ଦୀପାବଳୀର ଅବ୍ୟବହିତ ପୂର୍ବରୁ ଦେଶର ଅର୍ଥନୀତିକୁ ସୁଦୃଢ କରିବାକୁ ଅର୍ଥମନ୍ତ୍ରୀ ନିର୍ମଳା ସୀତାରମଣ ଆତ୍ମନିର୍ଭର ଭାରତ ୩.୦ ଅନ୍ତର୍ଗତ  ଏକ ଉତ୍ସାହମୂଳକ ପ୍ୟାକେଜ ଘୋଷଣା କରିଛନ୍ତି । ଦେଶରେ ନିଯୁକ୍ତିକୁ ପ୍ରୋତ୍ସାହନ ଦେବା ଉଦ୍ଦେଶ୍ୟରେ ଏବଂ ଆତ୍ମନିର୍ଭର ଭାରତ ଯୋଜନା ଜରିଆରେ ରୋଜଗାରକୁ ସଶକ୍ତ କରିବା ଲକ୍ଷ୍ୟରେ  ଅର୍ଥ ମନ୍ତ୍ରାଳୟ ପକ୍ଷରୁ ଏହି ପଦକ୍ଷେପ ନିଆଯାଇଛି । ଏହି ଉତ୍ସାହମୂଳକ ପ୍ୟାକେଜ ଅଧିନରେ ୧୨ଟି ପଦକ୍ଷେପ ନିଆଯାଉଛି। ଗୁରୁବାର ଆତ୍ମନିର୍ଭର ଭାରତ ୩.୦  ରୋଜଗାର ଯୋଜନା ଘୋଷଣା କରି  ସେ କହିଛନ୍ତି, ଏହି ଯୋଜନା କୋଭିଡ -୧୯ ପୁନରୁଦ୍ଧାର ପର୍ଯ୍ୟାୟରେ ନୂତନ ନିଯୁକ୍ତି ସୁଯୋଗ ସୃଷ୍ଟି କରିବାରେ ଉତ୍ସାହିତ କରିବ। ଇପିଏଫ୍ଓ ପଞ୍ଜୀକୃତ ପ୍ରତିଷ୍ଠାନରେ ମାସିକ ବେତନ ୧୫,୦୦୦ରୁ କମ୍ ବେତନ ପାଉଥିବା ବ୍ୟକ୍ତିଙ୍କ ପାଇଁ ଏହା ପ୍ରଯୁଜ୍ୟ ହେବ। ଏହି ବର୍ଗର ନୂତନ କର୍ମଚାରୀଙ୍କ ଲାଗି ଇପିଏଫ୍ ଭରିବେ କେନ୍ଦ୍ର ସରକାର।  ସେ ଏହା ମଧ୍ୟ କହିଛନ୍ତି ଯେ ଏହା  ଗତ ଅକ୍ଟୋବର ପହିଲାଠାରୁ କାର୍ଯ୍ୟକାରୀ ହେବ। ଏହି ସୁବିଧା ଦୁଇ ବର୍ଷ ପର୍ଯ୍ୟନ୍ତ ବଳବତ୍ତର ହେବ। କରୋନା ସମୟରେ ଚାକିରୀ ହରାଇଥିବା କର୍ମଚାରୀଙ୍କୁ ମଧ୍ୟ ଏହି ସୁବିଧା ମିଳିପାରିବ ।କେନ୍ଦ୍ରମନ୍ତ୍ରୀ ନିର୍ମଳା ସୀତାରମଣ ଆହୁରି ମଧ୍ୟ କହିଛନ୍ତି, ଦେଶର ଆର୍ଥିକ ଅବସ୍ଥାରେ ଦ୍ରୁତଗତିରେ ସୁଧାର ଆସୁଛି । ଜିଏସଟି ସଂଗ୍ରହ ୧୦ ପ୍ରତିଶତ ବଢିଛି । ନିବେଶରେ ବି ଭଲ ପ୍ରଗତି ହୋଇଛି । ଅନ୍ତର୍ଜାତୀୟ ରେଟିଂ ସଂସ୍ଥାମାନେ ବି  ବି ଦର୍ଶାଇଛନ୍ତି ଯେ, ଦେଶର ଜିଡିପିରେ ସୁଧାର ଆସିଛି । ବିଦେଶୀ ମୁଦ୍ର ଭଣ୍ଡାରରେ ବି ଭଲ ବୃଦ୍ଧି ଘଟିଛି । ବ୍ୟାଙ୍କ ଗୁଡିକର କ୍ରେଡିଟ୍ ଗ୍ରୋଥ ବି ବଢିଛି ବୋଲି ସୀତାରମଣ କହିଛନ୍ତି ।