ମହାମାରୀ କରୋନା ପାଇଁ  ଅନଲାଇନ ଶିକ୍ଷା ହିଁ ଏକମାତ୍ର ବିକଳ୍ପ ହୋଇଥିବା ବେଳେ ସରକାରୀ ଉଦାସିନତା ଓ ଦୂରଦୃଷ୍ଟିର ଅଭାବ ଯୋଗୁ ବଞ୍ଚିତ ହୋଇଛନ୍ତି ୬୮  ପ୍ରତିଶତ ଛାତ୍ରଛାତ୍ରୀ । ଗାଁ ରୁ ପଲ୍ଲୀ ଓ ସହରରୁ ରାଜଧାନୀ । ସବୁଠି ସମାନ ଅବସ୍ଥା । ଶିକ୍ଷାନୁଷ୍ଠାନ ବନ୍ଦ ହେବା କାରଣରୁ ପ୍ରଥମରୁ ଦ୍ୱାଦଶ ପର୍ଯ୍ୟନ୍ତ ଛାତ୍ରଛାତ୍ରୀଙ୍କ ପାଇଁ ୩୦  ପ୍ରତିଶତ ପାଠ୍ୟକ୍ରମ ହ୍ରାସ କରାଯାଇଛି ।  ଏହାସତ୍ତ୍ବେ ୬୮   ପ୍ରତିଶତ ଛାତ୍ରଛାତ୍ରୀଙ୍କ ପାଖରେ ପହଞ୍ଚି ପାରିନି ଅନଲାଇନ ଶିକ୍ଷା । କନ୍ଧମାଳ ଜିଲ୍ଲାରେ ସର୍ବନିମ୍ନ ୨୪.୯୮  ପ୍ରତିଶତ ଓ ଖୋର୍ଦ୍ଧା ଜିଲ୍ଲାରେ ସର୍ବାଧିକ ୫୧,୩୨ ପ୍ରତିଶତ ଛାତ୍ରଛାତ୍ରୀଙ୍କ ପାଖରେ ଅନଲାଇନ ଶିକ୍ଷା ପହଞ୍ଚି ପାରିଛି । ଏଭଳି ସ୍ଥିତିକୁ ଦେଖି  ରାଜ୍ୟ ସରକାରଙ୍କୁ ଘେରିଛି ଓଡିଶା ଅଭିଭାବକ ମହାସଂଘ । ସରକାର ବିଜୁ ଯୁବ ବାହିନୀ ଗଠନ କରି ସରକାରୀ ରାଜକୋଷରୁ ୪୫୦  କୋଟି ଟଙ୍କା ଖର୍ଚ୍ଚ କରିଛନ୍ତି ।  ବିଜୁ ଯୁବ ବାହିନୀକୁ ରାଜ୍ୟର ବିଭିନ୍ନ ଗ୍ରାମ ପଞ୍ଚାୟତ ଓ ପୌରାଞ୍ଚଳରେ ନିୟୋଯିତ କରାଯାଇ ଅନଲାଇନ ଶିକ୍ଷାରୁ ବଞ୍ଚିତ ହେଉଥିବା ଛାତ୍ରଛାତ୍ର ଓ ଅଭିଭାବକଙ୍କୁ ସହଯୋଗ କରିବା ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଚିଠି ଲେଖିଛି ସଂଘ । ପୁଣି ରାଜ୍ୟ ସରକାର ଟେଲିଭିଜନ ଜରିଆରେ ଶିକ୍ଷାଦାନ କରିପାରନ୍ତେ । ଗୋଟିଏ ଗୋଟିଏ ଗାଁ କୁ ଗୋଟିଏ ବଡ଼ ଟିଭି ଦେଇଦେଲେ କାମ ସରନ୍ତା । କିନ୍ତୁ ଏହା ହେଉନି। ଅନଲାଇନ ରେ ଶିକ୍ଷା ପ୍ରଦାନ ପାଇଁ ଶିକ୍ଷକ ନ୍କ ନିକଟରେ ତାଲିମ ନାହିଁ କି ଉପକରଣ ନାହିଁ । ପିଲାଙ୍କ ନିକଟରେ ଭିଡିଓ ଦେଖିଲାଭଳି ଦାମୀ ମୋବାଇଲି ନାହିଁ । ଅନେକ ଗାଁରେ ବିଜୁଳି ନାହିଁକି କି ନେଟୱାର୍କ ନାହିଁ । କୋରାପୁଟ,କେଉଁଝର,ରାୟଗଡା,ଝାରସୁଗୁଡା,ନୂଆପଡା ଜିଲ୍ଲାରେ ପିଲାଙ୍କୁ ନେଟୱାର୍କ ପାଇଁ ପାହାଡ଼ ଚଢ଼ିବାକୁ ପଡୁଛି। ସବୁ ସରକାରୀ ବିଦ୍ୟାଳୟର ଶିକ୍ଷକ ମାନେ ଅନଲାଇନ ରେ ଶିକ୍ଷାଦାନ ପାଇଁ ସକ୍ଷମ ହୋଇପାରୁନଥିବା ବେଳେ ପିଲାମାନେ ଏହାକୁ ବୁଝିପାରୁନାହାନ୍ତି ।