କରୋନା କାଳରେ ଜନଜୀବନ ଅସ୍ତବ୍ୟସ୍ତ ହୋଇଯାଇଥିବା ବେଳେ ଡାକ୍ତର,ନର୍ସ,ଫାର୍ମାସିଷ୍ଟ,ଆଶା,ଅଙ୍ଗନବାଡି କର୍ମୀ ନିଷ୍ଠାପର ଭାବେ କାମ କରି କୋଭିଡ ଯୋଦ୍ଧା ଭାବେ ନିଆରା ପରିଚୟ ସୃଷ୍ଟି କରିଛନ୍ତି । ରାଜ୍ୟରେ ମହାମାରୀ କୁ ନେଇ ସମସ୍ତେ ଚିନ୍ତିତ ଥିବା ବେଳେ ସାମୁଦ୍ରିକ ବାତ୍ୟା  ଅମ୍ପାନ କମ୍ପନ ସୃଷ୍ଟି କରିଥିଲା । ସେ ସମୟରେ ବାତ୍ୟା ପୀଡିତ ଅଞ୍ଚଳରେ ଉଦ୍ଧାର କାର୍ଯ୍ୟକରି ଅଗ୍ନିଶମ କର୍ମଚାରୀମାନେ ସାବାସୀ ପାଇଥିଲେ ।  ଏବେ ବିଗତ କିଛିଦିନ ହେଲା ଲଘୁଚାପ ଜନିତ ଲଗାଣ ବର୍ଷାରେ ରାଜ୍ୟର ୨୦ ଟି ଜିଲା ପ୍ରଭାବିତ ହୋଇଥିବା ବେଳେ ଅନେକ ଲୋକ ପାଣି ଘେର ରେ ଅଛନ୍ତି । ପାଣି ଘେର ରେ ଥିବା ୨୦୦ ରୁ ଅଧିକ ଲୋକଙ୍କୁ ଅଗ୍ନିଶମ ବିଭାଗ କର୍ମଚାରୀ ଉଦ୍ଧାର କରିଥିବା ଜଣାଯାଇଛି  । ନିକଟରେ ଜଳ ଘେରି ରେ  ରହିଥିବା ସମ୍ବଲପୁର ସହର ର ତଲୁଆ ଅଞ୍ଚଳରୁ  ଅନେକ ଲୋକଙ୍କୁ କୂଳକୁ ଆଣି ଦେବଦୁତ ସାଜିଛନ୍ତି ଅଗ୍ନିଶମ ଅଧିକାରୀ । ଏମିତି ଘଟଣା ଦେଖିବାକୁ ମିଳିଛି  ଧନୁପାଲି ଅନ୍ତର୍ଗତ ତୁରୀପଡା ଅଂଚଳରେ । ସହରକୁ ପଛୁଆ ପାଣି ପ୍ରବେଶ କରୁଥିବା ଫଳରେ ସହରର ବିଭିନ୍ନ ଅଂଚଳ ଜଳମଗ୍ନ ହୋଇଥିଲା । ତେବେ ସହରର ତୁରୀପଡାରେ କିଛି ଘର ଜଳବନ୍ଦୀ ହୋଇ ରହିଯିବା ଫଳରେ ଅଗ୍ନିଶମ ବିଭାଗର କର୍ମଚାରୀମାନେ ଆସି ସମସ୍ତଙ୍କୁ ଉଦ୍ଧାର କରିଛନ୍ତି । ଠିକ୍ ଏହି ସମୟରେ ଜଣେ ଛୋଟ ଛୁଆକୁ ଅଗ୍ନିଶମ ବିଭାଗର କର୍ମଚାରୀ ତାଙ୍କ କାନ୍ଧରେ ବସାଇ ବନ୍ଯାଂଚଳରୁ ସୁରକ୍ଷିତ ଘରୁ ବାହାରକୁ ଆଣିଥିଲେ । ଏହି ଭିଡ଼ିଓ ଭାଇରଲ ହେବା ପରେ ଅଗ୍ନିଶମ କର୍ମଚାରୀଙ୍କ ଏହି ସାହସିକ କାମ ପାଇଁ ଲୋକେ ପ୍ରଶଂସା କରିଛନ୍ତି ।