କେନ୍ଦ୍ରସରକାର ୬୦ ବର୍ଷରୁ ୭୯ ବର୍ଷର ବୃଦ୍ଧ ବୃଦ୍ଧାଙ୍କୁ ମାସିକ ୨୦୦ ଟଙ୍କା ଭତ୍ତା ଦେଉଥିବା ବେଳେ ୮୦ ବର୍ଷରୁ ଅଧିକ ବୟସର ବୃଦ୍ଧବୃଦ୍ଧାଙ୍କୁ ମାସିକ ୫୦୦ ଟଙ୍କାର ଭତ୍ତା ଦେଇଥାନ୍ତି । କେନ୍ଦ୍ର ସରକାରଙ୍କ ଏହି ଭତ୍ତା ରାଶି ସହିତ ରାଜ୍ୟ ସରକାରମାନେ ଅଧିକ କିଛି ଅର୍ଥ ମିଶାଇ ଦେଉଛନ୍ତି । ତେବେ ଏହି ଭତ୍ତା ଅର୍ଥ ସେମାନଙ୍କ ଆବଶ୍ୟକତା ତୁଲାଇ ପାରୁନି । ବୟସାଧିକ୍ୟଙ୍କ ଭତ୍ତା ଅର୍ଥ ବୃଦ୍ଧି କରିବାକୁ ସୁପ୍ରିମକୋର୍ଟ ବିଚାରପତି ମଦନ ବି ଲୋକୁର ଓ ବିଚାରପତି ଦୀପକ ଗୁପ୍ତାଙ୍କ ଖଣ୍ଡପୀଠ କହିଛି ।
ସୁପ୍ରିମକୋର୍ଟ କହିଛନ୍ତି ଯେ ବୃଦ୍ଧ ଓ ବୃଦ୍ଧାଙ୍କର ଆବଶ୍ୟକ ସେବା ଓ ଯତ୍ନ ନିଆଯିବା ଦରକାର । କିନ୍ତୁ ବୟସର ଅପରାହ୍ନରେ ପହଂଚିଥିବା ବରିଷ୍ଠ ନାଗରିକମାନେ ପରିବାର ଓ ସମାଜରୁ କ୍ରମଶଃ ଅଲୋଡ଼ା ହୋଇଯାଉଛନ୍ତି । ସେମାନଙ୍କ ନିକଟରେ ସଂଚିତ ଅର୍ଥ ନଥିବାରୁ ଏବଂ ରୋଗ ସହିତ ପାରିବାରିକ ସହଯୋଗ ନମିଳିବାରୁ ଉଭୟ ନଗରାଂଚଳ ଓ ଗ୍ରାମାଂଚଳରେ ବରିଷ୍ଠ ନାଗରିକମାନଙ୍କ ଜୀବନ ଦୁର୍ବିସହ ହୋଇପଡ଼ିଛି ।
ଖଣ୍ଡପୀଠ କହିଥିଲେ ଯେ ୨୦୦୭ରେ ଶେଷଥର ପାଇଁ ପେନସନ୍ ଯୋଜନାରେ ଅର୍ଥ ପରିମାଣ ସଂଶୋଧିତ ହୋଇଥିଲା । ଉଭୟ ରାଜ୍ୟ ଓ କେନ୍ଦ୍ରସରକାର ଏଥିରେ ଦୃଷ୍ଟି ଦେବା ଆବଶ୍ୟକ ।
14/12/2018