ବିବାହ ରେ ଲକଡାଉନ,ମାସ୍କ ପିନ୍ଧି ହେଲା ବାହାଘର; ବିବାହ ଖର୍ଚ୍ଚ ପାଇଁ ଥିବା ଟଙ୍କାକୁ ରିଲିଫ୍ ପାଣ୍ଠିକୁ ଦେଲେ ବରକନ୍ୟା
ଭାବିଥିଲେ ବନ୍ଧୁବାନ୍ଧବ ଓ ସାଙ୍ଗସାଥିଙ୍କ ଗହଣରେ କନ୍ୟା ଘରକୁ ଯାଇଥାନ୍ତେ । ବାଜା, ବାଣ, ରୋସଣିରେ ଗାଁ ଦାଣ୍ଡ ଦୁଲୁକିଥାନ୍ତା । ହେଲେ କରୋନା କଟକଣା ଯୋଗୁଁ ସବୁ ଯୋଜନା ଭାବନାରେ ରହିଗଲା । ନିରାଡମ୍ବର ଭାବେ ବିବାହ କରିଛନ୍ତି ମିତଦ୍ରୁ ସୁନ୍ଦର ସାହୁ(୩୦) ଓ ରୀତାରାଣୀ ସାହୁ(୨୩) । ପାଟଣା ବ୍ଲକ୍ ତୁରୁମୁଙ୍ଗା ପଞ୍ଚାୟତ କଇଁଣ୍ଡା ଗାଁ ସ୍ଥିତ କନ୍ୟାଙ୍କ ମଉସା ମଙ୍ଗୁଳୁ ଚରଣ ସାହୁଙ୍କ ବାସଭବନରେ ଉଭୟଙ୍କ ବିବାହ ସମ୍ପନ୍ନ ହୋଇଛି । ହେଲେ ଏହି ନବଦମ୍ପତି ନିରାଡମ୍ବର ବିବାହ ସହ ନିଆରା ଉଦାହରଣ ସୃଷ୍ଟି କରିଛନ୍ତି । ବିବାହ ପାଇଁ ଥିବା ଖର୍ଚ୍ଚରୁ ୫୦୦୧ ଟଙ୍କା ମୁଖ୍ୟମନ୍ତ୍ରୀ କରୋନା ରିଲିଫ ପାଣ୍ଠି ଓ ଆଉ ୫୦୦୧ ଟଙ୍କା ପ୍ରଧାନମନ୍ତ୍ର କରୋନା ରିଲିଫ ପାଣ୍ଠିକୁ ଦାନ କରିଛନ୍ତି । ଏହା ପରେ ତୁରୁମୁଙ୍ଗା ୪୯ ନଂ ଜାତୀୟ ରାଜପଥ ଉପରେ ଯାଉଥିବା ଅସହାୟ ବାଟୋଇଙ୍କୁ ଶୁଖିଲା ଖାଦ୍ୟ ବଣ୍ଟନ କରିଛନ୍ତି । ଏପରିକି କନ୍ୟା ବିଦାୟ ବେଳେ ଉଭୟ ବରକନ୍ୟା ମାସ୍କ ଓ ସାନିଟାଇଜର ଉପହାର ନେଇ ବିଦାୟ ନେଇଛନ୍ତି । ସୂଚନା ମୁତାବିକ, ଚମ୍ପୁଆ ବ୍ଲକ୍ ସଡଙ୍ଗୀ ଗାଁର ବାସନ୍ତୀଲତା ସାହୁ ଓ ମଧୁସୂଦନ ସାହୁଙ୍କ ପୁଅ ମିତୁଙ୍କ ସହ ସଦର ବ୍ଲକ୍ ଅଞ୍ଜର ଗାଁର ମନ୍ଦାକିନୀ ସାହୁ ଓ ସଚ୍ଚିଦାନନ୍ଦ ସାହୁଙ୍କ ଝିଅ ରୀତାରାଣୀଙ୍କ ବିବାହ ୩ ମାସ ପୂର୍ବରୁ ଧାର୍ଯ୍ୟ ହୋଇଥିଲା । ସେତେବେଳେ ବହୁ ଆଡମ୍ବର ଭବେ ବିବାହ କରିବାକୁ ସ୍ଥିର ହୋଇଥିଲା । ହେଲେ କରୋନା କଟକଣା ପାଇଁ ତାରିଖ ଅନୁଯାୟୀ ବିବାହ କରିବା ସମ୍ଭବ ହୋଇନଥିଲା । ଶେଷରେ ପୁଅ ଓ ଝିଅ ପରିବାର ଲୋକେ ପ୍ରଶାସନର ଦ୍ୱାରସ୍ଥ ହୋଇଥିଲେ । କନ୍ୟା ପକ୍ଷ ପାଟଣା ତହସିଲ ଓ ବରପକ୍ଷ ଚମ୍ପୁଆ ତହସିଲରୁ ଅନୁମତି ଆଣିଲେ । ନିୟମ ଅନୁଯାୟୀ ସାମାଜିକ ଦୂରତା, ମାସ୍କ ବ୍ୟବହାରକୁ ଗୁରୁତ୍ୱ ଦେଇ ବିବାହ କରିବାକୁ ସବୁଜ ସଙ୍କେତ ମିଳିବା ପରେ ଆୟୋଜନ ଆରମ୍ଭ ହୋଇଥିଲା । ବିବାହ କାର୍ଯ୍ୟ ଚାଲିଥିବା ପରିସର ସାନିଟାଇଜ୍ କରାଯାଇଥିଲା । ବ୍ରାହ୍ମଣ ଠାରୁ ଆରମ୍ଭ କରି ବରକନ୍ୟା ଓ ଉପସ୍ଥିତ ଲୋକ ସ୍ୱତନ୍ତ୍ର ଶୁଭବିବାହ ମାସ୍କ ପିନ୍ଧିଥିଲେ । ଉଭୟଙ୍କ ପକ୍ଷରୁ ମାତ୍ର ୧୦ ଜଣ ଉପସ୍ଥିତ ଥିଲେ । କରୋନା କଟକଣାରେ ଏହି ନିଆରା ବିବାହ ସମ୍ପନ୍ନ ହୋଇଛି ।
18/05/2020