ଗୁରୁବାର ସଂସଦରେ ଅର୍ଥନୈତିକ ସର୍ଭେ ରିପୋର୍ଟ ୨୦୧୯ ଉପସ୍ଥାପନ ହୋଇଛି । ଏହି ରିପୋର୍ଟ ଅନୁଯାୟୀ ଅଦାଲତରେ ବିଚାରାଧୀନ ମାମଲା ସଂଖ୍ୟାରେ ଅନ୍ୟ ରାଜ୍ୟ ତୁଳନାରେ ଓଡ଼ିଶାର ସ୍ଥାନ ଶୀର୍ଷରେ ରହିଛି। ଗତ ମଇ ୩୧ ସୁଦ୍ଧା ୬୪ ପ୍ରତିଶତ ଉଭୟ ଦେୱାନୀ ଓ ଫୌଜଦାରୀ ମାମଲା ତିନି ବର୍ଷରୁ ଅଧିକ ସମୟ ଧରି ରାଜ୍ୟର ବିଭିନ୍ନ ଅଦାଲତରେ ବିଚାର ପାଇଁ ପଡ଼ିରହିଛି । ୨୦୧୮ରେ ପୁରୁଣା ମାମଲା ସଂଖ୍ୟାର ମାତ୍ର ୬୨.୧୮ ପ୍ରତିଶତ ଫଇସଲା ହୋଇଛି। ଅଦାଲତ ମାମଲା ପରିଚାଳନା ପ୍ରସଙ୍ଗରେ ଓଡ଼ିଶା ସମେତ ଉତ୍ତରପ୍ରଦେଶ, ବିହାର ଓ ପଶ୍ଚିମବଙ୍ଗ ଆଦି ରାଜ୍ୟ ପ୍ରତି ସ୍ୱତନ୍ତ୍ର ଧ୍ୟାନ ଦେବା ସହ ଅତିରିକ୍ତ ବିଚାରପତି ନିଯୁକ୍ତି କରିବାକୁ ସର୍ଭେ ରିପୋର୍ଟରେ କୁହାଯାଇଛି। ବର୍ଷ ବର୍ଷ ଧରି ବିଚାରପତି ସଂଖ୍ୟାରେ ସୁଧାର ଅଣାଯାଇପାରିଲା ନାହିଁ । ବିଚାରାଳୟ ଗୁଡିକରେ ବିଚାରପତି ଙ୍କ ସଂଖ୍ୟା ପୂରଣ ହେଉନଥିବାରୁ ମାମଲା ଗୁଡିକ ବିଳମ୍ବିତ ହୋଇଛି ଓ ବିକାଶ ପ୍ରକ୍ରିୟା ବାଧାପ୍ରାପ୍ତ ହୋଇଛି । ଅଦ୍ୟାବଧି ଓଡିଶା ହାଇକୋର୍ଟରେ ୧ଲକ୍ଷ ୬୦ ହଜାର ମାମଲା ରହିଛି । ସେଥିରୁ ୪ ହଜାର ରୁ ଅଧିକ ନିୟମିତ ଜାମିନ ମାମଲା। ଦୁଇ ହଜାର ରୁ ଅଧିକ ମିଶଲେନିୟସ ମାମଲା। ୪ ହଜାର ଅଦାଲତ ଅବମାନନା ମାମଲା,୯ ହଜାର କ୍ରିମନାଳମାମଲା ରହିଛି ।୯ ହଜାର ଫୌଜଦାରୀ ମାମଲା ରେ ହାଇକୋର୍ଟ ଭାରାକ୍ରାନ୍ତ ହୋଇଛି । ତେବେ ଓଡିଶା ହାଇକୋର୍ଟ ରେ ବହୁ ବିଚାରପତି ପଦବୀ ଖାଲି ପଡ଼ିଥିଲେ ହେଁ ଏହାକୁ ପୂରଣ କରାଯାଇନାହିଁ । ବର୍ତ୍ତମାନ ଓଡିଶା ହାଇକୋର୍ଟ ରେ ୨୬ ଜଣ ବିଚାରପତି ଆବଶ୍ୟକ ଥିବା ବେଳେ ମୁଖ୍ୟ ବିଚାରପତିଙ୍କୁ ମିଶାଇ ମୋଟ ୧୩ ଜଣ ବିଚାରପତି ଅଛନ୍ତି । ବିଚାରପତି ଙ୍କ ସଂଖ୍ୟା କମିବା ଯୋଗୁଁ ମାମଲା ଗୁଡିକ ଫଇସଲା ହୋଇପାରୁନାହିଁ ।
05/07/2019