ବୌଦ୍ଧ ଜିଲ୍ଲାରେ ଫେଲ ମାରିଛି ପିଆଜ ମିଶନ। ପିଆଜ ଉତ୍ପାଦନ କିଭଳି ବଢିବ ସେ ଦିଗରେ ଦୃଷ୍ଟି ନ ଦେଇ ପିଆଜ ସଂରକ୍ଷଣ ଗୃହ ତିଆରିରେ ଦୃଷ୍ଟି ଦେବାରୁ ଏବେ ଜିଲାର ପିଆଜ ଚାଷୀଙ୍କ ଆଖିରୁ ଲୁହ ବୋହୁଛି।  ଉର୍ବରମାଟି,ଅନୁକୂଳ ଜଳବାୟୁ ଥିବାରୁ ଏଠାରେ ପିଆଜ ଚାଷ ଭଲ ହୋଇଥାଏ । ଲୋକେ ପାରମ୍ପରିକ ଜ୍ଞାନ ଓ ଉପଲବ୍ଧ ସମ୍ବଳର ବିନିଯୋଗ କରି କମ ଜାଗାରେ ପିଆଜ ଚାଷ କରିଥାନ୍ତି ।ପିଆଜର ଭଲ ଅମଳଦେଖାଯିବ ପରେ ସରକାର ଏ ଦିଗରେ ସହାୟତା କରିବାକୁ ଆଗେଇ ଆସିଥିଲେ । ପାଲଝାର ଠାରେ ଭାରତର ଦ୍ବିତୀୟ ବୃହତ ପିଆଜ ଗବେଷଣା କେନ୍ଦ୍ର ଖୋଲାଯାଇଥିଲା । ଏଥିପାଇଁ ଉଦ୍ୟାନ ବିଭାଗ ପକ୍ଷରୁ କେତେକ ଚାଷୀଙ୍କୁ ସଂରକ୍ଷଣ ନିମନ୍ତେ ପିଆଜ ଘର ଆବଣ୍ଟନ କରାଯାଇଥିଲା । କିନ୍ତୁ ଚଳିତ ବର୍ଷ ବୌଦ୍ଧ ଜିଲ୍ଲାରେ କ୍ଷତି ସହିଛି ପିଆଜ ଚାଷୀ । ପିଆଜ ଚାଷୀ ପାଇଁ ଆବଣ୍ଟନ କରାଯାଇଥିବା ଘର ଏବେ କୁକୁଡ଼ା ଘର ପାଲଟିଛି । ତେବେ ଚଳିତ ବର୍ଷ ଜିଲ୍ଲାରେ ପିଆଜ ଚାଷ ଭଲ ହୋଇନଥିବା ଘଟଣାକୁ ଖୋଦ୍ ଉଦ୍ୟାନ ବିଭାଗ ଅଧିକାରୀ ସ୍ବୀକାର କରିଛନ୍ତି । ଉଦ୍ୟାନ ବିଭାଗ ଆବଶ୍ୟକୀୟ ବିହନ ଯୋଗାଣରେ ସହାୟତା କରିନଥିବା ଚାଷୀମାନେ କହନ୍ତି । ଫସଲର ରୋଗପୋକ ପାଇଁ ଏକାଧିକ ଥର ଅଭିଯୋଗ କଲେବି କେହି ଶୁଣୁ ନାହାନ୍ତି । ବିଗତ ଦୁଇବର୍ଷ ଧରି ଚାଷୀମାନେ କ୍ଷତି ସାହିବ ପରେ ଏବେ ପିଆଜ ବଦଳରେ କୁକୁଡ଼ା ପାଳନ ଆରମ୍ଭ କରିଛନ୍ତି ।ପିଆଜ ସଂରକ୍ଷଣ ପାଇଁ ମିଳିଥିବା ଘର ଗୁଡିକ ଏବେ କୁକୁଡ଼ା ଘର ଭାବେ ବ୍ୟବହୃତ ହେଉଛି ।