ତାମିଲନାଡୁ ପୋଲିସ ଡିଜି ଭାବେ ଯୋଗ ଦେଇଛନ୍ତି  ଓଡିଆ ପୁଅ ଜଳଦ କୁମାର ତ୍ରିପାଠୀ ।ସେ ତାଙ୍କର ଏହି ନୁଆଁ ନିଯୁକ୍ତିରେ ୨୦୨୧ଯାଏଁ ରହିବେ । ୧୯୮୫ ବ୍ୟାଚର  ଆଇପିଏସ ଅଫିସର ଜଳଦ ତାମିଲନାଡୁ କ୍ୟାଡରର । ସେ  ପୂର୍ବରୁ ଚେନ୍ନାଇର ଦୁଇଥର ପୋଲିସ କମିଶନର ଦାୟିତ୍ୱ ତୁଲାଇଥିବା ବେଳେ ୬ଟି ସମ୍ବେଦନଶୀଳ ଜିଲ୍ଲାର ଏସପି ଭାବେ କାର୍ଯ୍ୟଭାର ତୁଲାଇଛନ୍ତି । ଏଥିସହ ଆଡିସିନାଲ ଡିଜିପି ଲ ଆଣ୍ଡ ଅର୍ଡର , ଜଏଣ୍ଟ ପୋଲିସ କମିଶନର ଲ ଆଣ୍ଡ ଅର୍ଡର, ଆଇଜିପି କ୍ରାଇମବ୍ରାଞ୍ଚ ସିଆଇଡି ଭଳି ଦାୟିତ୍ୱ ତୁଲାଇଛନ୍ତି । ନିଜ କାର୍ଯ୍ୟକାଳ ଭିତରେ ଦକ୍ଷତାକୁ  ନେଇ ବେଶ ଚର୍ଚ୍ଚାରେ ରହିଆସିଛନ୍ତି ଜଳଦ । ତାମିଲନାଡୁର ସ୍ବର୍ଗତାଃ ମୁଖ୍ୟମନ୍ତ୍ରୀ  ଜୟଲଳିତାଙ୍କ ଗୁଡ ବୁକରେ ରହିଥିଲେ ଜଳଦ କୁମାର ତ୍ରିପାଠୀ । ଜଏଣ୍ଟ ପୋଲିସ କମିଶନର ସାଉଥ ଜୋନରେ ଥିବା ସମୟରେ ୧୯୯୯ ରୁ ୨୦୦୫ ମଧ୍ୟରେ ଅନେକ ମାଫିଆରାଜ, ଗ୍ୟାଙ୍ଗଷ୍ଟାରଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେଇ ବେଶ ଚର୍ଚ୍ଚାରେ ରହିଛନ୍ତି । ସେ ପ୍ରଥମ ଆଇପିଏସ ଅଫିସର ଯେ କି, ପ୍ରଧାନମନ୍ତ୍ରୀଙ୍କ ଦ୍ୱାରା ଏକ୍ସେଲେନସ ସମ୍ମାନରେ ପବ୍ଲିକ ଆଡମିନଷ୍ଟ୍ରେସନ ପାଇଁ ସମ୍ମାନିତ ହୋଇଛନ୍ତି । ଏଥିସହ 'ଇଣ୍ଟରନ୍ୟାସନାଲ ଆସୋସିଏସନ ଅଫ ଚିଫ ଅଫ ପୋଲିସ' ଦ୍ବାରା ଇଣ୍ଟରନ୍ୟାସନାଲ କମ୍ୟୁନିଟି ପୋଲିସିଂ ଆୱାର୍ଡ, ଇନୋଭେସନ ଇନ ଗଭର୍ଣ୍ଣାନ୍ସ ଗୋଲ୍ଡ ମେଡାଲ ଆୱାର୍ଡ , ରାଷ୍ଟ୍ରପତି ପୋଲିସ ପଦକ, ସିଏମ ଏକ୍ସେଲେନ୍ସ ଆୱାର୍ଡ ଭଳି ଅନେକ ସମ୍ମାନରେ ସମ୍ମାନିତ ହୋଇଛନ୍ତି।ତେବେ ଏହି ଓଡିଆ ପୁଅଙ୍କ ନିଜ ଘର ପଟିଆ ଅଞ୍ଚଳର ହୋଇଥିବା ବେଳେ ସେ ପିଲାଦିନେ କେନ୍ଦ୍ରାପଡା ମାହାଙ୍ଗାର ଭିରା ଗ୍ରାମରେ ବଢିଛନ୍ତି । ପିତା ସ୍ୱର୍ଗତଃ ଇନ୍ଦ୍ରମଣି ତ୍ରିପାଠୀ ଓ ମାତା ସ୍ୱର୍ଗତଃ ହେମଲତା ଦେବୀଙ୍କ ସନ୍ତାନ ହେଉଛନ୍ତି ଓଡିଆ ପୁଅ ତଥା ତାମିଲନାଡୁ ପୋଲିସ ଡିଜି ଜଳଦ କୁମାର ତ୍ରିପାଠୀ ।