ସ୍ୱଚ୍ଛ ଭାରତ ଅଭିଯାନକୁ ସଫଳ କରିବା ପାଇଁ ଅମିତାଭ ବଚ୍ଚନଙ୍କ ଠାରୁ ରତନ ଟାଟାଙ୍କ ଯାଏ ବିଭିନ୍ନ ବର୍ଗର ଲୋକେ ସାମିଲ ହୋଇ ଏହାକୁ ଏକ ଜନଆନ୍ଦୋଳନରେ ପରିଣତ କରିଥିବାବେଳେ ଏଥିରେ ଏକ ନୁଆ ଅଧ୍ୟାୟ ଯୋଡ଼ିଛନ୍ତି ଦୁଇଜଣ ଗ୍ରାମୀଣ ମହିଳା ।

ଗୋପାଳ ଗଞ୍ଜ ସଦର ବ୍ଲକ କହ୍ନେୱା ଗ୍ରାମ ପଂଚାୟତକୁ ଖୋଲା ଶୌଚମୁକ୍ତ ଘୋଷଣା କରାଯାଇଥିଲା । ଏହି ଅବସରରେ ସଂପୃକ୍ତ ଗ୍ରାମ ପଂଚାୟତର ମେହରୁନ ଖାତୁନ ଏବଂ ଜଗରାନୀ ଦେବୀଙ୍କୁ ପୁରସ୍କୃତ କରାଯାଇଥିଲା । ଏହି ଦୁଇ ମହିଳା ଦିନ ମଜୁରିଆ ଓ ଭିକ୍ଷା ବୃତ୍ତି କରି ଚଳନ୍ତି । ଭିକ୍ଷା ବୃତ୍ତିରୁ ମିଳୁଥିବା ଅର୍ଥକୁ ସଂଚୟ କରି ସେମାନେ ନିଜ ଘରେ ଶୌଚାଳୟ କରିଥିବା ଜଣାପଡ଼ିବା ପରେ ଜିଲ୍ଲା ପ୍ରଶାସନ ସେମାନଙ୍କୁ ଶୌଚାଳୟ ଅନୁଦାନ ରାଶି ପ୍ରଦାନ କରିବା ସହିତ ପୁରସ୍କୃତ କରିଛନ୍ତି । ଜିଲ୍ଲାପାଳ ଅନିମେଷ ପରାଶର କହିଛନ୍ତି ଯେ ଏହି ଦୁଇ ମହିଳାଙ୍କ ମାନସିକତାକୁ ସଲାମ କରାଯିବା କଥା । ସେମାନେ ଏହା କରି ଦୃଷ୍ଟାନ୍ତ ସୃଷ୍ଟି କରିଛନ୍ତି ।