ସୂଚନା ଅଧିକାର ଆଇନ ଅନୁଯାୟୀ ପୂର୍ବରୁ ଆବେଦନ କରି ଅନ୍ୟକାହାର ଆୟ ଜାଣି ହେଉନଥିଲା । ଏବେ ପତ୍ନୀଙ୍କୁ ଏ ଅଧିକାର ପ୍ରଦାନ କରାଯାଇଛି । ସ୍ୱାମୀଙ୍କ ଆୟ ସମ୍ପର୍କରେ ଜାଣିବା ପତ୍ନୀଙ୍କ ଅଧିକାର । ତେଣୁ ସୂଚନା ଅଧିକାର (ଆର୍‌ଟିଆଇ) ଆଇନ ଅଧୀନରେ ଜଣେ ମହିଳା ସ୍ୱାମୀଙ୍କ ମୋଟ ଆୟ ବାବଦରେ ସୂଚନା ହାସଲ କରିପାରିବେ । କେନ୍ଦ୍ରୀୟ ସୂଚନା ଆୟୋଗ (ସିଆଇସି) ଗତକାଲି ବୁଧବାର  ଏଭଳି ମନ୍ତବ୍ୟ ଦେଇଛନ୍ତି । ରାଜସ୍ଥାନ ଯୋଧପୁରର ଜଣେ ମହିଳାନିଜ  ସ୍ୱାମୀଙ୍କ ମୋଟ ତଥା ଟିକସ ଯୋଗ୍ୟ ଆୟ ବାବଦରେ ଜାଣିବା ପାଇଁ ଆୟକର ବିଭାଗକୁ ଆବେଦନ କରିଥିଲେ । କିନ୍ତୁ ତାହା ତାଙ୍କୁ ମିଳି ନ ଥିଲା । ତାଙ୍କୁ କୁହାଯାଇଥିଲା ଯେ ଏହି ତଥ୍ୟ ଜଣେ ତୃତୀୟ ପକ୍ଷଙ୍କର ହୋଇଥିବାରୁ ଏହାକୁ ଦିଆଯାଇ ପାରିବ ନାହିଁ । ଏମିତି କି ଏହା ଆର୍‌ଟିଆଇ ପରିସରରେ ଆସୁନାହିଁ ବୋଲି କୁହାଯାଇଥିଲା । କିନ୍ତୁ ଏ ସମସ୍ତ ଯୁକ୍ତିକୁ ସିଆଇସି ଖାରଜ କରିଦେଇଛନ୍ତି । ନିର୍ଦ୍ଦେଶ ଦିଆଯିବାର ୧୫ ଦିନ ମଧ୍ୟରେ ଆବେଦନକାରୀ ରହମତ ବାନୋଙ୍କୁ ସୂଚନା ପ୍ରଦାନ କରିବାକୁ କୁହାଯାଇଛି ।ଏବେ ଏହା ଦେଶପାଇଁ ପ୍ରଯୁଜ୍ୟ ହୋଇପାରିଛି ।