ୍ତ୍ରଣ କରିବାକୁ ସରକାର ରପ୍ତାନି ଉପରେ କଟକଣା ଲଗାଇଥିବା ସତ୍ତ୍ବେ ପିଆଜ ବଜାର ତାତି ହ୍ରାସ ପାଇବା ନାଁ ଧରୁନାହିଁ। ଅମଳ ଋତୁ ଆରମ୍ଭ ହେବାକୁ ଯାଉଥିଲେ ବି ନିକଟ ଭବିଷ୍ୟତରେ ପିଆଜ ଦର ହ୍ରାସ ପାଇବା ଆଶା କମ୍ ବୋଲି ବ୍ୟବସାୟୀ ମହଲରୁ ସୂଚନା ମିଳିଛି। ନଭେମ୍ବର ମାସ ବେ‌ଳକୁ ପିଆଜ ଦର କମିବା ସମ୍ଭାବନା ରହିଛି, ମାତ୍ର ସେହି ସମୟ ପର୍ଯ୍ୟନ୍ତ ପିଆଜ ଦର ଆହୁରି ବଢ଼ିବା କିଛି ଅସମ୍ଭବ ନୁହେଁ ବୋଲି ବ୍ୟବସାୟୀମାନେ ଆକଳନ କରୁଛନ୍ତି।

ଅମୃତ ଯୋଜନାରେ କେନ୍ଦ୍ରରୁ ମିଳିଛି ୮୮୫ କୋଟି-କେନ୍ଦ୍ରମନ୍ତ୍ରୀ ପ୍ରଧାନ

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ବରେ ଭାରତ ସରକାର ‘ଅମୃତ’ ଯୋଜନା ମାଧ୍ୟମରେ ଓଡ଼ିଶାକୁ ୨୦୧୫-୨୦ ମଧ୍ୟରେ ୮୮୫.୫୮ କୋଟି ଟଙ୍କା ପ୍ରଦାନ କରିଛନ୍ତି। ଏହା ଓଡ଼ିଶାରେ ସହରାଞ୍ଚଳ ବିକାଶ କରିବା ପାଇଁ ପ୍ରଧାନମନ୍ତ୍ରୀଙ୍କ ଥିବା ପ୍ରତିବଦ୍ଧତାକୁ ଦର୍ଶାଉଛି ବୋଲି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଟ୍ବିଟ୍‌ କରି କହିଛନ୍ତି। ଶ୍ରୀ ପ୍ରଧାନ କହିଛନ୍ତି ଯେ ଅଟଳ ମିସନ୍ ‘ଅମୃତ’ ଯୋଜନା ମାଧ୍ୟମରେ ଓଡ଼ିଶାର ଭୁବନେଶ୍ବର, ଭଦ୍ରକ, ବାଲେଶ୍ବର, ବ୍ରହ୍ମପୁର, କଟକ, ପୁରୀ, ରାଉରକେଲା ଓ ସମ୍ବଲପୁର ପରି ସହରଗୁଡ଼ିକରେ ସହରାଞ୍ଚଳ ଭିତ୍ତିଭୂମିର ଉନ୍ନତୀକରଣ କରାଯାଉଛି।

ରାଜ୍ୟ ରେ ପ୍ରଥମ,ମହାମାରୀ ପାଇଁ ଭୂତାଣୁ ବିଜ୍ଞାନରେ ଆରମ୍ଭ ହେଲା ଶିକ୍ଷାଦାନ

କୋଭିଡ୍-୧୯ର ବ୍ୟାପକତା ପଛରେ ଭୂତାଣରୁ ପ୍ରଭାବକୁ ଦୃଷ୍ଟିରେ ରଖି ଓଡ଼ିଶାର ସର୍ବପ୍ରଥମ ଜନସ୍ବାସ୍ଥ୍ୟ ବିଶ୍ବବିଦ୍ୟାଳୟ ଭୂତାଣୁ ବିଜ୍ଞାନରେ ଦୁଇବର୍ଷିଆ ସ୍ନାତକୋତ୍ତର ପାଠ୍ୟକ୍ରମ ଚଳିତ ଶିକ୍ଷାବର୍ଷଠାରୁ ଆରମ୍ଭ କରିଛି। ଏହି ପାଠ୍ୟକ୍ରମ ଓଡ଼ିଶାରେ ପ୍ରଥମ ଓ ଦେଶରେ ଦ୍ବିତୀୟ। ଚାରି ସେମିଷ୍ଟାର ବିଶିଷ୍ଟ ଏହି ପାଠ୍ୟକ୍ରମ ନିରନ୍ତର ଶିକ୍ଷା ଓ ମୂଲ୍ୟାୟନ ମାଧ୍ୟମରେ ପ୍ରଦାନ କରାଯିବ।

କୋଠାବାଡ଼ି ଡିଭିଜନ୍‌ହାତରେ ବିଧାନସଭା ଅତିଥି ଭବନ ଓ ବିଧାୟକ କ୍ୱାର୍ଟର

ବିଧାନସଭା ଅଧୀନସ୍ଥ ପଟେଲ ହଲ୍‌(ପୁରାତନ ବିଧାନସୌଧ), ପୂର୍ବତନ ବିଧାୟକଙ୍କ ଅତିଥି ଭବନ, ନୂଆ ଅତିଥି ଭବନ ଓ ବିଧାୟକଙ୍କ ବାସଗୃହ ରକ୍ଷଣାବେକ୍ଷଣ ରାସ୍ତା ଓ କୋଠାବାଡ଼ି ଡିଭିଜନ୍‌୧ କରିବ। ଏ ନେଇ ଆଜି ବାଚସ୍ପତି ସୂର୍ଯ୍ୟ ନାରାୟଣ ପାତ୍ରଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ନିଷ୍ପତ୍ତି ହୋଇଛି।

ଆଜି ବିଶ୍ବ ବାସହୀନ ଦିବସ,ଓଡ଼ିଶାରେ ସହରାଞ୍ଚଳ ବାସହୀନଙ୍କ ସଂଖ୍ୟା ୧୩,୬୫୧

ଆଜି ସାରା ବିଶ୍ୱ ପାଳନ କରୁଛି ବିଶ୍ବ ବାସହୀନ ଦିବସ । ସାରା ବିଶ୍ୱରେ ୧୦ ମିଲିୟନ ରୁ ଅଧିକ ଲୋକଙ୍କ ମୁଣ୍ଡ ଉପରେ ଛାତ ଟିଏ ନାହିଁ ।ସେହିପରି ଆମ ଦେଶରେ ୧.୭୭ ମିଲିୟନ ଲୋକ ରାସ୍ତା କଡ଼ରେ ଖୋଲା ଆକାଶ ତଳେ ମେଲାଇଛନ୍ତି ସଂସାର । ଓଡ଼ିଶାରେ ସହରାଞ୍ଚଳ ବାସହୀନଙ୍କ ସଂଖ୍ୟା ୧୩,୬୫୧।

ପ୍ରାକୃତିକ ଗ୍ୟାସ ସଂସ୍କାର କୁ ମଞ୍ଜୁରୀ

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତା‌ରେ ଅନୁଷ୍ଠିତ ଅର୍ଥନୈତିକ ବ୍ୟାପାର ସଂକ୍ରାନ୍ତ କ୍ୟାବିନେଟ୍‌ କମିଟି ବୈଠକରେ ‘ପ୍ରାକୃତିକ ଗ୍ୟାସ ବିପଣନ ସଂସ୍କାର’କୁ ମଞ୍ଜୁରି ପ୍ରଦାନ କରାଯାଇଛି। ପ୍ରାକୃତିକ ଗ୍ୟାସ୍‌ର ମୂଲ୍ୟ ନିର୍ଧାରଣ କ୍ଷେତ୍ରରେ ଏହା ପାରଦର୍ଶିତା ଓ ପ୍ରତିଯୋଗିତା ଆଣିବ। ଏହି ସଂସ୍କାର ଦ୍ବାରା ଗ୍ୟାସ ଆଧାରିତ ଅର୍ଥନୀତିକୁ ବଡ଼ ଧରଣର ଶକ୍ତି ମିଳିବ।

ଚିଲିକାରେ ଫିସିଙ୍ଗ୍‌ କ୍ୟାଟ୍‌ ଗଣନା କରାଯିବ, ଉଦ୍ଧାର, ପୁନର୍ବାସ କେନ୍ଦ୍ର ଖୋଲାଯିବ

ଫିସିଙ୍ଗ କ୍ୟାଟ୍‌ (ମାଛରଙ୍କା ବିରାଡ଼ି)କୁ ଭାରତର ସର୍ବ ପୁରାତନ ରାମସାର୍‌ ସାଇଟ୍‌ ଚିଲିକାର ଆମ୍ବାସଡର କରାଯାଇଛି। ଚିଲିକା ଉନ୍ନୟନ କର୍ତୃପକ୍ଷ (ସିଡିଏ) ଦ୍ବାରା ଆୟୋଜିତ ବନ୍ୟପ୍ରାଣୀ ସପ୍ତାହ ପାଳନ ଅବସରରେ ଏହା ଘୋଷଣା କରାଯାଇଛି। ଏସିଆର ସର୍ବବୃହତ୍‌ ଲୁଣିହ୍ରଦ ଚିଲିକାର ଆମ୍ବାସଡର ବିବେଚିତ ଏହି ବଣୁଆ ବିଲେଇ ସମଗ୍ର ବିଶ୍ବରେ ଲୁପ୍ତପ୍ରାୟ ହୋଇଯାଇଥିବା ବେଳେ ଚିଲିକାର ଆଖପାଖରେ ଏମାନଙ୍କୁ ଦେଖିବାକୁ ମିଳେ।

୩ ହଜାରରୁ ଅଧିକ ନାବାଳିକାଙ୍କ ପତ୍ତା ମିଳୁନି

ଓଡ଼ିଶାରେ ଶିଶୁ ନିଖୋଜସ୍ଥିତି ଉଦ୍‌ବେଗଜନକ ଅଟେ। ବିଶେଷ କରି ରାଜ୍ୟରେ ଅଧିକ ସଂଖ୍ୟାରେ ନାବାଳିକା ନିଖୋଜ ଅଛନ୍ତି। ୨୦୧୯ ମସିହାର ରେକର୍ଡ ଅନୁସାରେ ନିଖୋଜ ୪୦୧୩ ଶିଶୁଙ୍କ ଭିତରେ ୩୨୫୯ ଜଣ ନାବାଳିକା ରହିଛନ୍ତି। ୨୦୧୯ ସୁଦ୍ଧା ଉଦ୍ଧାର ହୋଇଥିବା ୧୪୯୦ ଜଣଙ୍କ ମଧ୍ୟରୁ ନାବାଳିକା ସଂଖ୍ୟା ୧୧୭୬। ୨୦୧୯ ସୁଦ୍ଧା ଶିଶୁ ନିଖୋଜ ମାମଲାରେ ଓଡିଶା ଦେଶରେ ଚାରି ନମ୍ବରରେ ରହିଛି। ବିହାରରେ ସବାଧିକ ୭୧୯୬, ପଶ୍ଚିମବଙ୍ଗରେ ୫୮୨୨ ଓ ମଧ୍ୟପ୍ରଦେଶରେ ୫୮୦୨ ଶିଶୁ ନିଖୋଜ ଅଛନ୍ତି। ତେଣୁ ବିହାର, ପଶ୍ଚିମବଙ୍ଗ ଓ ମଧ୍ୟପ୍ରଦେଶ ପଛକୁ ରହିଛି ଓଡ଼ିଶା।

ଆସନ୍ତା ୧୫ ରେ ଖୋଲିବ ସିନେମାହଲ ,ଏସଓପି ଜାରି କଲା କେନ୍ଦ୍ର ସୂଚନା ଓ ପ୍ରସାରଣ ମନ୍ତ୍ରାଳୟ

ଅକ୍ଟୋବର ୧୫ ତାରିଖରୁ ଦେଶରେ ସିନେମା ହଲ୍, ଥିଏଟର ଓ ମଲ୍ଟିପ୍ଲେକ୍ସ ଖୋଲିବାକୁ ଯାଉଥିବାବେଳେ କେନ୍ଦ୍ର ସୂଚନା ଓ ପ୍ରସାରଣ ମନ୍ତ୍ରାଳୟ ପକ୍ଷରୁ ଆଜି ଏଥିଲାଗି ଏସଓପି ଘୋଷଣା କରାଯାଇଛି । ଦେଶର ସବୁ ସିନେମା ହଲ୍, ଥିଏଟର ଓ ମଲଟିପ୍ଲେକ୍ସରେ ଏସବୁ ଏସଓପି ପାଳନ କରିବା ବାଧ୍ୟତାମୂଳକ ବୋଲି କେନ୍ଦ୍ର ସୂଚନା ଓ ପ୍ରସାରଣ ମନ୍ତ୍ରୀ ପ୍ରକାଶ ଜାଭଡ଼େକର କହିଛନ୍ତି । ଆସନ୍ତା ଅକ୍ଟୋବର ୧୫ରୁ ସାରା ଦେଶରେ ସିନେମା ହଲ ଖୋଲିବ ବୋଲି ଗତ ୩୦ ତାରିଖରେ କେନ୍ଦ୍ର ଗୃହମନ୍ତ୍ରାଳୟ ଘୋଷଣା କରିଥିଲା ।

ପଣ୍ୟ ପରିବହନରେ ପୂର୍ବତଟ ରେଳପଥର ସଫଳତା

ଅଧିକ ପଣ୍ୟ ପରିବହନର ଲକ୍ଷ୍ୟ ସାଧନରେ ଭାରତୀୟ ରେଳବାଇ ଏକ ଗୁରୁତ୍ୱପୂର୍ଣ୍ଣ ମାଇଲଖୁଣ୍ଟ ହାସଲ କରିଛି। ଏହି ମାସରେ ଭାରତୀୟ ରେଳବାଇ ୧୦୨.୧୨ ନିୟୁତ ଟନ୍ ପଣ୍ୟ ପରିବହନ କରିଛି, ଯାହାକି ୨୦୧୯ର ସେପ୍ଟେମ୍ବର ମାସ ପଣ୍ୟ ପରିବହନଠାରୁ ୧୩.୫୯ ନିୟୁତ ଟନ୍ ତଥା ୧୫.୩୫ ପ୍ରତିଶତ ଅଧିକ। ୨୦୧୯ ସେପ୍ଟେମ୍ବରରେ ୮୮.୫୩ ନିୟୁତ ଟନ୍ ପଣ୍ୟ ପରିବହନ କରାଯାଇଥିଲା।ଦେଶରେ ସେପ୍ଟେମ୍ବର ମାସର ପଣ୍ୟ ପରିବହନ କ୍ଷେତ୍ରରେ ପୂର୍ବତଟ ରେଳପଥ ଏକ ପ୍ରମୁଖ ଅଂଶ ପ୍ରଦାନ କରିଛି।

ପିପିଲି ବିଧାୟକ ପ୍ରଦୀପ ମହାରଥୀଙ୍କ ପରଲୋକ

ପୂର୍ବତନ ମନ୍ତ୍ରୀ ତଥା ପିପିଲି ବିଧାୟକ ପ୍ରଦୀପ ମହାରଥୀଙ୍କ ପରଲୋକ। ଭୁବନେଶ୍ୱରର ଏକ ଘରୋଇ ହସ୍ପିଟାଲରେ ତାଙ୍କର ମୃତ୍ୟୁ ହୋଇଥିବା ସୂଚନା ମିଳିଛି। ମୃତ୍ୟୁବେଳକୁ ତାଙ୍କୁ ୬୫ ବର୍ଷ ବୟସ ହୋଇଥିଲା। ଗତକାଲି ଗୁରୁତର ଭାବେ ଅସୁସ୍ଥ ହୋଇପଡିବାରୁ ତାଙ୍କୁ ମେଡିକାଲରେ ଭର୍ତ୍ତି କରାଯାଇଥିଲା। ଚିକିତ୍ସାଧୀନ ଅବସ୍ଥାରେ ଗତକାଲି ରାତିରେ ତାଙ୍କର ମୃତ୍ୟୁ ଘଟିଛି। ହସ୍ପିଟାଲରୁ ତାଙ୍କର ପାର୍ଥିବ ଶରୀର ଭୁବନେଶ୍ୱରସ୍ଥିତ ସରକାରୀ ବାସଭବନକୁ ଅଣାଯାଇଛି।

ଦୁର୍ନୀତି ମାମଲାରେ ଓଡ଼ିଶା ପଞ୍ଚମ

ଦୁର୍ନୀତି ମାମଲାରେ ଓଡ଼ିଶାର ସ୍ଥାନ ଦେଶରେ ପଞ୍ଚମ। କିନ୍ତୁ ଆୟବହିର୍ଭୂତ ସମ୍ପତ୍ତି ଠୁଳ ମାମଲାରେ ରାଜ୍ୟ ଏକ ନମ୍ବର। ଗତବର୍ଷ ରାଜ୍ୟରେ ମୋଟ ୩୫୩ଟି ମାମଲା ରୁଜୁ ହୋଇଥିବା ବେଳେ ସେଥିରୁ ୮୮ଟି ଆୟ ବହିର୍ଭୂତ ସମ୍ପତ୍ତି ମାମଲା ଓ ୧୫୧ଟି ଲାଞ୍ଚ ମାମଲା ରହିଛି। ୨୦୧୮ରେ ଓଡ଼ିଶା ଦୁଇ ନମ୍ବରରେ ଥିବା ବେଳେ ୨୦୧୯ରେ ପଞ୍ଚମ ସ୍ଥାନରେ ରହିଛି।

ଗତ ୨୪ଘଣ୍ଟାରେ ରାଜ୍ୟରେ ୪୬,୪୦୪ କରୋନା ନମୁନା ପରୀକ୍ଷା

ପୁଣି ୫୦ ହଜାରରୁ କମ୍ ହେଲା ରାଜ୍ୟରେ କୋଭିଡ୍‌ ନମୁନା ପରୀକ୍ଷା । ଗତ କିଛି ଦିନ ହେବ ରାଜ୍ୟରେ ୫୦ ହଜାରରୁ କମ୍ ନମୁନା ପରୀକ୍ଷା କରାଯାଉଥିବା ପରିଲକ୍ଷିତ ହୋଇଛି। ଗତ ୨୪ଘଣ୍ଟାରେ ରାଜ୍ୟରେ ୪୬,୪୦୪ କରୋନା ନମୁନା ପରୀକ୍ଷା କରାଯାଇଛି। ଏହି ନମୁନା ପରୀକ୍ଷା ଆରଟିପିସିଆର୍‌, ଆଣ୍ଟିଜେନ୍‌ ଓ ଟ୍ରୁନଟ୍‌ ପଦ୍ଧତିରେ କରାଯାଇଥିବା ସୂଚନା ମିଳିଛି।

ଗାନ୍ଧୀଜୀ ଓ ଶାସ୍ତ୍ରୀଜୀଙ୍କ ଜୟନ୍ତୀ,ଦେଶବାସୀ ଦେଲେ ଶ୍ରଦ୍ଧା ସୁମନ

ଆଜି ଦେଶ ପାଇଁ ଏକ ସ୍ମରଣୀୟ ଦିନ । ଆଜି ଜାତିର ଜନକ ମହାତ୍ମାଗାନ୍ଧୀ ଓ ଲାଲ ବାହାଦୂର ଶାସ୍ତ୍ରୀ ଙ୍କ ଜୟନ୍ତୀ । ଏ ଅବସରରେ ରାଷ୍ଟ୍ରପତି ଓ ପ୍ରଧାନମନ୍ତ୍ରୀ ଶ୍ରଦ୍ଧାଞ୍ଜଳି ଜଣାଇଦେଇଛନ୍ତି । ନିଜ ଟ୍ୱିଟର ଜରିଆରେ ପ୍ରଧାନ ମନ୍ତ୍ରୀ ଓ ରାଷ୍ଟ୍ରପତି ଶ୍ରଦ୍ଧା ସୁମନ ବାଢିବା ସହ କୃତଜ୍ଞ ରାଷ୍ଟ୍ର ସ୍ମୃତି ଚରଣ କରୁଛି ବୋଲି କହିଛନ୍ତି । ଗାନ୍ଧିଜୀଙ୍କ ସତ୍ୟ, ଅହିଂସା ଓ ପ୍ରେମ ସମାଜରେ ସୌହାର୍ଦ୍ଦ୍ୟ ସଞ୍ଚାର କରୁଛି । ଗାନ୍ଧିଜୀଙ୍କ ନୀତି ଆଦର୍ଶ ବିଶ୍ୱ କଲ୍ୟାଣର ମାର୍ଗକୁ ପ୍ରସ୍ତୁତ କରୁଛି ବୋଲି ରାଷ୍ଟ୍ରପତି ମହୋଦୟ କହିଛନ୍ତି ।


First Previous
1 2 3 4 5 6 7 8 9 10
Next Last Page 1 of 47

Recent Post