କରୋନା ଭାଇରସ୍ ମହାମାରୀ ଆରମ୍ଭ ହେବା ପରେ ଲୋକେ ନିଜ ନିଜ ଘରେ ରହିଲେ ଓ ସମୟ ବିନିଯୋଗ ପାଇଁ ସୋସାଲ ମିଡିଆରେ ବେଶୀ ସମୟ ଦେଉଥିଲେ ବୋଲି ଏକ ଅଧ୍ୟୟନରୁ ଜଣାପଡିଛି। ଲେକେ ଟ୍ୱିଟର୍ରେ ୨୪ ପ୍ରତିଶତ, ଫେସ୍ବୁକ୍ରେ ୨୭ ପ୍ରତିଶତ ଅଧିକ ସମୟ ବିତାଇଥିବା ଜଣାପଡିଛି । ସୋସିଆଲ ମିଡିଆରେ ଅଧିକ ସମୟ ବିତାଇବା ଏଣିକି ନିଶା ହେବାରେ ଲାଗିଛି । ଜର୍ନାଲ୍ ଅଫ୍ କ୍ଲିନିକାଲ୍ ଆଣ୍ଡ ସୋସିଆଲ ସାଇକୋଲୋଜିରେ ପ୍ରକାଶିତ ଅଧ୍ୟୟନ ଅନୁସାରେ, ସୋସିଆଲ ମିଡିଆ ନିଶାର ଉଦ୍ବେଗ ଓ ଅବସାଦ ସହ ସିଧା ସମ୍ପର୍କ ରହିଛି । ଏହାର ଅଧିକ ବ୍ୟବହାର ଦ୍ୱାରା କର୍ଟିସୋଲ ଓ ଆଡ୍ରେନାଲାଇନ୍ ହର୍ମୋନର ସ୍ତର ବଢ଼େ । ଏହା ଚିନ୍ତା ବଢ଼ାଉଥିବା ପ୍ରମୁଖ ହର୍ମୋନ ଅଟେ । ହାର୍ଭାର୍ଡ ମେଡିକାଲ ସ୍କୁଲର ଏକ ଅଧ୍ୟୟନ ଅନୁସାରେ, ଯେତେବେଳେ ଜଣେ ବ୍ୟକ୍ତି ସ୍କ୍ରିନ୍ ସହ ଅଧିକ ଜଡ଼ିତ ହୋଇଯାଏ, ତା’ର ଆଖି ପଲକ ପକାଇବାର ବେଗ ୭୦ ପ୍ରତିଶତ ପର୍ଯ୍ୟନ୍ତ କମିଯାଏ । ଏହାର ସିଧା ପ୍ରଭାବ ଆଖି ଉପରେ ପଡ଼ିଥାଏ । ସୋସିଆଲ ମିଡିଆ ନିଶାରୁ ରକ୍ଷା ପାଇବା ପାଇଁ ସ୍ୱାସ୍ଥ୍ୟ ପତ୍ରିକା ହେଲ୍ଥଲାଇନ୍ କିଛି ଉପାୟ କହିଛି । ଏହାର ମାତ୍ରାଧିକ ବ୍ୟବହାରର ବିପଦ ବିଷୟରେ ମଧ୍ୟ କହିଛି । ସୋସିଆଲ ମିଡିଆକୁ ମୋବାଇଲ ବଦଳରେ କମ୍ପ୍ୟୁଟରରେ ବ୍ୟବହାର କରିବା ଉଚିତ ବୋଲି ଏହା ପ୍ରସ୍ତାବ ଦେଇଛି । ସେହିପରି ଅନାବଶ୍ୟକ ଆପ୍ର ନୋଟିଫିକେସନ୍ ବନ୍ଦ କରିଦେବାକୁ କହିଛି । ସୋସିଆଲ ମିଡିଆ ପାଇଁ ପ୍ରତିଦିନର ନିର୍ଦ୍ଦିଷ୍ଟ ସମୟ ଚୟନ କରିବା ଉଚିତ । ନିୟମ ପ୍ରସ୍ତୁତ କରିବା ସହିତ ନୂଆ ଅଭ୍ୟାସର ବିକାଶ କରିବା ଜରୁରୀ । ସାଙ୍ଗସାଥୀଙ୍କ ସହ ମିଳାମିଶା କରିବା ଉଚିତ । ଅନ୍ୟମାନଙ୍କ ପୋଷ୍ଟକୁ ଲାଇକ୍ କରିବା ଧୀରେ ଧୀରେ ନିଶା ପାଲଟିଯାଏ । ତେଣୁ ଏହାଠୁ ନିଜକୁ ବଞ୍ଚାଇ ରଖିବା ଉଚିତ ବୋଲି ସ୍ୱାସ୍ଥ୍ୟ ପତ୍ରିକା ପ୍ରସ୍ତାବ ଦେଇଛି ।
13/12/2020