ଏଣିକି ଆଉ ସଡ଼କ ପଥରେ ନୁହେଁ ବରଂ ଆକାଶ ମାର୍ଗରୁ ଆପଣଙ୍କ ନିକଟରେ ପହଂଚିଯିବ ସୁସ୍ୱାଦୁ ଖାଦ୍ୟ । ସେ ବି ଅର୍ଡର ଦେବାର ଅଳ୍ପ କେଇ ସମୟ ମଧ୍ୟରେ । ଖାଦ୍ୟ ପାଇଁ ବିଳମ୍ୱର ପରିସମାପ୍ତି ଘଟିବ ଓ ଅଧିକ ବିଳମ୍ୱ କାରଣରୁ ଗ୍ରାହକ କରୁଥିବା ଅର୍ଡର ବାତିଲ ରୁ କମ୍ପାନୀକୁ ରକ୍ଷା ମିଳିବ ।  ଅନଲାଇନ ଫୁଡ ଡେଲିଭରି କମ୍ପାନୀ ଜୋମାଟୋ ଆଣିଛି ଏମିତି ଏକ ନୂଆ ପ୍ରଯୁକ୍ତି କୌଶଳ  । ଯାହା ସାହାଯ୍ୟରେ ୫  କିମି ଦୂରରେ ଅର୍ଡର କରିଥିବା  ଗ୍ରାହକ ୧୦  ମିନଟସମୟ ମଧ୍ୟରେ ନିଜ  ମନପସନ୍ଦର ଖାଦ୍ୟ ପାଇପାରିବେ  । ଜୋମାଟୋ ଏପରି ଏକ ଡ୍ରୋନ ତିଆରି କରିଛି ଯେ, ଆକାଶରେ ଉଡି ଉଡି ଖାଇବା ପହଞ୍ଚାଇବ । ଏହି ପରିକଳ୍ପନା କୁ ବାସ୍ତବତାର ରୂପ ଦେବା ପାଇଁ   ଗତ କିଛି ମାସ ପୂର୍ବେ ଲକ୍ଷ୍ନୋର ଡ୍ରୋନ ଷ୍ଟାର୍ଟଅପ କମ୍ପାନୀ ସହ ଜୋମାଟୋ ହାତ ମିଶାଇଥିଲା । ଏହି ହାଇ ଟେକ୍ନୋଲୋଜି ଦ୍ବାରା ପାର୍ସଲ ଡେଲିଭରି ଅବଧିକୁ କମ କରିବା ସହ ପ୍ରଦୂଷଣ  ଓ ଟ୍ରାଫିକ ଭଳି ସମସ୍ୟା ମଧ୍ୟ ସାମ୍ନା କରିବାକୁ ପଡିବ ନାହିଁ । ଜୋମାଟୋ ପ୍ରତିଷ୍ଠାତା ଦୀପନ୍ଦର ଗୋୟଲ ଏ ନେଇ ଟ୍ବିଟ କରି ସୂଚନା ଦେଇଛନ୍ତି । ସେ କହିଛନ୍ତି ଯେ, ଡେଲିଭରି ସମୟକୁ ୩୦ ରୁ ୧୫  ମିନଟ ହ୍ରାସ  କରିବା ପାଇଁ ଇଏ ଏକ ସହଜ ବାଟ । କାରଣ ରୋଡରେ ଫାଷ୍ଟ ଡେଲିଭରି ସମ୍ଭବପର ନୁହେଁ । ଏହି ଡ୍ରୋନ ରୋଟରୀ ୱିଙ୍ଗ୍ସର କମ୍ବିନେଶନ ରହିବ । ଯିଏ ୫  କିଲୋର ଭାର ନେଇ ଉଡାଣ ଭରିବାକୁ ସକ୍ଷମ ହୋଇପାରିବ ।