ପ୍ରତିବର୍ଷ ଓଡ଼ିଶା ବନ୍ୟା,ବାତ୍ୟା ଭଳି ପ୍ରାକୃତିକ ବିପର୍ଯ୍ୟୟର ସମ୍ମୁଖୀନ ହେଉଛି । ଏହାକୁ ଦୃଷ୍ଟିରେ ରଖି ବିପର୍ଯ୍ୟୟ ପ୍ରତିରୋଧ ଭିତିଭୂମିକୁ ରାଜ୍ୟ ସରକାର ଗୁରୁତ୍ୱ ଦେଇଛନ୍ତି । ରାଜ୍ୟର ଉପକୂଳ ଜିଲ୍ଲାଗୁଡ଼ିକରେ ବିପର୍ଯ୍ୟୟ ପ୍ରତିରୋଧ ବିଦ୍ୟୁତ ଭିତିଭୂମି ନିର୍ମାଣ ଖସଡ଼ା ପ୍ରସ୍ତୁତ ହୋଇଛି । ପ୍ରଥମ ପର୍ଯ୍ୟାୟରେ ଜଗତସିଂହପୁର, କେନ୍ଦ୍ରାପଡ଼ା, ଭଦ୍ରକ ଓ ବାଲେଶ୍ୱର ଜିଲ୍ଲାରେ ଏହି କାର୍ଯ୍ୟ ହେବ । ଏଥିପାଇଁ ୧୧ ହଜାର କୋଟି ଟଙ୍କାର କାର୍ଯ୍ୟଯୋଜନା ପ୍ରସ୍ତୁତ କରାଯାଇଛି । ସେହିପରି ୨ୟ ପର୍ଯ୍ୟାୟରେ ପୁରୀ, କଟକ, ଖୋର୍ଦ୍ଧା, ଗଞ୍ଜାମ, ଗଜପତି ଆଦି ଜିଲ୍ଲାକୁ ଏଥିରେ ସାମିଲ୍ କରାଯିବ । ଏହି ୫ ଜିଲ୍ଲା ପାଇଁ ୮ ହଜାର କୋଟି ଟଙ୍କାର କାର୍ଯ୍ୟ ଯୋଜନା ପ୍ରସ୍ତୁତ ହୋଇଛି । ଏହାସହ ଯୋଜନାରେ ଅନ୍ତର୍ଭୁକ୍ତ ପ୍ରକଳ୍ପଗୁଡ଼ିକର ବୈଷୟିକ, ଆର୍ଥିକ ଏବଂ ଆଇନଗତ ଦିଗର ସଠିକ୍ ପରିଚାଳନା ନିମନ୍ତେ 'ଥିଙ୍କ୍ ଟ୍ୟାଙ୍କ୍' ମଧ୍ୟ ଗଠନ ହେବ । ଲୋକସେବା ଭବନରେ ମୁଖ୍ୟ ଶାସନ ସଚିବ ଅସିତ୍ ତ୍ରିପାଠୀଙ୍କ ଅଧ୍ୟକ୍ଷତାରେ ଆୟୋଜିତ ଏକ ଉଚ୍ଚସ୍ତରୀୟ ସମୀକ୍ଷା ବୈଠକରୁ ଏହା ଜଣାପଡ଼ିଛି । ଜରୁରିକାଳୀନ ଭିତିରେ କାର୍ଯ୍ୟ କରିବା ପାଇଁ ସମ୍ପୃକ୍ତ ବିଭାଗ ଓ ବିତରକ କମ୍ପାନୀଗୁଡ଼ିକୁ ଶ୍ରୀ ତ୍ରିପାଠୀ ନିର୍ଦ୍ଦେଶ ଦେଇଛନ୍ତି । ଏହାସହ ଯୋଜନାରେ ଅନ୍ତର୍ଭୁକ୍ତ ପ୍ରକଳ୍ପଗୁଡ଼ିକର ବୈଷୟିକ, ଆର୍ଥôକ ଏବଂ ଆଇନଗତ ଦିଗର ସଠିକ୍ ପରିଚାଳନା ନିମନ୍ତେ 'ଥିଙ୍କ୍ ଟ୍ୟାଙ୍କ୍' ଗଠନ କରିବାକୁ ମୁଖ୍ୟ ସଚିବ ଗ୍ରୀଡ୍ କୋ ଏବଂ ଓପିଟିସିଏଲ୍ କୁ ନିର୍ଦ୍ଧେଶ ଦେଇଛନ୍ତି । ବୈଠକରେ ଉନ୍ନୟନ କମିଶନର ସୁରେଶ ଚନ୍ଦ୍ର ମହାପାତ୍ର କହିଥିଲେ, ଲଗାତାର ବାତ୍ୟା କାରଣରୁ ବହୁମାତ୍ରାରେ କ୍ଷତିଗ୍ରସ୍ତ ହେଉଥିବା ସାଧାରଣ ସମ୍ପତିକୁ ଏହି ନୂଆ ପ୍ରତିରୋଧ ବ୍ୟବସ୍ଥା ରକ୍ଷା କରିବ । ବୈଠକରେ ଚିଠା କାର୍ଯ୍ୟ ଯୋଜନା ବାବଦରେ ଆଲୋଚନା ହୋଇଥିଲା । ଅତିରିକ୍ତ ମୁଖ୍ୟ ସଚିବ ତଥା ସ୍ୱତନ୍ତ୍ର ରିଲିଫ୍ କମିଶନର (ଏସଆରସି) ପ୍ରଦୀପ ଜେନା ଓଭରହେଡ୍ କେବ୍ ଲିଂ ଏବଂ ଘଂଟାପ୍ରତି ୩୦୦ କିଲୋମିଟର ପବନକୁ ପ୍ରତିରୋଧ କରିପାରୁଥିବା ପୋଲ୍ ନିର୍ମାଣ କରିବା ପାଇଁ ପ୍ରସ୍ତାବ ଦେଇଥିଲେ । ଦକ୍ଷିଣ ଏସିଆରେ ବାତ୍ୟାବେଳେ ସର୍ବାଧିକ ଘଂଟା ପ୍ରତି ୩୧୫ କିଲୋମିଟର ବେଗରେ ପବନ ରେକର୍ଡ ହୋଇଛି । ତେଣୁ ସହରାଂଚଳରେ ଅଣ୍ଡରଗ୍ରାଉଣ୍ଡ୍ କେବଲିଂ ଏବଂ ଗ୍ରାମାଂଚଳରେ ଓଭରହେଡ୍ କେବଲିଂ ପାଇଁ ନିଷ୍ପତି ହୋଇଛି ।
27/06/2020