ରୂପେଲି ପରଦାରେ ନୁହଁ ,ବରଂ ରିୟଲ ଲାଇଫ ହିରୋ ଭାବେ ସାମ୍ନା କୁ ଆସିଛନ୍ତି ବଲିଉଡ ର ଅଭିନେତା ସୋନୁସୂଦ । ବଲିଉଡର ଏହି ଲୋକପ୍ରିୟ ଅଭିନେତା  କରୋନା ମହାସଙ୍କଟ ସମୟରେ  ଅନେକ ଗରିବଙ୍କ ପାଇଁ ସାଜିଛନ୍ତି ଜୀବନ୍ତ  ଦେବତା । ନିଜ କାମରେ ଅନେକ ଥର ଲୋକଙ୍କ ମନ ଜିତିଥିବା ବେଳେ ପୁଣି ଥରେ ସେ ନିଜର ମହାନତା ପ୍ରତିପାଦନ କରିଛନ୍ତି । ପୂର୍ବରୁ ଅନେକଙ୍କୁ ଲୋକଙ୍କୁ ଖାଦ୍ୟ,ବାସଗୃହ, ତଥା ରୋଜଗାର ଓ ପିଲାଙ୍କୁ ପଢ଼ିବା ପାଇଁ ସାହାଯ୍ୟ କରିଥିବା ସୋନୁ ଏବେ ଛାତ୍ରବୃତ୍ତି ଦେବାକୁ ଘୋଷଣା କରିଛନ୍ତି । ଆଇଏସଏମ.ଓରାଜି ନାମରେ ୫ ଲକ୍ଷ ଟଙ୍କାର ଏକ ଛାତ୍ରବୃତ୍ତି କାର୍ଯ୍ୟକ୍ରମ ଆରମ୍ଭ କରାଯାଇଛି। ଡାକ୍ତରୀ ପଢ଼ିବା ପାଇଁ ଇଚ୍ଛା ରଖିଥିବା ଛାତ୍ରଛାତ୍ରୀ ଏହାର ସୁବିଧା ଉଠାଇପାରିବେ ବୋଲି ସୂଚନା ମିଳିଛି। ଏ ନେଇ ସୋନୁ ନିଜ ଟୁଇଟର ଆକାଉଣ୍ଟ ଜରିଆରେ ଜଣାଇଛନ୍ତି । ଟୁଇଟ କରି ସୋନୁ ଲେଖିଛନ୍ତି ଯେ, ମୁଁ ଚାହେଁ ପ୍ରତ୍ୟେକ ଛାତ୍ରଛାତ୍ରୀ, ଯିଏ ଡାକ୍ତର ହେବାକୁ ସ୍ୱପ୍ନ ଦେଖୁଛନ୍ତି ସେମାନେ ଡାକ୍ତର ହୁଅନ୍ତୁ। ମୁଁ ଏଠାରେ http://SONUISM.ORGର ଶୁଭାରମ୍ଭ କରୁଛି। ଆଇଏସଏମ ଏଡୁଟେକ୍ ସହିତ ମିଶି ମୁଁ ମୋର ଛାତ୍ରବୃତ୍ତି କାର୍ଯ୍ୟକ୍ରମ ଆରମ୍ଭ କରିଛି। ଏହା ଆର୍ଥିକ ସହାୟତା ଆବଶ୍ୟକ କରୁଥିବା ଛାତ୍ରଛାତ୍ରୀମାନଙ୍କୁ ସେମାନଙ୍କ ଡାକ୍ତର ହେବାର ସ୍ୱପ୍ନ ପୂରଣ କରିବାରେ ସାହାଯ୍ୟ କରିବ ।