ୟୁନେସ୍କୋ ଏବଂ ଲଣ୍ଡନସ୍ଥିତ ବାର୍କି ଫାଉଣ୍ଡେଶନ ଦ୍ବାରା ଦିଆଯାଉଥିବା ବିଶ୍ଵ ଶିକ୍ଷକ ପୁରସ୍କାର ଗତ ଗୁରୁବାର ଘୋଷଣା କରାଯାଇଛି । ଏଥିରେ ମଧ୍ୟପ୍ରଦେଶ ର ଜଣେ ଶିକ୍ଷକ ରଣଜିତ ଡିସ୍‌ଲେ ଙ୍କୁ  ବିଶ୍ୱର ସବୁଠୁ ଶ୍ରେଷ୍ଠ ଶିକ୍ଷକ ଭାବେ ଚୟନ କରାଯାଇଛି । ରଣଜିତ ସୋଲାପୁର ଜିଲା ଅନ୍ତର୍ଗତ ପରିତେୱାଡ଼ି ଜିଲା ପରିଷଦ ସ୍କୁଲରେ ଶିକ୍ଷକତା କରନ୍ତି । ଲଣ୍ଡନର ନ୍ୟାଚୁରାଲ ହିଷ୍ଟ୍ରୀ ମ୍ୟୁଜିୟମରେ ସମ୍ପନ୍ନ ହୋଇଥିବା ଏକ ଭର୍ଚୁଆଲ ସମାରୋହରେ ରଣଜିତଙ୍କୁ ଗ୍ଲୋବାଲ ଟିଚର ଆୱାର୍ଡ ପ୍ରଦାନ କରାଯିବା ନେଇ ଘୋଷଣା କରାଯାଇଥିଲା। ପ୍ରତିଦ୍ଧ ଅଭିନେତା ଷ୍ଟିଫେନ ଫ୍ରାଏ ଏହି ଘୋଷଣା କରିଥିଲେ। ପ୍ରତିଯୋଗିତାରେ ୧୪୦ ଦେଶର ୧୨ ହଜାରରୁ ଅଧିକ ଶିକ୍ଷକ ଅଂଶଗ୍ରହଣ କରିଥିଲେ। ବାଳିକା ଶିକ୍ଷାକୁ ପ୍ରୋତ୍ସାହିତ କରିବା ଏବଂ ଭାରତରେ ତ୍ଵରିତ ପ୍ରତିକ୍ରିୟା ବା କ୍ୟୁଆର କୋଡେଡ୍‌ ପାଠ୍ୟ ବିପ୍ଳବକୁ ତ୍ଵରାନ୍ବିତ କରିବା ଦିଗରେ ସ୍ବତନ୍ତ୍ର ଅବଦାନ ଲାଗି ରଣଜିତଙ୍କୁ ଏହି ପୁରସ୍କାର ପ୍ରଦାନ କରାଯାଇଛି।ତେବେ ପୁରସ୍କାର ବାବଦ ରାଶିରୁ ୫୦ ପ୍ରତିଶତକୁ ରଣଜିତ ତାଙ୍କ ସହିତ ପ୍ରତିଯୋଗିତାର ଚୂଡ଼ାନ୍ତ ପର୍ଯ୍ୟାୟରେ ପହଞ୍ଚିଥିବା ଅନ୍ୟ ୯ ଶିକ୍ଷକଙ୍କ ମଧ୍ୟରେ ବାଣ୍ଟିବାକୁ ଘୋଷଣା କରିଛନ୍ତି। ଅବଶିଷ୍ଟ ୫୦ ପ୍ରତିଶତରେ ସେ ଏକ ପାଣ୍ଠି ପ୍ରସ୍ତୁତ କରିବେ, ଯାହାକୁ ଭଲ କାମ କରୁଥିବା ଶିକ୍ଷକଙ୍କ ପାଇଁ ବିନିଯୋଗ କରାଯିବ ବୋଲି ରଣଜିତ କହିଛନ୍ତି। ବାର୍କି ଫାଉଣ୍ଡେଶନ ୨୦୧୪ରୁ ଏହି ପୁରସ୍କାର ପ୍ରଦାନ କରିଆସୁଛି। ଶିକ୍ଷା କ୍ଷେତ୍ରରେ ଉତ୍କୃଷ୍ଟ ଯୋଗଦାନ କରିଥିବା ଶିକ୍ଷକଙ୍କୁ ଏହି ପୁରସ୍କାର ପ୍ରଦାନ କରାଯାଇଥାଏ।