ଗତ କାଲି ରାଜଧାନୀ ଭୁବନେଶ୍ୱରର ତାପମାତ୍ରା ତତଲାଗଡ଼ କୁହାଯାଉଥିବା ଟିଟିଲାଗଡ଼ ଠାରୁ ବଳି ଯାଇଥିଲା । ଟିଟିଲାଗଡ଼ରେ ମଙ୍ଗଳବାର ତାପମାତ୍ରା ୪୦ ଡ଼ିଗ୍ରୀ ଥିବାବେଳେ କଂକ୍ରିଟ ସହର ଭୁବନେଶ୍ୱରର ତାପମାତ୍ରା ୪୨ ଡ଼ିଗ୍ରୀ ପାର ହୋଇଯାଇଛି । ପ୍ରବଳ ଖରାରେ ଜନ ଜୀବନ ଅସ୍ତବ୍ୟସ୍ତ ହୋଇପଡ଼ିଥିବାବେଳେ ପାଣି ଟୋପାଏ ପାଇଁ ସଂଘର୍ଷ କରୁଥିବା ପଶୁପକ୍ଷୀ ମାନଙ୍କ ତୃଷା ନିବାରଣ ପାଇଁ ଆଗେଇ ଆସିଛି ୟୁଥ ଫର ସେବା ନାମରେ ଏକ ସଂଗଠନ । ୟୁଥ ଫର ସେବା ସହଯୋଗରେ ଶତାକ୍ଷୀ ମହିଳା ସଂଗଠନ ପକ୍ଷରୁ ରୌଦ୍ର ତାପ ଯୋଗୁଁ କଲବଲ ହେଉଥିବା ପକ୍ଷୀମାନଙ୍କ ନିମନ୍ତେ ଗଛରେ ପାଣିପାତ୍ର ବାନ୍ଧି ଏକ ନୁଆ ଅଭିଯାନ ଆରମ୍ଭ ହୋଇଛି । ପ୍ରଥମ ପର୍ଯ୍ୟାୟରେ କଳିଙ୍ଗନଗର କେ-୪ ଅଂଚଳରେ ପକ୍ଷୀଙ୍କ ପାଇଁ ୨୦ଟି ପାଣିପାତ୍ର ବିଭିନ୍ନ ଗଛ ମାନଙ୍କରେ ବନ୍ଧା ଯାଇଛି ।