କଣ୍ଟାବାଞ୍ଜି ରେଳଷ୍ଟେସନରୁ ୭୪ ଦାଦନ ଶ୍ରମିକ ଉଦ୍ଧାର । ରାଜ୍ୟ ବାହାରକୁ ଚାଲାଣ ହେଉଥିବାବେଳେ ଶ୍ରମିକଙ୍କୁ ଉଦ୍ଧାର କରିଛି କଣ୍ଟାବାଞ୍ଜି ଜିଆରପି ପୋଲିସ । ଶ୍ରମିକଙ୍କ ମଧ୍ୟରେ ୪୨ ଜଣ ପୁରୁଷ ଥିବାବେଳେ ୩୨ ଜଣ ମହିଳା ଓ ଶିଶୁ ଅଛନ୍ତି । ସମସ୍ତ ଶ୍ରମିକ ବଲାଙ୍ଗୀର ଓ କଳାହାଣ୍ଡି ଜିଲ୍ଲାର । ମୁଣ୍ଡପିଛା ୩୦ ହଜାର ଲେଖାଏ ନେଇ ବିଶାଖାପଟଣାକୁ ଟ୍ରେନ ଯୋଗେ ଯାଉଥିଲେ । ଉଦ୍ଧାର ଶ୍ରମିକଙ୍କୁ ଘରକୁ ପଠାଇବାର ବ୍ୟବସ୍ଥା କରୁଛନ୍ତି କଣ୍ଟାବାଞ୍ଜି ତହସିଲଦାର। ମାଳ ମାଳ ଯୋଜନା ଓ ବ୍ୟାପକ କାର୍ଯ୍ୟକ୍ରମ ସତ୍ୱେ ପଶ୍ଚିମ ଓଡ଼ିଶାରେ କମୁନି ଦାରିଦ୍ର୍ର ର ଯନ୍ତ୍ରଣା । କୋଟି କୋଟି ଟଙ୍କାବ୍ୟୟ ସତ୍ୱେ କେବିକେ ରୁ ହଟିନି ଦାଦନର ଅପଖ୍ୟାତି। ରାଜ୍ୟ ବାହାର ର ଦଲାଲ ମାନେ ବର୍ଷ ସାରା ଏଠାରେ ସକ୍ରିୟ ରହି ଶ୍ରମ ଚାଲାଣରୁ ବ୍ୟାପକ ମୁନାଫା ମାରୁଥିବା ବେଳେ ଅନେକ ମେହନତୀ ମଣିଷ ଦାଦନ ଖଟିବାକୁ ଯାଇ ଶବ ହୋଇ ଫେରିଛନ୍ତି । ଅନେକ ଠିକାଦାର ନ୍କ ନିକଟରେ ବୈଧ ଲାଇସେନ୍ସ ରହୁନଥିବା ବେଳେ ଅନେକ ଶ୍ରମିକ ଏବେ ବି ଶ୍ରମ ଅଧିକାରୀଙ୍କ ଅଗୋଚର ରେ ଦାଦନ ଖଟିବାକୁ ଯାଉଥିବା ଦେଖିବାକୁ ମିଳିଛି ।