ଆଜିର ସମାଜରେ ଏପରି ଅନେକ ଅଛନ୍ତି ଯେଉଁମାନେକି ନିଜର ଆର୍ଥିକ ଅସୁବିଧା କାରଣରୁ ବହିଟିଏ କିଣିବା ପାଇଁ ସକ୍ଷମ ହୋଇପାରୁନାହାନ୍ତି । ଯାହାଫଳରେ ସେମାନଙ୍କ ଆଶା ଆକଂକ୍ଷା ସ୍ବପ୍ନ ହୋଇ ରହିଯାଉଛି । ହେଲେ ଏତିକିବେଳେ ଏହି ଅଭାବୀ ପିଲାଙ୍କ ସ୍ୱପ୍ନ ପୂରା କରିବାକୁ ଆଗକୁ ଆସିଛନ୍ତି ଜଣେ ବଦାନ୍ୟ ମଣିଷ ।ସେ ହେଉଛନ୍ତି ଚଣ୍ଡିଗଡ଼ର ସନ୍ଦୀପ କୁମାର । ସନ୍ଦୀପ ପାଠ ପଢ଼ିବାର ସ୍ବପ୍ନ ଦେଖୁଥିବା ଅଥଚ ବହିଟିଏ କିଣିବାକୁ ସ୍ମାର୍ଟ ହେଉନଥିବା ପିଲାଙ୍କୁ ପୁସ୍ତକ ଦେବା ପାଇଁ ଘର ଘର ବୁଲି ବହି ମାଗି ଯୋଗାଡ଼ କରୁଛନ୍ତି । ଅର୍ଥିକ ଅଭାବ ଅନଟନରେ ପୁସ୍ତକ କିଣି ପାରୁନଥିବା ପିଲାଙ୍କ ପାଇଁ ସନ୍ଦିପ୍ ଗତ ୨ ବର୍ଷ ତଳେ ‘ଓପନ୍ ଆଇ ଫାଉଣ୍ଡେସନ୍’ ନାମକ ଏକ ସାମାଜିକ ସଂଗଠନ ଗଢି ଏଭଳି ପ୍ରୟାସ ଆରମ୍ଭ କରିଥିଲେ । ତେବେ ନିରନ୍ତର ପ୍ରୟାସରେ ସନ୍ଦିପ ଗତ ଦୁଇ ବର୍ଷ ମଧ୍ୟରେ ପାଖାପାଖି ୩୦ ହଜାରରୁ ଉର୍ଧ୍ଵ ବହି ଯୋଗାଡ଼ କରିବା ସହ ଆବଶ୍ୟକତା ଲୋଡୁ ଥିବା ପିଲାଙ୍କ ହାତରେ ଦେଇ ସେମାନଙ୍କ ମୁହଁରେ ହସ ଦେଖିଛନ୍ତି । ୪ ହଜାରରୁ ଅଧିକ ଛାତ୍ରଛାତ୍ରୀ ସନ୍ଦୀପ ଙ୍କର ଏହି ସେବା ଗ୍ରହଣ କରିଥିବା ଜଣାଯାଇଛି । ଯାହାକୁ ନେଇ ଏବେ ପ୍ରଶଂସାର ପାତ୍ର ପାଲଟିଛନ୍ତି ସନ୍ଦିପ । ସେପଟେ ଏନେଇ ସନ୍ଦିପ କହନ୍ତି,ଗୋଟିଏ ଅଦରକାରୀ ପୁସ୍ତକ ଯଦି ଆଉ ଜଣଙ୍କର ସଫଳତାର ସୂତ୍ର ଖୋଜିଦିଏ ତେବେ ଏଥିପ୍ରତି ସମର୍ଥନ ବା କାହିଁକି ନ ମିଳିବ ।
19/08/2019