ବିଧାନସଭାରେ ତୃତୀୟ ଦିନ ପ୍ରାଥମିକ ଶିକ୍ଷା ବ୍ୟବସ୍ଥା ପ୍ରସଙ୍ଗରେ ଆସିଥିବା ମୋସନ ଉପରେ ଆଲୋଚନା କରାଯାଇଛି । ସରକାରୀ ଦଳର ମୁଖ୍ୟ ସଚେତକ ପ୍ରମିଳା ମଲ୍ଲିକ ପ୍ରସ୍ତାବ ଆଣିବା ପରେ ଏନେଇ ଆଲୋଚନା କରାଯାଇଥିଲା । ଏହି ଅବସରରେ ଶ୍ରୀମତୀ ମଲ୍ଲିକ କହିଛନ୍ତି ଯେ, ସ୍କୁଲକୁ ବନ୍ଦ କରାଯାଇନାହିଁ । ମିଶ୍ରଣ କରାଯାଇଛି । ରାଜ୍ୟରେ ଏପରି ସ୍କୁଲ ରହିଛି ଯେଉଁଠି  ୮ଜଣ ଛାତ୍ରଛାତ୍ରୀରେ ୨ ଜଣ ଶିକ୍ଷକ ରହୁଛନ୍ତି । ଯାହା ଯଥାର୍ଥ ନୁହେଁ । ଯଦି ନାମଲେଖାବେଳେ ଛାତ୍ରଛାତ୍ରୀଙ୍କ ସଂଖ୍ୟା ବଢିବ ତେବେ ସେଠାରେ ସ୍କୁଲ ଚାଲିବ । ସମସ୍ୟା ଥିଲେ ଜିଲ୍ଲାପାଳଙ୍କ ଅଧ୍ୟକ୍ଷତାରେ ଗଠିତ କମିଟିରେ ଅଭିଯୋଗ କରିପାରିବେ ବୋଲି ସରକାରୀ ଦଳର ମୁଖ୍ୟ ସଚେତକ ପ୍ରମିଳା ମଲ୍ଲିକ କହିଛନ୍ତି ।ତେବେ ରାଜ୍ୟରେ ୨୦ ରୁ କମ ପିଲା ଥିବା ଓ ୪୦ ରୁ କମ ପିଲା ଥିବା ୧୪ ହଜାର ସ୍କୁଲ ଚିହ୍ନଟ କରି ବନ୍ଦକରିଦେବାକୁ ସରକାର ଜିଲ୍ଲାପାଳ ମାନଙ୍କୁ ନିର୍ଦେଶ ଦେଇଥିବା ନେଇ ଅଭିଯୋଗ ଉଠିଛି । ଗତକାଲି ବିଧାନସଭାରେ ଜଣେ କଂଗ୍ରେସ ବିଧାୟକ ଭାବପ୍ରବଣ ହୋଇ ସରକାରଙ୍କ ଏଭଳି ନିଷ୍ପତ୍ତି ଉପରେ ତୀବ୍ର ପ୍ରତିକ୍ରିୟା ରଖିଥିଲେ । ଜୟପୁର କଂଗ୍ରେସ ବିଧାୟକ ତାରାପ୍ରସାଦ ବାହିନୀପତି ସ୍କୁଲ ବନ୍ଦନିଷ୍ପତ୍ତି ପ୍ରତ୍ୟାହାର ନ ହେଲେ ଆତ୍ମହତ୍ୟା କରିବାର ଚେତାବନୀ ଦେଇଥିଲେ ।