ଓଡ଼ିଶା ମାଧ୍ୟମିକ ଶିକ୍ଷା ପରିଷଦ (ବୋର୍ଡ) ପକ୍ଷରୁ ଆଜିଠାରୁ ୬୦ଟି କେନ୍ଦ୍ରରେ ମାଟ୍ରିକ ଖାତା ମୂଲ୍ୟାୟନ ଆରମ୍ଭ ହେବ । ପୂର୍ବାହ୍ଣ ୯ଟାରୁ ଅପରାହ୍ଣ ୩ଟା ପର୍ଯ୍ୟନ୍ତ ଖାତା ଦେଖାଯିବ । ଏଥିପାଇଁ ପରୀକ୍ଷକମାନେ ମୂଲ୍ୟାୟନ କେନ୍ଦ୍ରରେ ସକାଳ ୮ଟାରେ ପହଞ୍ଚିବା ପରେ ଭଲ ଭାବେ ସାବୁନ୍‍ ଦ୍ୱାରା ଧୋଇହୋଇ ସାନିଟାଇଜ୍‍ ହେବେ । ଗୋଟିଏ କେନ୍ଦ୍ରରେ ସର୍ବାଧିକ ୨୦୦ ପରୀକ୍ଷକଙ୍କୁ ମୂଲ୍ୟାୟନ ପାଇଁ ନିଯୁକ୍ତ କରାଯିବ। ଏଥିସହ ହାଇକୋର୍ଟଙ୍କ ନିର୍ଦେଶ ଅନୁଯାୟୀ ମୂଲ୍ୟାୟନ କେନ୍ଦ୍ରଠାରୁ ୧୦ କିଲୋମିଟର ଦୂରତାରେ ରହୁଥିବା ପରୀକ୍ଷକମାନେ ମୂଲ୍ୟାୟନ କାର୍ଯ୍ୟରେ ଯୋଗଦେବେ ବୋଲି ବୋର୍ଡ ସଭାପତି ରାମାଶିଷ ହାଜରା ସୂଚନା ଦେଇଛନ୍ତି।କୋଭିଡ୍‍-୧୯ କାର୍ଯ୍ୟରେ ନିୟୋଜିତ ହୋଇଥିବା ଶିକ୍ଷକମାନଙ୍କୁ ମୂଲ୍ୟାୟନ କାର୍ଯ୍ୟରୁ ବାଦ୍‍ ଦିଆଯାଇଛି । ଖାତାଦେଖା ତୁରନ୍ତ ଶେଷ କରି ଜୁଲାଇ ଶେଷ ବେଳକୁ ପରୀକ୍ଷା ଫଳ ପ୍ରକାଶ କରାଯିବ ବୋଲି ବିଦ୍ୟାଳୟ ଓ ଗଣଶିକ୍ଷା ବିଭାଗ ମନ୍ତ୍ରୀ ସମୀର ରଞ୍ଜନ ଦାଶ କହିଛନ୍ତି । ସୂଚନାଯୋଗ୍ୟ ଯେ, ଏବେଠାରୁ ଦ୍ୱିତୀୟ ଭାଷା ଇଂରାଜୀ, ଗଣିତ ଓ ସାମାଜିକ ଖାତା ଦେଖା ହେବ। ଏହି ଖାତାଗୁଡ଼ିକ ମୂଲ୍ୟାୟନ ଶେଷ ପରେ ପ୍ରଥମ ଭାଷା, ତୃତୀୟ ଭାଷା ଓ ସାଧାରଣ ବିଜ୍ଞାନ ଖାତା ମୂଲ୍ୟାୟନ ହେବ । ମାଟ୍ରିକ ସହ ମଧ୍ୟମା ଓ ରାଜ୍ୟ ମୁକ୍ତ ବିଦ୍ୟାଳୟ ପରୀକ୍ଷା ଖାତାଦେଖା ମଧ୍ୟ ଏକସଙ୍ଗେ ଚାଲିବ। ମୂଲ୍ୟାୟନ ପରେ ଅନ୍‍ଲାଇନ୍‍ରେ ପ୍ରାପ୍ତ ନମ୍ବର ପ୍ରସେସିଂ ଫାର୍ମକୁ ମଧ୍ୟ ପ୍ରେରଣ କରାଯିବ। ଗତ ମାର୍ଚ୍ଚ ୧୮ ଓ ୧୯ ତାରିଖ ଦୁଇ ଦିନ ଖାତାଦେଖା ଚାଲିବା ପରେ କରୋନା ସଂକ୍ରମଣ ପାଇଁଁ ମୂଲ୍ୟାୟନ କାର୍ଯ୍ୟ ବନ୍ଦ ରଖାଯାଇଥିଲା।