ବିଦ୍ୟାଧରପୁର ଠାରେ ଥିବା ଜାତୀୟ ଧାନ ଗବେଷଣା କେନ୍ଦ୍ର ନୂଆ ନୂଆ ପ୍ରଜାତିର ବିହନ ଉଭାବନ କରି ଚାଷୀମାନଙ୍କ ସଫଳତାର କାହାଣୀକୁ ସମୃଦ୍ଧ କରାଇଛି । ବିଭିନ୍ନ ରାଜ୍ୟର ଚାଷୀମାନେ ଗତ ଆର୍ଥିକ ବର୍ଷରେ ନୂତନ କିସମ ଧାନ ଚାଷ କରି ୫୮ ହଜାର କୋଟି ଟଙ୍କା ଆୟ କରିଥିବାବେଳେ ଏହାର ଉଭାବିତ ଧାନ ବିହନ ବ୍ୟବହାର କରି ପଶ୍ଚିମବଙ୍ଗ ପ୍ରଥମ ସ୍ଥାନରେ ଓ ଓଡ଼ିଶା ଦ୍ୱିତୀୟ ସ୍ଥାନ ହାସଲ କରିଛି ।

ଦେଶରେ ବର୍ତ୍ତମାନ ୨୫୦ କିସମର ଧାନ ବିହନ ବ୍ୟବହାର କରାଯାଉଛି । ଏଥିରେ ଜାତୀୟ ଧାନ ଗବେଷଣା କେନ୍ଦ୍ରର ୫୦ ପ୍ରଜାତିର ବିହନ ସାମିଲ ହୋଇଛି । ୫୦ ପ୍ରଜାତିର ଧାନ ବିହନକୁ ୮.୫ ନିୟୁତ ହେକ୍ଟର (୧୮ ପ୍ରତିଶତ) ଚାଷ ଜମିରେ ଚାଷ କରାଯାଉଛି । ଜାତୀୟ ଧାନ ଗବେଷଣା କେନ୍ଦ୍ରର ବିହନ ବ୍ୟବହାର କରି ପଶ୍ଚିମବଙ୍ଗ ଦେଶରେ ସର୍ବାଧିକ ୧୬ ହଜାର ୫୦୦ କୋଟି ଟଙ୍କା ଉପାର୍ଜନ କରିଛି । ପୂଜା, ସ୍ୱର୍ଣ୍ଣ ସବ୍ ୱାନ, ସିଆର ୫୦୦, ନବୀନ, ସିଆର ୨୦୧ ଆଦି କିସମ ଚାଷୀମାନଙ୍କ ଦ୍ୱାରା ବହୁଳ ଭାବେ ବ୍ୟବହାର ହେଉଛି । ଅନୁଷ୍ଠାନର ନିର୍ଦ୍ଦେଶକ ଡ଼.ହିଂମାଶୁ ପାଠକଙ୍କ ନେତୃତ୍ୱରେ କରାଯାଇଥିବା ଏକ ସର୍ଭେରୁ ଏହା ଜଣାଯାଇଛି ।